ପାରଳାଖେମୁଣ୍ଡି, ୯ା୧୧ (ଗିରିଧାରୀ ପରିଛା):ପାଖେଇ ଆସୁଛି ଆଲୋକର ପର୍ବ ଦୀପାବଳି। ରଙ୍ଗୀନ ଆଲୋକର ସଜା ସହିତ ପୂର୍ବ ପୁରୁଷଙ୍କ ଉଦ୍ଦେଶ୍ୟରେ ଦୀପ ଜାଳି ଶୁଭକାମନା କରନ୍ତି ଲୋକେ। ସମୟ ବଦଳିବା ସହ ଗ୍ରାହକଙ୍କ ଚାହିଦା ମଧ୍ୟ ବଦଳୁଛି। ଏବେ ମାଟି ଦୀପର ସ୍ଥାନ ନେଇଛି ଇଲେକ୍ଟ୍ରିଚ ଦୀପ, ଲିଚୁ । ତଥାପି ଦୀପାବଳି ପାଇଁ କୁମ୍ଭକାରମାନେ ଦୀପ ତିଆରି କରିବାରେ ଲାଗିଛନ୍ତି। ଦୁଇ ପଇସା ରୋଜଗାର କରି ପରିବାର ପୋଷଣ କରୁଥିବା ଏହି ଲୋକମାନେ ଏବେବି ଉଦ୍ୟମ ଜାରି ରଖିଛନ୍ତି। ଗଜପତି ଜିଲା ସଦର ମହକୁମା ପାରଳାଖେମୁଣ୍ଡିସ୍ତ କୁମ୍ଭକାର ସାହି ଠାରେ ପ୍ରାୟ ୫୦ ପରିବାର ରହୁଛନ୍ତି। ଆବଶ୍ୟକୀୟ କଞ୍ଚାମାଲର ଦର ବୃଦ୍ଧି ଯୋଗୁଁ କାରିଗରମାନେ ଚିନ୍ତାରେ। ଧିରେ ଧିରେ ମାଟି ତିଆରି ଜିନିଷର ଚାହିଦା କମିବାରେ ଲାଗିଛି। ଦିନ ଥିଲା କେବଳ ଦିପାବଳୀ ନୁହେଁ, ବର୍ଷ ତମାମ ଘର ପାଇଁ ଅନେକ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ଯଥା ମାଟି ହାଣ୍ଡି, ମାଟି ବେଲା, ରୂଖା, ବାସନ ଇତ୍ୟାଦି ବିକ୍ରି କରି ଗୁଜୁରାଣ ମେଣ୍ଟାଉଥିଲେ। ଆଉ ଦୀପାବଳି ଆସିଲେ ଭଲ ରୋଜଗାର ହେଉଥିଲା। କିନ୍ତୁ ଏବେ ଏହାର ଚାହିଦା କମି ଗଲାଣି। ସେହିପରି ମାଟି ଦୀପର ସ୍ଥାନ ନେଲାଣି ଚାଇନା ସାମଗ୍ରୀ। ଫଳରେ କୌଳିକ ବୃତ୍ତିଠାରୁ ଧୀରେ ଧୀରେ ଦୂରେଇଗଲେଣି କୁମ୍ଭକାର। ପରିବାରର ସଦସ୍ୟମାନେ ଭିଟାମାଟି ଛାଡି ଏବେ ଦାଦନ ଖଟିବାକୁ ବାହାର ରାଜ୍ୟ ଯାଉଥିବା ରାମଚନ୍ଦ୍ର ବେହେରା, ଯୁଗଳ ବେହେରା, ଶ୍ରୀଧର ବେହେରା ମଙ୍ଗଳା ବେହେରା, ଶ୍ୟାମ ବେହେରା ପ୍ରମୁଖ କହିଛନ୍ତି। ଅନ୍ୟପଟେ ଜିଲା ପ୍ରଶାସନ ପକ୍ଷରୁ ଯେଉଁଭଳି ପ୍ଲାଷ୍ଟର ଅଫ ପ୍ୟାରିସ ମୂର୍ତ୍ତିକୁ ବନ୍ଦ କରାଯାଇଛି ସେହିପରି କୁମ୍ଭକାରମାନଙ୍କ ପାଇଁ ମଧ୍ୟ ଇଲେକ୍ଟ୍ରି ଦୀପ ବଦଳରେ ମାଟି ଦୀପ ବ୍ୟବହାର କରିବା ପାଇଁ ଲୋକଙ୍କୁ ସଚେତନତା କରାଇବା ଆବଶ୍ୟକ ରହିଛି।
