କଟକ ଅଫିସ,୧୯।୮: କଟକ ବାଣିଜି୍ୟକ ଅଦାଲତରେ ମଙ୍ଗଳବାର ବ୍ୟାସକବି ଫକୀର ମୋହନ ସେନାପତିଙ୍କ ପାଣ୍ଡୁଲିପି ଛପା ମାମଲାର ଶୁଣାଣି ହୋଇଥିଲା। ଅଦାଲତର ସିନିୟର ସିଭିଲ ଜଜ୍ ବୁଧବାର ଏହାର ଶୁଣାଣି କରିଥିଲେ। ଏହି ମାମଲାର ଚୂଡାନ୍ତ ରାୟ ପ୍ରକାଶ ନ ପାଇବା ପର୍ଯ୍ୟନ୍ତ ଫକୀର ମୋହନଙ୍କ ଆତ୍ମଜୀବନୀ ପୁସ୍ତକ ‘ମୋ ଜୀବନୀ’ ପ୍ରକାଶ ନ କରିବାକୁ ପ୍ରତିପକ୍ଷଙ୍କୁ କୋର୍ଟ ଅନ୍ତରୀଣ ନିର୍ଦ୍ଦେଶ ଦେଇଛନ୍ତି।
ଆବେଦନକାରୀ ଡ. ମୀନାକ୍ଷୀ ଦତ୍ତ ପିଟିଶନରେ ଦର୍ଶାଇଛନ୍ତି, ସେ ସ୍ବର୍ଗତ ଫକୀର ମୋହନଙ୍କ ଅଣ ନାତୁଣୀ ଓ ଜନ୍ମବେଳୁ ତାଙ୍କ ଘରେ ରହିଆସୁଥିଲେ। ତେଣୁ ଫକୀର ମୋହନଙ୍କ ଲିଖିତ ସମସ୍ତ ଅସଲି ପାଣ୍ଡୁଲିପିର ସେ ହେଉଛନ୍ତି ସ୍ବତ୍ୱାଧିକାରୀ। ସେ ଫକୀର ମୋହନଙ୍କ ଜୀବନୀ ସମ୍ପର୍କିତ ତଥ୍ୟକୁ ଡିଜିଟାଲାଇଜେଶନ କରିବା ସହ ଜଣେ ପ୍ରକାଶକ ଯୋଗାଡ଼ କରିବାକୁ ଡ. ଦେବୀ ପ୍ରସନ୍ନ ପଟ୍ଟନାୟକଙ୍କୁ କହିଥିଲେ। କିନ୍ତୁ ତାଙ୍କ ବିନା ଅନୁମତିରେ ପଟ୍ଟନାୟକ ବ୍ୟାସକବିଙ୍କ ଆତ୍ମଜୀବନୀ ବହି ମାଧ୍ୟମରେ ପ୍ରକାଶ କରିବାକୁ ପ୍ରକ୍ରିୟା ଆରମ୍ଭ କରିଛନ୍ତି। ପରେ ସେ ଏହାକୁ ଚ୍ୟାଲେଞ୍ଜ କରି ଏକ ପିଟିଶନ କୋର୍ଟରେ ଦାଏର କରିଥିଲେ। ଗତ ୧୩ରେ ଏହି ମାମଲାର ଶୁଣାଣିବେଳେ ଉଭୟ ପକ୍ଷ ମତ ରଖିଥିଲେ। ପରେ ଗତ ୧୭ରେ ଏହାର ଶୁଣାଣିବେଳେ କୋର୍ଟ ଅନ୍ତରୀଣ ନିର୍ଦ୍ଦେଶ ଦେଇଥିଲେ। ଆଇନଜୀବୀ ଗୌତମ କୁମାର ଆଚାର୍ଯ୍ୟ ଏହି ମାମଲା ପରିଚାଳନା କରୁଛନ୍ତି।
