ନୂଆଦିଲ୍ଲୀ,୩୦।୧୧: ସଂସଦର ଶୀତକାଳୀନ ଅଧିବେଶନ ୪ ଡିସେମ୍ବରରେ ଆରମ୍ଭ ହେବାକୁ ଯାଉଛି। ଏହା ପୂର୍ବରୁ ସମସ୍ତ ରାଜ୍ୟସଭା ସଂସଦ ମାନଙ୍କ ପାଇଁ ନିର୍ଦେଶାବଳୀ ଜାରି ହୋଇଛି। ଏହି ନିର୍ଦେଶକୁ କଡ଼ାକଡ଼ି ପାଳନ କରିବାକୁ କୁହାଯାଇଛି। ନିର୍ଦେଶ ଅନୁଯାୟୀ ସଂସଦରେ ଉଠାଯାଉଥିବା ବିଷୟ ଗୁଡିକର ପ୍ରଚାର ପ୍ରସାର ନହେବା ଉଚିତ। ଯେପର୍ଯ୍ୟନ୍ତ ଅଧ୍ୟକ୍ଷ ନୋଟିସକୁ ସ୍ୱୀକୃତି ନଦେଇଛନ୍ତି, ସେ ପର୍ଯ୍ୟନ୍ତ ଏହାକୁ ଅନ୍ୟ ସଦସ୍ୟଙ୍କୁ ନକହିବା ପାଇଁ କୁହାଯାଇଛି। ଏହା ବ୍ୟତୀତ ନୋଟିସ ସାର୍ବଜନୀନ ନହେବା ଉଚିତ।
ଏଥିରେ ଏହାମଧ୍ୟ କୁହାଯାଇଛି ଯେ, ଗୃହରେ ଥ୍ୟାଙ୍କସ୍, ଥାଙ୍କୟୁ, ଜୟ ହିନ୍ଦ, ବନ୍ଦେ ମାତରମ ଭଳି ନାରା ଲାଗିବ ନାହିଁ। ଅଧ୍ୟକ୍ଷଙ୍କ ଦ୍ୱାରା ଦିଆଯାଇଥିବା ନିର୍ଦେଶ ଗୃହ ଭିତରେ କିମ୍ବା ବାହାରେ ସମାଲୋଚନା କରାଯିବା ଉଚିତ୍ ନୁହେଁ। ଏପ୍ରିଲ୍ ୨୦୨୨ ରେ ପ୍ରକାଶିତ ରାଜ୍ୟସଭା ସଦସ୍ୟଙ୍କ ପାଇଁ ପୁସ୍ତକରେ ଉଲ୍ଲେଖ କରାଯାଇଥିବା ସଂସଦର ପରମ୍ପରା ଏବଂ ପ୍ରକ୍ରିୟା ବିଷୟରେ ଏକ ସ୍ମାରକପତ୍ର ଦିଆଯାଇଛି। ଗୃହରେ ପ୍ଲାକାର୍ଡ ଦେଖାଇବା ଉପରେ ଏକ ନିଷେଧାଦେଶ ରହିଛି। ଚେୟାରମ୍ୟାନ୍ କହୁଥିବା ସମୟରେ କୌଣସି ସଦସ୍ୟ ଗୃହରୁ ବାହାରିବା ଉଚିତ୍ ନୁହେଁ। ଅଧ୍ୟକ୍ଷ କହୁଥିବାବେଳେ ଗୃହରେ ନୀରବ ରହିବା ଉଚିତ୍ ଭଳି ନିୟମ ରହିଛି।
