ଯୋଧପୁର,୩।୧୦ : ବାୟୁସେନାରେ ଆନୁଷ୍ଠାନିକ ଭାବରେ ବିକଶିତ ଲାଇଟ କମ୍ବାଟ ହେଲିକପ୍ଟର (ଏଲସିଏଚ)କୁ ସୋମବାର ସାମିଲ ହୋଇଛି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ, ବାୟୁସେନା ମୁଖ୍ୟ ମାର୍ଶଲ ଭି.ଆର ଚୌଧୁରୀଙ୍କ ଉପସ୍ଥିତିରେ ଯୋଧପୁରର ବାୟୁସେନା ଷ୍ଟେଶନରେ ଆୟୋଜିତ ହୋଇ ଥିବା କାର୍ଯ୍ୟକ୍ରମରେ ଏଲସିଏଚ ବାୟୁସେନାରେ ସାମିଲ ହୋଇଛି।
ଏହା ବାୟୁସେନାର ଶକ୍ତିକୁ ଆହୁରି ବୃଦ୍ଧି କରିବ। ଏହି ବହୁମୁଖୀ ହେଲିକପ୍ଟର ଏକାଧିକ କ୍ଷେପଣାସ୍ତ୍ର ନିକ୍ଷେପ କରିବାରେ ଏବଂ ଅନ୍ୟ ଅସ୍ତ୍ରଶସ୍ତ୍ର ବ୍ୟବହାର କରିବାରେ ସକ୍ଷମ। ସାର୍ବଜନୀନ କ୍ଷେତ୍ରର କାର୍ଯ୍ୟ କରୁଥିବା ହିନ୍ଦୁସ୍ତାନ ଏରୋନେଟିକ୍ସ ଲିମିଟେଡ (ଏଚଏଏଲ) ଦ୍ୱାରା ଏହା ବିକଶିତ ହୋଇଛି। ଏହାକୁ ମୁଖ୍ୟତଃ ଉଚ୍ଚ ଉଚ୍ଚତା ଅଞ୍ଚଳରେ ନିୟୋଜିତ ହେବା ପାଇଁ ପରିକଳ୍ପନା କରାଯାଇଛି। ୫.୮ ଟନ ଓଜନ ବିଶିଷ୍ଟ ଏହି ହେଲିକପ୍ଟରରେ ଦୁଇଟି ଇଞ୍ଜିନ ରହିଛି। ପୂର୍ବରୁ ବହୁ ଅସ୍ତ୍ରଶସ୍ତ୍ର ଏହା ମାଧ୍ୟମରେ ବ୍ୟବହାର କରାଯାଇସାରିଛି।
ଚଳିତ ବର୍ଷ ମାର୍ଚ୍ଚରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ସୁରକ୍ଷା କ୍ୟାବିନେଟ କମିଟି (ସିସିଏସ) ୩,୮୮୭ କୋଟି ଟଙ୍କାରେ ୧୫ଟି ସ୍ବଦେଶୀ ଏଲସିଏଚ କ୍ରୟକୁ ଅନୁମୋଦନ କରିଛି। ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ଏହି ହେଲିକପ୍ଟର ମଧ୍ୟରୁ ୧୦ ଟି ବାୟୁସେନା ଏବଂ ପାଞ୍ଚଟି ସ୍ଥଳସେନା ପାଇଁ କାର୍ଯ୍ୟକରିବ। ଅଧିକାରୀ କହିଛନ୍ତି ଯେଏହା ଆଡଭାନ୍ସ ଲାଇଟ ହେଲିକପ୍ଟର ଧ୍ରୁବ ସହ ସମାନ।
ଏହାର ଷ୍ଟିଲଥ୍ ବୈଶିଷ୍ଟ୍ୟ, ବିକଶିତ ସୁରକ୍ଷା ବ୍ୟବସ୍ଥା, ରାତ୍ରି କାଳୀନ ଆକ୍ରମଣ ଏବଂ ଜରୁରୀକାଳୀନ ଅବତରଣ କ୍ଷମତା ରହିଛି। ହାଲୁକା ହୋଇଥିବାରୁ ଏହା କ୍ଷେପଣାସ୍ତ୍ର ଏବଂ ଅନ୍ୟାନ୍ୟ ଅସ୍ତ୍ରଶସ୍ତ୍ର ସହିତ ଉଚ୍ଚ ଉଚ୍ଚତା ଅଞ୍ଚଳରେ ଆରାମରେ କାର୍ଯ୍ୟ କରିପାରିବାକୁ ସକ୍ଷମ।
ପ୍ରତିରକ୍ଷା ମନ୍ତ୍ରଣାଳୟ ଅନୁଯାୟୀ ଏହି ହେଲିକପ୍ଟରଗୁଡିକରେ ୪୫ ପ୍ରତିଶତ ସ୍ବଦେଶୀ ଉପକରଣ ବ୍ୟବହୃତ ହୋଇଛି। ଯାହା ପରବର୍ତ୍ତୀ ସଂସ୍କରଣରେ ୫୫ ପ୍ରତିଶତକୁ ବୃଦ୍ଧି କରାଯିବ।
