ନୂଆଦିଲ୍ଲୀ, ୨୭ା୭ (ପି.ଟି.)- ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଇଣ୍ଡିଆନ ପ୍ରିମିୟର ଲିଗ୍(ଆଇପିଏଲ୍) ବେଳେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ଦୁର୍ନୀତି ନିରୋଧୀ ଶାଖା (ଏସିୟୁ)କୁ ଦାୟିତ୍ୱ ସମ୍ପାଦନ କରିବା ଅପେକ୍ଷାକୃତ ସହଜ ହେବ ବୋଲି ଏହାର ମୁଖ୍ୟ ଅଜିତ୍ ସିଂ ପ୍ରକାଶ କରିଛନ୍ତି। ୟୁଏଇରେ ଆଇପିଏଲ୍ ସେପ୍ଟେମ୍ବର ୧୯ରୁ ନଭେମ୍ବର ୮ ତାରିଖ ପର୍ଯ୍ୟନ୍ତ ହେବ। ୫୧ ଦିନ ଧରି ହେବାକୁଥିବା ଏହି ଇଭେଣ୍ଟରେ ୬୦ଟି ଗେମ୍ ଖେଳାଯିବ। ଏହା ଦୁବାଇ, ଶାରଜା ଓ ଆବୁଧାବିରେ ରହିଥିବା ତିନୋଟି ଷ୍ଟାଡିୟମରେ ଖେଳାଯିବ। ଭାରତରେ କିନ୍ତୁ ୮ଟି ଭେନ୍ୟୁରେ ଆଇପିଏଲ୍ ଖେଳାଯାଇଥାଏ। ୟୁଏଇରେ ମାତ୍ର ତିନୋଟି ଗ୍ରାଉଣ୍ଡରେ ମ୍ୟାଚ୍ ଖେଳାଯାଉଥିବାରୁ ସେଗୁଡ଼ିକ ଉପରେ ନଜର ରଖିବା ସହଜ ହେବ ବୋଲି ସିଂ କହିଛନ୍ତି। କାର୍ଯ୍ୟସୂଚୀ ପ୍ରକାଶ ପାଇବା ପରେ କେତେଜଣ କାର୍ଯ୍ୟରେ ନିୟୋଜିତ ହେବେ ସେ ସମ୍ପର୍କରେ ନିଷ୍ପତ୍ତି ନିଆଯିବ। ଭାରତରେ ସାଧାରଣ ନିର୍ବାଚନ ଯୋଗୁ ୨୦୧୪ରେ ଆଇପିଏଲ୍ର ପ୍ରଥମ ଭାଗ ୟୁଏଇରେ ଅନୁଷ୍ଠିତ ହୋଇଥିଲା। ବିସିସିଆଇରେ ବର୍ତ୍ତମାନ ୮ଜଣ ଏସିୟୁ ଅଫିସର କାର୍ଯ୍ୟରତ। ୬୦ଟି ମ୍ୟାଚ ପରିଚାଳନା କରିବା ଏତିକି ଷ୍ଟାଫ୍ ଯଥେଷ୍ଟ ବୋଲି ଏସିୟୁ ମୁଖ୍ୟ କହିଛନ୍ତି। ତେବେ ଜୈବ ସୁରକ୍ଷିତ ପରିବେଶରେ ମ୍ୟାଚ ଖେଳାଯାଉଥିବାରୁ ହୁଏତ ଅଧିକ କର୍ମଚାରୀ ଆବଶ୍ୟକ ପଡ଼ିପାରେ।
