ନୂଆଦିଲ୍ଲୀ,୧୬।୧ : ଧନୀ ଏବଂ ଗରିବଙ୍କ ମଧ୍ୟରେ ପାର୍ଥକ୍ୟକୁ ନେଇ ଦୁନିଆରେ ଏକ ଦୀର୍ଘ ବିତର୍କ ଚାଲିଛି। ତେବେ ଭାରତ ପରି ବିକଶିତ ଦେଶରେ ମଧ୍ୟ ଏହି ବ୍ୟବଧାନ କ୍ରମାଗତ ଭାବେ ବୃଦ୍ଧି ପାଉଛି। ଅକ୍ସଫାମର ରିପୋର୍ଟରେ ଏହା ପ୍ରକାଶ ପାଇଛି।
ଏହି ରିପୋର୍ଟ ଅନୁଯାୟୀ, ଭାରତର ୨୧ ଧନ କୁବେରଙ୍କ ପାଖରେ ଗଦାଗଦା ଧନ ରହିଛି। ସେମାନଙ୍କ ପାଖରେ ଦେଶର ୭୦ କୋଟି ଲୋକଙ୍କ ତୁଳନାରେ ଅଧିକ ସମ୍ପତ୍ତି ଅଛି।
ରିପୋର୍ଟରେ ଦର୍ଶାଯାଇଛି ଯେ ୨୦୨୦ରେ କରୋନା ମହାମାରୀ ଆରମ୍ଭରୁ ନଭେମ୍ବର ୨୦୨୧ ପର୍ଯ୍ୟନ୍ତ ଯେଉଁଠାରେ ଅଧିକାଂଶ ଭାରତୀୟ ଚାକିରୀ ସମସ୍ୟାର ସମ୍ମୁଖୀନ ହୋଇଥିଲେ ଏବଂ ସଞ୍ଚୟ କରିବାକୁ ସଂଘର୍ଷ କରିଥିଲେ, ସେତେବେଳେ ଭାରତୀୟ ଧନ କୁବେରଙ୍କ ସମ୍ପତ୍ତିରେ ଗତ ବର୍ଷ ନଭେମ୍ବର ପର୍ଯ୍ୟନ୍ତ ୧୨୧ ପ୍ରତିଶତ ବୃଦ୍ଧି ପରିଲକ୍ଷିତ ହୋଇଥିଲା।
କରୋନା ମହାମାରୀ ସମୟରେ ମଧ୍ୟ ଭାରତର କୋଟିପତିଙ୍କ ସମ୍ପତ୍ତି ଦିନକୁ ୩ ହଜାର ୬୦୮ କୋଟି ଟଙ୍କା ବୃଦ୍ଧି ପାଇଛି।
ରିପୋର୍ଟ ଅନୁଯାୟୀ, ୨୦୨୧ ମସିହାରେ ଭାରତର ପାଞ୍ଚ ପ୍ରତିଶତ ଲୋକ ଦେଶର ମୋଟ ସମ୍ପତ୍ତିର ୬୨ ପ୍ରତିଶତ ଅଧିକାରରେ ଥିଲେ। ଏଥି ସହିତ ଭାରତର ଜନସଂଖ୍ୟାର ୫୦ ପ୍ରତିଶତ ଲୋକଙ୍କ ପାଖରେ ଦେଶର ସମ୍ପତ୍ତିର ମାତ୍ର ତିନି ପ୍ରତିଶତ ରହିଛି। ଅକ୍ସଫାମ ରିପୋର୍ଟ ସରଭାଈବଲ ଅଫ ଦ ରିଚେଷ୍ଟ: ଦ ଇଣ୍ଡିଆନ ଷ୍ଟୋରୀ ଅନୁଯାୟୀ ୨୦୨୦ ରେ ଭାରତରେ ଧନକୁବେରଙ୍କ ସଂଖ୍ୟା ୧୦୨ଥିଲା। 2022 ମସିହାରେ ଏହି ସଂଖ୍ୟା ୧୬୬ରେ ପହଞ୍ଚିଛି। ସୋମବାର ସ୍ବିଜରଲାଣ୍ଡର ଡାଭୋସରେ ଆୟୋଜିତ ହେବାକୁ ଥିବା ବିଶ୍ୱ ଅର୍ଥନୈତିକ ଫୋରମ ରେ ଏହି ରିପୋର୍ଟ ଉପସ୍ଥାପିତ ହେବ।
