ଗୁଆହାଟୀ,୮।୪ : ଆଇପିଏଲ ସିରିଜ ୧୬ର ୧୧ ତମ ମ୍ୟାଚ ଶନିବାର ରାଜସ୍ଥାନ ରୟାଲ୍ସ(ଆରଆର) ଏବଂ ଦିଲ୍ଲୀ କ୍ୟାପିଟାଲ୍ସ(ଡିସି)ମଧ୍ୟରେ ଗୁଆହାଟୀର ବର୍ସାପାରା କ୍ରିକେଟ ଷ୍ଟାଡିୟମରେ ଅପରାହ୍ନ ସାଢ଼େ ୩ଟା ଖେଳାଯିବ। ରାଜସ୍ଥାନ ଏବଂ ଦିଲ୍ଲୀର ଦଳ ପ୍ରଥମ ଥର ପାଇଁ ଗୁଆହାଟୀ ଗ୍ରାଉଣ୍ଡରେ ମୁହାଁମୁହିଁ ହେବେ। ସାମଗ୍ରିକ ରେକର୍ଡ ବିଷୟରେ କହିବାକୁ ଗଲେ ଉଭୟ ଦଳ ୨୬ ଥର ମୁହାଁମୁହିଁ ହୋଇଛନ୍ତି। ଉଭୟ ରାଜସ୍ଥାନ ଏବଂ ଦିଲ୍ଲୀ ୧୩-୧୩ ମ୍ୟାଚ ଜିତିଛନ୍ତି। ଉଭୟଙ୍କ ମଧ୍ୟରେ ଶେଷ ପାଞ୍ଚଟି ମ୍ୟାଚରେ ଦିଲ୍ଲୀ ତିନୋଟି ଏବଂ ରାଜସ୍ଥାନ ଦୁଇଟି ମ୍ୟାଚ ଜିତିଛି।
ଗତ ଦୁଇଟି ମ୍ୟାଚରେ ଦିଲ୍ଲୀ ବ୍ୟାଟ୍ସମ୍ୟାନ୍ଙଙ୍କ ପ୍ରଦର୍ଶନ ନୈରାଶ୍ୟଜନକ ସ୍ଥିତି ଦଳ ପରିଚାଳନା ପାଇଁ ଚିନ୍ତାର ବିଷୟ ପାଲଟିଛି। ଓପନିଂ ବ୍ୟାଟ୍ସମ୍ୟାନ ପୃଥ୍ବୀ ଶ ଏବଂ ଆକ୍ରମଣକାରୀ ବ୍ୟାଟ୍ସମ୍ୟାନ ସରଫରାଜ ଖାନ ଅଧିକ କିଛି କରିପାରିନାହାଁନ୍ତି ଏବଂ ମାର୍କ ଉଡ ଏବଂ ଅଲଜାରି ଜୋସେଫଙ୍କ ଭଳି ଗୁଣାତ୍ମକ ଦ୍ରୁତ ବୋଲର ମଧ୍ୟ ଭଲ ପ୍ରଦର୍ଶନ କରିପାରି ନାହାନ୍ତି। ରାଜସ୍ଥାନ ବିପକ୍ଷ ମ୍ୟାଚରେ ତାଙ୍କୁ ଦ୍ରୁତ ବୋଲର ଟ୍ରେଣ୍ଟ ବୋଲ୍ଟ, କେଏମ ଆସିଫ ଏବଂ ଜେସନ ହୋଲଡରଙ୍କ ପେସ ଆକ୍ରମଣର ସାମ୍ନା କରିବାକୁ ପଡିବ। ତେବେ ଦିଲ୍ଲୀ ବ୍ୟାଟ୍ସମ୍ୟାନଙ୍କ ପାଇଁ ରବିଚନ୍ଦ୍ରନ ଅଶ୍ୱିନ ଏବଂ ୟୁଜବେନ୍ଦ୍ର ଚହଲଙ୍କ ସ୍ପିନ ଯୋଡି ବିପକ୍ଷରେ ଖେଳିବା ସହଜ ହେବ ନାହିଁ।
ଦିଲ୍ଲୀ ପାଇଁ ଏହା ଏକ ଆରାମଦାୟକ ବିଷୟ ଯେ ରାଜସ୍ଥାନର ଆକ୍ରମଣାତ୍ମକ ବ୍ୟାଟ୍ସମ୍ୟାନ ଜୋସ ବଟଲର୍ଙ୍କୁ ଏହି ମ୍ୟାଚ ଖେଳିବା କଷ୍ଟକର। ଗତ ମ୍ୟାଚରେ କ୍ୟାଚ ନେବାବେଳେ ସେ ଆହତ ହୋଇଥିଲେ। ତାଙ୍କ ବାମ ହାତର ଆଙ୍ଗୁଠିରେ ଆଘାତ ଲାଗିଛି। ଏହି ଆଘାତ ଯୋଗୁଁ ତାଙ୍କ ଫିଲ୍ଡିଂ ଏବଂ ବ୍ୟାଟିଂ କଷ୍ଟସାଧ୍ୟ ହୋଇଛି। ଯଦି ବଟଲର୍ ଖେଳନ୍ତି ନାହିଁ, ତେବେ ଜୋ ରୁଟ ତାଙ୍କ ସ୍ଥାନରେ ଏକ ସୁଯୋଗ ପାଇପାରନ୍ତି ।
ରାଜସ୍ଥାନ ରୟାଲ ସମ୍ଭାବ୍ୟ ପ୍ଳେଇଙ୍ଗ ୧୧ରେ ଯଶସ୍ବୀ ଜୈସୱାଲ, ଜୋସ ବଟଲର, ସଞ୍ଜୁ ସାମସନ (ଅଧିନାୟକ/ଓ୍ବିକେଟ କିପର), ଦେବଦତ୍ତ ପାଦିକ୍କାଲ / ଧ୍ରୁଭ ଜୁରେଲ, ରିୟାନ ପାରାଗ, ଶିମ୍ରନ ହେଟମିୟର, ଜେସନ ହୋଲ୍ଡର, ରବିଚନ୍ଦ୍ରନ ଅଶ୍ୱିନ, ଟ୍ରେଣ୍ଟ ବୋଲ୍ଟ, କେଏମ ଆସିଫ, ୟୁଜଭେନ୍ଦ୍ର ଚହଲ ପ୍ରମୁଖ ରହିଛନ୍ତି।
ସେହିପରି ଦିଲ୍ଲୀ କ୍ୟାପିଟଲ ପ୍ଲେଇଙ୍ଗ ୧୧ରେ ପୃଥ୍ବୀ ଶ, ଡେଭିଡ ୱାର୍ନର (ଅଧିନାୟକ), ରେଲି ରୁଷୋ, ରୋଭମାନ ପାୱେଲ, ଅକ୍ଷର ପଟେଲ, ସରଫରାଜ ଖାନ / ୟଶ ଢୁଲ, ଅଭିଷେକ ପୋରେଲ (ଓ୍ବିକେଟ କିପର), ଅମାନ ହାକିମ ଖାନ, କୁଲଦୀପ ଯାଦବ, ଅନ୍ରିଚ ନର୍ଟେ, ମୁକେଶ କୁମାର ରହିଛନ୍ତି।
