ନୂଆଦିଲ୍ଲୀ,୩୦।୧୨: ଆର୍ଟିଫିସିଆଲ୍ ଇଣ୍ଟେଲିଜେନ୍ସ (AI) ସାହାଯ୍ୟରେ କମ୍ ପରିଶ୍ରମରେ କୋଟି କୋଟି ଟଙ୍କା ରୋଜଗାର କରାଯାଇପାରେ, ଏହା ପ୍ରମାଣ କରିଛି ଭାରତର ଏକ ୟୁଟ୍ୟୁବ୍ ଚ୍ୟାନେଲ। ଭିଡିଓ ଏଡିଟିଂ ଫାର୍ମ ‘କାପୱିଙ୍ଗ’ର ଏକ ରିପୋର୍ଟ ଅନୁଯାୟୀ, ‘ବନ୍ଦର ଆପନା ଦୋସ୍’ (Bandar Apna Dost) ନାମକ ଏକ ଭାରତୀୟ ଚ୍ୟାନେଲ କେବଳ AI ଦ୍ୱାରା ପ୍ରସ୍ତୁତ ନିମ୍ନମାନର କଣ୍ଟେଣ୍ଟ ଜରିଆରେ ବାର୍ଷିକ ପ୍ରାୟ ୩୫ ରୁ ୩୮ କୋଟି ଟଙ୍କା ($4.25 Million) ରୋଜଗାର କରୁଛି।
ଏହି ଚ୍ୟାନେଲରେ AI ଦ୍ୱାରା ପ୍ରସ୍ତୁତ ଏକ ମାଙ୍କଡ ଏବଂ ହଲ୍କ (Hulk) ଭଳି ଦିଶୁଥିବା ଏକ ମାଂସପେଶୀ ବହୁଳ ଚରିତ୍ରର କାହାଣୀ ଦର୍ଶାଯାଇଛି। ଏଥିରେ ଚରିତ୍ରଗୁଡ଼ିକ ଅସୁରମାନଙ୍କ ସହ ଲଢ଼ୁଥିବାର ଦେଖିବାକୁ ମିଳେ।
ଏହି ଚ୍ୟାନେଲ ବର୍ତ୍ତମାନ ସୁଦ୍ଧା ୨.୪ ବିଲିୟନରୁ ଅଧିକ ଭ୍ୟୁ ହାସଲ କରିସାରିଛି। ଆସାମର ସୁରଜିତ କର୍ମକାର ଏହାକୁ ୨୦୨୦ରେ ଆରମ୍ଭ କରିଥିଲେ ମଧ୍ୟ ଗତ ୫-୬ ମାସ ମଧ୍ୟରେ ଏହା ଅପାର ସଫଳତା ପାଇଛି।
ଏହାକୁ ‘AI Slop’ କୁହାଯାଉଛି କାରଣ ଏହି ଭିଡିଓଗୁଡ଼ିକ ଅତି ସହଜରେ AI ସାହାଯ୍ୟରେ ପ୍ରସ୍ତୁତ ଏବଂ ଏଥିରେ କୌଣସି ଗଭୀର କାହାଣୀ ବା ଉଚ୍ଚମାନର ନିର୍ମାଣ ଶୈଳୀ ନାହିଁ।
ରିପୋର୍ଟ ଅନୁଯାୟୀ, ବିଶ୍ୱର ପ୍ରାୟ ୨୭୮ଟି ଚ୍ୟାନେଲ ସମ୍ପୂର୍ଣ୍ଣ ଭାବେ ଏଭଳି AI କଣ୍ଟେଣ୍ଟ ଉପରେ ନିର୍ଭରଶୀଳ। ସବୁଠାରୁ ଚିନ୍ତାଜନକ ବିଷୟ ହେଉଛି ଯେ, ୟୁଟ୍ୟୁବ୍ର ରେକମେଣ୍ଡେସନ୍ ସିଷ୍ଟମ୍ ନୂଆ ବ୍ୟବହାରକାରୀଙ୍କ ପାଖକୁ ମଧ୍ୟ ଏହି ଭିଡିଓଗୁଡ଼ିକୁ ବହୁଳ ମାତ୍ରାରେ ପଠାଉଛି। ଏକ ପରୀକ୍ଷାରୁ ଜଣାପଡ଼ିଛି ଯେ, ପ୍ରଥମ ୫୦୦ଟି ସଜେଷ୍ଟେଡ୍ ଭିଡିଓ ମଧ୍ୟରୁ ୨୦ ପ୍ରତିଶତରୁ ଅଧିକ କେବଳ ଏହି ‘AI Slop’ ଶ୍ରେଣୀର।
ଏହି ପ୍ରସଙ୍ଗରେ ୟୁଟ୍ୟୁବ୍ ପକ୍ଷରୁ କୁହାଯାଇଛି ଯେ, AI ଏକ ଉପକରଣ ମାତ୍ର। କଣ୍ଟେଣ୍ଟ ଯେମିତି ବି ତିଆରି ହେଉ, ଏହା ୟୁଟ୍ୟୁବ୍ର ନିୟମାବଳୀ ପାଳନ କରିବା ଜରୁରୀ। ତଥାପି, ନିମ୍ନମାନର ଏବଂ ବିଭ୍ରାନ୍ତିକର କଣ୍ଟେଣ୍ଟ ଉପରେ ପ୍ଲାଟଫର୍ମ କଡ଼ା ନଜର ରଖିଛି ବୋଲି ସ୍ପଷ୍ଟ କରିଛି।
