ଉମରକୋଟ,୧।୨(ସ୍ବ.ପ୍ର.): ନବରଙ୍ଗପୁର ଜିଲା ଉମରକୋଟ ବ୍ଲକ କୁର୍ଶି ପଞ୍ଚାୟତ ତେଲାରି ଗ୍ରାମର ଅନ୍ତଃରାଷ୍ଟ୍ରୀୟ ଭାରୋତ୍ତୋଳନକାରୀ ଅରୁଣ ସାନ୍ତା। ଦେଶ ପାଇଁ ପ୍ରତିନିଧିତ୍ୱ କରି ଦୁଇଥର ସ୍ବର୍ଣ୍ଣ ପଦକ ହାସଲ କରିଛନ୍ତି। ଏହାଛଡ଼ା ଜାତୀୟସ୍ତରରେ ମଧ୍ୟ ତାଙ୍କ ନାମରେ ରହିଛି ଅନେକ ପଦକ। ଅଲିମ୍ପିକ ଖେଳି ଦେଶ ପାଇଁ ଆହୁରି ଗୌରବ ଆଣିବା ଥିଲା ତାଙ୍କ ଲକ୍ଷ୍ୟ। ଅର୍ଥାଭାବ ବେଳେ ସରକାରୀ ସହାୟତା ନ ମିଳିବାରୁ ଅଲିମ୍ପିକ ଖେଳିବା ସ୍ବପ୍ନ ତାଙ୍କର ଅଧୁରା ରହିଗଲା। ଜାତୀୟସ୍ତରରେ ବିଭିନ୍ନ ପ୍ରତିଯୋଗିତାରେ ଖେଳିବା ପାଇଁ ନିଜକୁ ପ୍ରସ୍ତୁତ କରୁଥିବାବେଳେ ଦାଉ ସାଧିଲା କରୋନା। ଭୁବନେଶ୍ୱର ଛାଡ଼ି ଏବେ ଗାଁରେ ନିଜ ଓ ଅନ୍ୟମାନଙ୍କ ଜମିରେ ଚାଷ କାମ କରୁଛନ୍ତି ଅରୁଣ। ସରକାରୀ ସହାୟତା ଯୋଗାଇ ଦେଲେ ସେ ପୁଣିଥରେ ଖେଳରେ ଆଗକୁ ବଢ଼ିପାରିବେ ବୋଲି କହିଛନ୍ତି।
ପ୍ରଥମରୁ ତୃତୀୟ ଶ୍ରେଣୀଯାଏ ଝରିଗାଁ ତାରାକାନାଡ ସ୍କୁଲରେ ଅରୁଣଙ୍କ ପାଠପଢା। ଚତୁର୍ଥରୁ ସପ୍ତମ ଶ୍ରେଣୀଯାଏ ବଡ଼ଭରଣ୍ଡି ଆଶ୍ରମ ବିଦ୍ୟାଳୟରେ ପାଠ ପଢ଼ିଥିଲେ। ସେହିଠାରୁ ବ୍ରହ୍ମପୁର ସ୍ପୋଟର୍ସ ହଷ୍ଟେଲରେ ରହି ଭାରୋତ୍ତୋଳନ ତାଲିମ ନେଇଥିଲେ। ସେଠାରୁ ସେ ଭାରୋତ୍ତୋଳନରେ ବିଭିନ୍ନ ଜାତୀୟ ଅନ୍ତଃଜାତୀୟ ପ୍ରତିଯୋଗିତାରେ ଭାଗନେଇଥିଲେ। ୨୦୧୨ରେ ମ୍ୟାନ୍ମାରରେ ଅନୁଷ୍ଠିତ ଏସିଆନ୍ ଚାମ୍ପିୟନଶିପ୍, ନ୍ୟୁଜିଲାଣ୍ଡରେ ହୋଇଥିବା କମନ୍ ଓ୍ବେଲ୍ଥ ଗେମ୍ରେ ତାଙ୍କୁ ସ୍ବର୍ଣ୍ଣ ପଦକ ମିଳିଥିଲା। ଏହାଛଡ଼ା ଜାତୀୟସ୍ତରରେ ଦିଲ୍ଲୀ, ହରିୟାଣା ଓ ମହାରାଷ୍ଟ୍ରରେ ଅନୁଷ୍ଠିତ ବିଭିନ୍ନ ପ୍ରତିଯୋଗିତାରେ ଅରୁଣ ସ୍ବର୍ଣ୍ଣ, ବ୍ରୋଞ୍ଜ ଭଳି ପଦକ ଜିତି ପାରିଥିଲେ। ଅଲିମ୍ପିକ ଖେଳିବା ତାଙ୍କର ଲକ୍ଷ୍ୟ ଥିଲା। କିନ୍ତୁ ସେହି ସମୟରେ ସରକାରୀ ସହାୟତା ମିଳି ନ ଥିବାରୁ ତାହା ସମ୍ଭବ ହେଲା ନାହିଁ ବୋଲି ଅରୁଣ କହିଛନ୍ତି। ଏହାପରେ କିଛି ଦିନ ଭୁବନେଶ୍ୱରର ଗୋଟିଏ ଜିମ୍ରେ କାମ କରିଥିଲି। ଜିମ୍ ବନ୍ଦ ହୋଇଯିବାରୁ ଲକ୍ଡାଉନ୍ରେ ଘରକୁ ଆସି ଚାଷକାମ କରୁଛି ବୋଲି ଅରୁଣ କହିଛନ୍ତି। ଉମରକୋଟରେ ଗୋଟିଏ ସ୍ପୋର୍ଟସ ଏକାଡେମୀ ଖୋଲିବାକୁ ଇଚ୍ଛା। କିନ୍ତୁ ସେଥିପାଇଁ ବହୁତ ଟଙ୍କା ଦରକାର। ଆମ ଅଞ୍ଚଳରେ ଅନେକ ପ୍ରତିଭାବାନ୍ ପିଲା ଅଛନ୍ତି। ତାଲିମ ମିଳିଲେ ଦେଶ ପାଇଁ ନାଁ କରିପାରିବେ। ମୁଁ ଖେଳ ପାଇଁ ସମୟ ଦେଇ ପାଠ ପଢି ପାରିଲି ନାହିଁ। କେନ୍ଦ୍ର କିମ୍ବା ରାଜ୍ୟ ସରକାର ସହାୟତା ଯୋଗାଇ ଦେଲେ ଖୁସି ହୋଇଥାଆନ୍ତି ବୋଲି ଅରୁଣ କହିଛନ୍ତି।
