ଢେଙ୍କାନାଳ ଅଫିସ, ୬ା୮
ବିମାନ ବନ୍ଦରର ଷ୍ଟାମ୍ପ କାଳି ପାଇଁ ହାତରେ ସୃଷ୍ଟି ହୋଇଛି ଗୁରୁତର ସଂକ୍ରମଣ। ଏପରି ଅଭିଯୋଗ ଆଣିଛନ୍ତି ଢେଙ୍କାନାଳ କାଲ୍ଟ୍ୟାକ୍ସ ଅଞ୍ଚଳର ଜୟନ୍ତୀ ମହାପାତ୍ର (୫୮)। ଗତ ଅଗଷ୍ଟ ୫ ସନ୍ଧ୍ୟା ପ୍ରାୟ ୭ଟା ୧୫ରେ ସେ ବାଙ୍ଗାଲୋରରୁ ବିମାନରେ ଆସି ଭୁବନେଶ୍ୱର ଏୟାରପୋର୍ଟରେ ଓହ୍ଲାଇଥିଲେ। ଗୋଡ଼ ଫ୍ୟାକ୍ଚର ହୋଇଥିବାରୁ ସେ ହୁଇଲ ଚେୟାରରେ ଆସୁଥିଲେ। ବିମାନ ବନ୍ଦରର କର୍ମଚାରୀମାନେ ତାଙ୍କ ଡାହାଣ ହାତରେ କୋଭିଡ୍-୧୯ ନିୟମ ଅନୁଯାୟୀ ଷ୍ଟାମ୍ପ୍ ଲଗାଇଥିଲେ। ସେଠାରୁ ଏକ ଗାଡ଼ିରେ ଜୟନ୍ତୀ ଢେଙ୍କାନାଳ ଆସିଥିଲେ। ଘରକୁ ଆସି ଦେଖିବା ବେଳକୁ ତାଙ୍କ ହାତରେ ସଂକ୍ରମଣ ହୋଇସାରିଥିଲା। ୬ ତାରିଖରୁ ଜଣେ ଡାକ୍ତରଙ୍କ ସହ ପରାମର୍ଶ କରି ସେ ଔଷଧ ସେବନ କରୁଛନ୍ତି। ବିମାନରେ ଆସୁଥିବା ଯାତ୍ରୀମାନେ ଏଥିପ୍ରତି ସତର୍କ ରହିବାକୁ ଜୟନ୍ତୀ ନିବେଦନ କରିଛନ୍ତି। ଏ ସମ୍ପର୍କରେ ସିଡିଏମ୍ଓ ଡା. ସୁଜାତାରାଣୀ ମିଶ୍ର କୁହନ୍ତି, ଏଭଳି ଘଟଣା ସେ ପ୍ରଥମ ଥର ଶୁଣୁଛନ୍ତି। ଯଦି ଏଭଳି କିଛି ହୋଇଛି, ତେବେ କେବଳ ଆଇସ୍କୁଲ ୱାଟରରେ ଧୋଇଲେ କ୍ଷତ ଉପଶମ ହୋଇଯିବ।
