ଦୁବାଇ, ୬।୧୧: ଆଇପିଏଲରେ ସର୍ବାଧିକ ଛକା ମାରିଥିବା ଖେଳାଳିଙ୍କ ବିଷୟରେ ଯଦି ଆଲୋଚନା ହୁଏ, ତେବେ ଦର୍ଶକଙ୍କ ମନରେ ପ୍ରଥମେ ବିସ୍ଫୋରକ ବ୍ୟାଟ୍ସମ୍ୟାନ୍ କ୍ରିସ ଗେଲ୍ଙ୍କ ନାଁ ଆସେ। ଆଇପିଏଲର ପ୍ରାୟ ପ୍ରତ୍ୟେକ ସିଜିନ୍ରେ ଗେଲ ସର୍ବାଧିକ ଛକା ମାରିଥାନ୍ତି। ସେ ଏପର୍ଯ୍ୟନ୍ତ ଆଇପିଏଲରେ ୩୪୯ ଛକା ମାରିଛନ୍ତି। ଏଥର ଗେଲଙ୍କ ଦଳ ପଞ୍ଜାବ କିଙ୍ଗସ ଏକାଦଶ ପ୍ଲେ ଅଫ ପାଇଁ ଯୋଗ୍ୟତା ଅର୍ଜନ କରିପାରି ନାହିଁ। ତେଣୁ ଏଥର ମୁମ୍ବାଇ ଇଣ୍ଡିଆନ୍ସର ୨୨ ବର୍ଷୀୟ ଇଶାନ କିଶନ ସର୍ବାଧିକ ଛକା ମାରିଥିବା ତାଲିକାରେ ସର୍ବାଗ୍ରେ ଅଛନ୍ତି। ଏହି ସିଜିନରେ ଇଶାନ ଏପର୍ଯ୍ୟନ୍ତ ୨୯ ଛକା ମାରିଛନ୍ତି। ଚଳିତ ଆଇପିଏଲ ସିଜନରେ ସଞ୍ଜୁ ସାମସନ ସର୍ବାଧିକ ଛକା ଦୌଡ଼ରେ ଆଗୁଆ ରହିଥିଲେ। ସେ ୧୪ ଇନିଂସରେ ୨୬ ଛକା ମାରିଥିଲେ। କିନ୍ତୁ ଇଶାନ ଗୁରୁବାର ଦିଲ୍ଲୀ କ୍ୟାପିଟାଲ୍ସ ବିପକ୍ଷରେ ୩ ଛକା ମାରି ସାମସନଙ୍କ ରେକର୍ଡ ଭାଙ୍ଗିଛନ୍ତି। ଏପର୍ଯ୍ୟନ୍ତ ଇଶାନ ମୋଟ ୨୯ଟି ଛକା ଅଛି। ଏହି ତାଲିକାରେ ମୁମ୍ବାଇ ଇଣ୍ଡିଆନ୍ସର ହାର୍ଦ୍ଦିକ ପାଣ୍ଡ୍ୟା ତୃତୀୟ ସ୍ଥାନରେ ଅଛନ୍ତି। ସେ ଏପର୍ଯ୍ୟନ୍ତ ୨୫ଟି ଛକା ମାରିଛନ୍ତି। ଚଳିତ ବର୍ଷ ଗେଲ ମାତ୍ର ୭ ଇନିଂସରେ ୨୩ ଛକା ମାରିଥିଲେ।
