ନୂଆଦିଲ୍ଲୀ,୩୦।୧୧: ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ)ର ସମସ୍ତ ୮ ଫ୍ରାଞ୍ଚାଇଜ ସେମାନଙ୍କ ରିଟେନ ଖେଳାଳିଙ୍କ ତାଲିକା ବିସିସିଆଇ ନିକଟରେ ଦାଖଲ କରିଛନ୍ତି। କ୍ରିକବଜରେ ପ୍ରକାଶ ପାଇଥିବା ରିପୋର୍ଟ ଅନୁଯାୟୀ, ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆରସିବି) ବିରାଟ କୋହଲି, ଗ୍ଲେନ ମ୍ୟାକ୍ସଓ୍ବେଲ ଓ ମହମ୍ମଦ ସିରାଜଙ୍କୁ ରିଟେନ କରିଛି। ସେହିଭଳି ରୋହିତ ଶର୍ମା, ଯଶପ୍ରୀତ ବୁମରା, ସୂର୍ଯ୍ୟକୁମାର ଯାଦବ ଓ କିରନ ପୋଲାର୍ଡଙ୍କୁ ଦଳରେ ରଖିଛି ୫ ଥର ଆଇପିଏଲ ଚାମ୍ପିୟନ ମୁମ୍ବାଇ ଇଣ୍ଡିଆନ୍ସ। ରାଜସ୍ଥାନ ରୟାଲ୍ସ ଦଳରେ ସଞ୍ଜୁ ସାମସନ, ଜୋସ ବଟଲର, ଯଶସ୍ବୀ ଜୈଶ୍ୱାଲଙ୍କୁ ବଜାୟ ରଖିଛି। ମୟଙ୍କ ଅଗ୍ରଓ୍ବାଲ, ଅର୍ଶଦୀପ ସିଂଙ୍କୁ ଦଳରେ ରଖିଛି ପଞ୍ଜାବ କିଙ୍ଗ୍ସ। ଅନ୍ୟପକ୍ଷରେ କେନ ଓ୍ବିଲିୟମସନଙ୍କ ସହ ଅବଦୁଲ ସାମଦ ଓ ଉମରାମ ମଲିକଙ୍କ ଭଳି ଅନ୍କ୍ୟାପଡ୍ ଖେଳାଳିଙ୍କୁ ବଜାୟ ରଖିଛି ସନରାଇଜର୍ସ ହାଇଦ୍ରାବାଦ।
ଗତ ସଂସ୍କରଣର ଚାମ୍ପିୟନ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ) ତା’ର ଅଧିନାୟକ ମହେନ୍ଦ୍ର ସିଂ ଧୋନୀଙ୍କ ସମେତ ରବୀନ୍ଦ୍ର ଜାଡେଜା, ରୁତୁରାଜ ଗାଏକ୍ୱାଡ ଓ ମୋଇନ ଅଲିଙ୍କୁ ଦଳରେ ରଖିଛି। ସେହିଭଳି ଦିଲ୍ଲୀ କ୍ୟାପିଟାଲ୍ସ ରିଷଭ ପନ୍ତ, ପୃଥ୍ବୀ ଶ’, ଅନରିଚ ନର୍ଟଜେ ଓ ଅକ୍ଷର ପଟେଲଙ୍କୁ ରଖିଥିବା ବେଳେ କୋଲକାତା ନାଇଟ୍ ରାଇଡର୍ସ (କେକେଆର) ସୁନୀଲ ନାରିନ, ଆନ୍ଧ୍ରେ ରସେଲ, ବରୁଣ ଚକ୍ରବର୍ତ୍ତୀ ଓ ଭେଙ୍କଟେଶ ଆୟାରଙ୍କୁ ଦଳରେ ସ୍ଥାନ ଦେଇଛି।
ତେବେ କେଉଁ ଫ୍ରାଞ୍ଚାଇଜ କାହାକୁ ଦଳରେ ରଖିଛନ୍ତି ସେ ନେଇ ବିସିସିଆଇ ପକ୍ଷରୁ ବିଧିବଦ୍ଧ ଘୋଷଣା କରାଯାଇନାହିଁ। ପ୍ରସାରଣକାରୀ ଚ୍ୟାନେଲ ପକ୍ଷରୁ ଏକ ସ୍ବତନ୍ତ୍ର ପ୍ରୋଗ୍ରାମ ମାଧ୍ୟମରେ ଏ ନେଇ ଘୋଷଣା କରାଯିବ। ବିସିସିଆଇ ପକ୍ଷରୁ ପ୍ରତ୍ୟେକ ଫ୍ରାଞ୍ଚାଇଜଙ୍କୁ ରିଟେନ ଖେଳାଳିଙ୍କ ତାଲିକା ନଭେମ୍ବର ୩୦ (ମଙ୍ଗଳବାର) ସନ୍ଧ୍ୟା ୫ଟା ସୁଦ୍ଧା ଦାଖଲ କରିବାକୁ କୁହାଯାଇଥିଲା। ଯାହାଫଳରେ ପ୍ରସାରଣକାରୀ ଚ୍ୟାନେଲକୁ ସ୍ବତନ୍ତ୍ର ପ୍ରୋଗ୍ରାମ ଶୁଟିଂ କରିବାକୁ ସମୟ ମିଳିବ। ଏହାର ପ୍ରସାରଣ ରାତି ୯ଟା ୩୦ରେ ହେବ।
