ନୂଆଦିଲ୍ଲୀ, ୧୪।୯: ଦେଶରେ ବଢୁଥିବା ମୁଦ୍ରାସ୍ଫୀତି ସମ୍ପର୍କରେ ସରକାରଙ୍କ ମୁଖ୍ୟ ଅର୍ଥନୈତିକ ପରାମର୍ଶଦାତା(ସିଇଏ) କେ.ଭି. ସୁବ୍ରମଣ୍ୟନ ସୋମବାର ମତ ରଖିଛନ୍ତି। ସେ କହିଛନ୍ତି, ଆଗାମୀ ଦିନ ଗୁଡିକରେ ଦରଦାମ ନିୟନ୍ତ୍ରଣକୁ ଆସିବ। ଲକ୍ଡାଉନ କଟକଣା ଧୀରେ ଧୀରେ ଉଠୁଥିବାରୁ ଆଗାମୀ ଦିନରେ ସ୍ଥିତିରେ ସୁଧାର ଆସିବା ନେଇ ସେ ଆଶାବାଦି ରହିଛନ୍ତି। ସରକାରୀ ଡାଟା ଅନୁସାରେ ଜୁଲାଇରେ ଖୁଚୁରା ମୁଦ୍ରାସ୍ଫୀତି ୬.୯୩% ସ୍ତରରେ ରହିଛି। ସେହିଭଳି ପାଇକାରୀ ମୁଦ୍ରାସ୍ଫୀତି ୦.୫୮% ସ୍ତରକୁ ଖସିଛି। ଯୋଗାଣ ବାଧାପ୍ରାପ୍ତ ହେବାରୁ ଏହାର ପ୍ରଭାବ ବଜାର ଉପରେ ପଡିଛି। ବର୍ତ୍ତମାନ ଲକ୍ଡାଉନ ଉଠୁଥିବାରୁ ଆଗାମୀ ଦିନରେ ବଜାରରେ ଏଭଳି ସମସ୍ୟା ଦେଖାଯିବ ନାହିଁ। ବଜାରର ସ୍ଥିତି ସୁଧୁରିଲେ ଏହା ଦରଦାମ ନିୟନ୍ତ୍ରଣକୁ ଆସିବ ବୋଲି ସୁବ୍ରମଣ୍ୟନ ସୂଚନା ଦେଇଛନ୍ତି।
