ନୂଆଦିଲ୍ଲୀ,୩୦।୩: ଆଇପିଏଲ୍ ୨୦୨୫ର ଆରମ୍ଭରୁ ବିପର୍ଯ୍ୟୟର ସମ୍ମୁଖୀନ ହେଉଛି ମୁମ୍ବାଇ ଇଣ୍ଡିଆନ୍ସ। ଦଳ ଆରମ୍ଭରୁ ହିଁ ଲଗାତାର ଦୁଇଟି ମ୍ୟାଚ ହାରିଯାଇଛି। ଗୁଜରାଟ ଟାଇଟନ୍ସ ବିପକ୍ଷରେ ଖେଳାଯାଇଥିବା ମ୍ୟାଚ୍ରେ ମୁମ୍ବାଇ ନୈରାଶ୍ୟଜନକ ପ୍ରଦର୍ଶନ କରିଥିଲା, ଯେଉଁଥିଲାଗି ଦଳକୁ ୩୬ ରନ୍ରେ ପରାଜିତ ହୋଇଥିଲା। ଏହି ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସ ଏକ ବଡ଼ ପରିବର୍ତ୍ତନ ସହିତ ମଇଦାନକୁ ଓହ୍ଲାଇଥିଲା। ଅଧିନାୟକ ହାର୍ଦ୍ଦିକ ପାଣ୍ଡ୍ୟା ଏହି ମ୍ୟାଚ୍ ସହିତ ତାଙ୍କ ସିଜିନ ଆରମ୍ଭ କରିଥିଲେ।
ସେ ଦଳର ପ୍ରଥମ ମ୍ୟାଚ୍ରେ ପ୍ଲେଇଂ ୧୧ର ଅଂଶ ନଥିଲେ। କିନ୍ତୁ ପାଣ୍ଡ୍ୟା ଆଇପିଏଲ୍କୁ ଫେରି ଏକ ବଡ଼ ଭୁଲ କରିଦେଇଛନ୍ତି।
IPL ୨୦୨୫ରେ ମୁମ୍ବାଇ ଇଣ୍ଡିଆନ୍ସ ଚେନ୍ନାଇ ସୁପର କିଙ୍ଗ୍ସ ବିପକ୍ଷରେ ତାଙ୍କର ପ୍ରଥମ ମ୍ୟାଚ୍ ଖେଳିଥିଲା। ହାର୍ଦ୍ଦିକ ଗୋଟିଏ ମ୍ୟାଚ ବାସନ୍ଦ ଯୋଗୁ ସେହି ମ୍ୟାଚ୍ ଖେଳିପାରି ନ ଥିଲେ। ତେବେ ଗତ ସିଜିନରେ ମୁମ୍ବାଇର ଶେଷ ମ୍ୟାଚ୍ରେ ପାଣ୍ଡ୍ୟାଙ୍କୁ ସ୍ଲୋ ଓଭର ରେଟ ଯୋଗୁ ଗୋଟିଏ ମ୍ୟାଚ ପାଇଁ ବ୍ୟାନ୍ କରାଯାଇଥିଲା। ଏପରି ପରିସ୍ଥିତିରେ ତାଙ୍କୁ ଚଳିତ ସିଜିନର ପ୍ରଥମ ମ୍ୟାଚ୍ରେ ବାହାରେ ବସିବାକୁ ପଡିଥିଲା। କିନ୍ତୁ ପାଣ୍ଡ୍ୟା ତାଙ୍କ ଭୁଲରୁ ଶିକ୍ଷା ପାଇ ନାହାନ୍ତି ଏବଂ ଆସିବା ମାତ୍ରେ ପୁଣିଥରେ ସ୍ଲୋ ଓଭର ରେଟରେ ଫସିଯାଇଛନ୍ତି।
ଗୁଜରାଟ ଟାଇଟାନ୍ସ ବିପକ୍ଷରେ ଖେଳାଯାଇଥିବା ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସ ନିର୍ଦ୍ଧାରିତ ସମୟରେ ୨୦ ଓଭର ବୋଲିଂ କରିପାରି ନ ଥିଲା। ଏଥିଯୋଗୁ ତାଙ୍କୁ ଗୁଜରାଟ ଇନିଂସର ଶେଷ ଓଭରରେ ଦଣ୍ଡ ଦିଆଯାଇଥିଲା। ଏହି ଓଭରରେ ତାଙ୍କୁ ୩୦ ୟାର୍ଡ ସର୍କଲରେ ଜଣେ ଅତିରିକ୍ତ ଫିଲ୍ଡର ରଖିବାକୁ ପଡିଥିଲା। ତେବେ ଏଥର ସ୍ଲୋ ଓଭର ରେଟ ଯୋଗୁଁ କୌଣସି ଅଧିନାୟକଙ୍କୁ ଆଇପିଏଲରେ ବ୍ୟାନ୍ କରାଯିବ ନାହିଁ। ଏଥର ICC ପରି IPLରେ ଡିମେରିଟ୍ ପଏଣ୍ଟ ସିଷ୍ଟମ ଲାଗୁ କରାଯାଇଛି। ଏହି ଡିମେରିଟ ପଏଣ୍ଟଗୁଡ଼ିକ ତିନି ବର୍ଷ ପାଇଁ ରହିବ।
ମୁମ୍ବାଇ ଇଣ୍ଡିଆନ୍ସ ଆଇପିଏଲ୍ର ସବୁଠାରୁ ସଫଳ ଦଳ ମଧ୍ୟରୁ ଗୋଟିଏ। ସେ ଏହି ଲିଗ୍ର ଟାଇଟଲ ୫ ଥର ଜିତିଛନ୍ତି। କିନ୍ତୁ ୨୦୨୨ ମସିହା ପରଠାରୁ ଏହି ଦଳର ପ୍ରଦର୍ଶନ ବହୁତ ହ୍ରାସ ପାଇଛି। ଆଇପିଏଲ୍ ୨୦୨୨ ପରଠାରୁ ମୁମ୍ବାଇ ଇଣ୍ଡିଆନ୍ସ ମୋଟ ୨୯ଟି ମ୍ୟାଚ୍ ହାରିଛି, ଯାହା ଅନ୍ୟ ଦଳ ତୁଳନାରେ ସର୍ବାଧିକ। ମୁମ୍ବାଇ ବ୍ୟତୀତ ଅନ୍ୟ କୌଣସି ଦଳ ୨୬ରୁ ଅଧିକ ମ୍ୟାଚ୍ ହାରି ନାହିଁ। ତଥାପି ମୁମ୍ବାଇ ଦଳ ଏହାର ପ୍ରତ୍ୟାବର୍ତ୍ତନ ପାଇଁ ଜଣାଶୁଣା। ଏପରି ପରିସ୍ଥିତିରେ ପାଣ୍ଡ୍ୟା ଏବଂ କମ୍ପାନୀ ଏକ ଦୃଢ଼ ପ୍ରତ୍ୟାବର୍ତ୍ତନ ଉପରେ ନଜର ରଖିବେ।
