ଇନ୍ଦୋର,୨୩।୬: ମଧ୍ୟପ୍ରଦେଶ ଇନ୍ଦୋର ଜିଲାର ସିମରୋଲ ଥାନା ଅଞ୍ଚଳରେ ଏକ ମର୍ମନ୍ତୁଦ ଦୁର୍ଘଟଣା ଘଟିଛି। ଗୁରୁବାର ଅପରାହ୍ନରେ ଏକ ଯାତ୍ରୀବାହୀ ବସ୍ ୫୦ଫୁଟ୍ ଘାଟିରୁ ତଳକୁ ଖସିପଡ଼ିଛି। ଏହି ଦୁର୍ଘଟଣାରେ ୫ଜଣଙ୍କ ମୃତ୍ୟୁ ହୋଇଥିବା ବେଳେ ୪୦ରୁ ଊର୍ଦ୍ଧ୍ୱ ଯାତ୍ରୀ ଆହତ ହୋଇଛନ୍ତି। ସେଥିମଧ୍ୟରୁ ୧୦ଜଣଙ୍କ ଅବସ୍ଥା ଗୁରୁତର ରହିଛି ବୋଲି ଇନ୍ଦୋର ପୋଲିସ ପକ୍ଷରୁ ସୂଚନା ଦିଆଯାଇଛି। ଘଟଣାସ୍ଥଳରେ ପୋଲିସ ପହଞ୍ଚି ସ୍ଥାନୀୟ ଲୋକଙ୍କ ସହାୟତାରେ ଉଦ୍ଧାର କାର୍ଯ୍ୟ ଜାରି ରହିଛି। ସୂଚନାଯୋଗ୍ୟ, ଯାତ୍ରୀବାହୀ ବସ୍ଟି ଇନ୍ଦୋରରୁ ଖଣ୍ଡଓ୍ବା ଯାଉଥିଲା। ସିମରୋଲ ଥାନା ଅଞ୍ଚଳର ଭୈରବ ଘାଟି ନିକଟରେ ବସ୍ଟି ଭାରସାମ୍ୟ ହରାଇ ୫୦ଫୁଟ ତଳକୁ ଖସିପଡ଼ିଥିଲା। ଫଳରେ ବସ୍ ତଳେ ଚାପି ହୋଇ ଘଟଣାସ୍ଥଳରେ ୫ଜଣ ମୃତ୍ୟୁ ହୋଇଥିବା ବେଳେ ୪୦ଯାତ୍ରୀ ଆହତ ହୋଇଛନ୍ତି। ଆହତମାନଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ଉକ୍ତ ବସ୍ରେ ୫୦ରୁ ୬୦ଯାତ୍ରୀ ଥିବା ସୂଚନା ମିଳିଛି।
