ଅନୁଗୋଳ ଅଫିସ୍, ୩।୭
ରାଜ୍ୟ ଗ୍ରାମୀଣ ବିକାଶ ଅନୁଷ୍ଠାନ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଦ୍ୱାରା ଗୁରୁବାର ପୂର୍ବାହ୍ନରେ ଭିଡିଓ କନଫରେନ୍ସ ଜରିଆରେ କରୋନା ମୁକାବିଲା ପାଇଁ ଏକ ପ୍ରଶିକ୍ଷଣ କାର୍ଯ୍ୟକ୍ରମ ୱାସୱାନ ହଲ୍ରେ ଅନୁଷ୍ଠିତ ହୋଇଯାଇଛି। ବିଭିନ୍ନ ବିଭାଗର ଜିଲାସ୍ତରୀୟ ଅଧିକାରୀମାନେ ଯୋଗଦେଇ ପ୍ରଶିକ୍ଷଣ ନେଇଛନ୍ତି। ପଞ୍ଚାୟତସ୍ତରରେ କୋଭିଡ୍ କେୟାର ହୋମ୍ ଓ ଗ୍ରାମ୍ୟସ୍ତରରେ କୋଭିଡ୍ ପରିଚାଳନା କମିଟି ଗଠନ କରାଯାଇ ସଦସ୍ୟମାନଙ୍କୁ ତାଲିମ ପ୍ରଦାନ ଉପରେ ଆଲୋଚନା ହୋଇଥିଲା। ସହରାଞ୍ଚଳରେ ସଚେତକ ଆପ୍ ମାଧ୍ୟମରେ ଲୋକମାନଙ୍କୁ ସମସ୍ତ ପ୍ରକାର ସୁବିଧା ଓ କରୋନା ଚିକିତ୍ସା ସମ୍ପର୍କରେ ତଥ୍ୟ ଯୋଗାଇ ଦିଆଯିବ ବୋଲି ଏଥିରେ ନିଷ୍ପତ୍ତି ହୋଇଥିଲା। ପ୍ରବାସୀଙ୍କ ଫେରିବା ସଂଖ୍ୟା କମିଯାଇଥିବାରୁ ପଞ୍ଚାୟତରେ କୋଭିଡ୍ କେୟାର ହୋମ୍ କାର୍ଯ୍ୟକାରୀ ହେବ। ଏହା ମଧ୍ୟରେ କୌଣସି ପ୍ରବାସୀ ଆସିଲେ ପଞ୍ଚାୟତକୁ ନେଇ କ୍ଳଷ୍ଟରସ୍ତରରେ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ରଠାରେ ସେମାନେ ସଙ୍ଗରୋଧରେ ରହିବେ। ସେହିପରି ସହରାଞ୍ଚଳରେ କୋଭିଡ୍ ପରିଚାଳନା ପାଇଁ ୱାର୍ଡସ୍ତରୀୟ କମିଟି ଓ ରାଜସ୍ବ ଗ୍ରାମରେ ଗ୍ରାମ୍ୟସ୍ତରୀୟ କୋଭିଡ୍ ପରିଚାଳନା କମିଟି ଗଠନ ହେବ। ଗ୍ରାମ୍ୟସ୍ତରୀୟ କୋଭିଡ୍ ପରିଚାଳନା କମିଟିର କାର୍ଯ୍ୟ ସମୀକ୍ଷା ପାଇଁ ହୋଇଥିବା ବ୍ୟବସ୍ଥା ସମ୍ପର୍କରେ ରାଜ୍ୟ ପଞ୍ଚାୟତିରାଜ ଓ ପାନୀୟ ଜଳ ବିଭାଗର ପ୍ରମୁଖ ଶାସନ ସଚିବ ଡି. କେ. ସିଂହ, ନିର୍ଦ୍ଦେଶକ ରାଜ୍ୟ ଗ୍ରାମ୍ୟ ବିକାଶ ଅନୁଷ୍ଠାନ (ଏସ୍ଆଇଆର୍ଡି) ରାଜେଶ ପାଟିଲ ଓ ଯୁଗ୍ମ ନିର୍ଦ୍ଦେଶକ ସରୋଜ ଦାସଙ୍କ ସମେତ ବିଭାଗୀୟ କର୍ମକର୍ତ୍ତା ଓ ୟୁନିସେଫର କର୍ମଚାରୀ ଯୋଗଦେଇ ପ୍ରଶିକ୍ଷଣ ଦେଇଥିଲେ। ଜିଲାସ୍ତରରେ ଜିଲା ଗ୍ରାମ୍ୟ ଉନ୍ନୟନ ସଂସ୍ଥାର ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ ରାକେଶ କୁମାର କୁଣ୍ଡୁ ଏହି ଭିଡିଓ କନଫରେନ୍ସ ପରିଚାଳନା କରିଥିଲେ।
