ଭୁବନେଶ୍ୱର, ୧୨।୩(ବ୍ୟୁରୋ): ଓଡ଼ିଶାର ନାଁ ରଖିଲେ ଓଡ଼ିଆ ବୈଜ୍ଞାନିକ ଜ୍ୟୋତିର୍ମୟୀ ମହାନ୍ତି। ଅନ୍ତର୍ଜାତୀୟ ସ୍ତରରେ ସମ୍ମାନ ପାଇଁ ମନୋନୀତ ହେବା ପରେ ଓଡ଼ିଶା ତାଙ୍କ ପାଇଁ ଗର୍ବ ଅନୁଭବ କରୁଛି। ଜ୍ୟୋତିର୍ମୟୀ ରସାୟନ ବିଜ୍ଞାନ ବା କେମିକାଲ ଇଞ୍ଜିନିୟରିଂ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଇଣ୍ଟରନ୍ୟାଶନାଲ ୟୁନିଅନ ଅଫ୍ ପିୟୋର ଆଣ୍ଡ୍ ଆପ୍ଲାଏଡ୍ କେମିଷ୍ଟ୍ରି (ଆଇୟୁପିଏସି) ପୁରସ୍କାର ପାଇବା ପାଇଁ ମନୋନୀତ ହୋଇଛନ୍ତି। ମୁମ୍ବାଇ ଭାବା ଅଟୋମିକ୍ ରିସର୍ଚ୍ଚ ସେଣ୍ଟରରେ ବର୍ତ୍ତମାନ ବୈଜ୍ଞାନିକ ଥିବା ଜ୍ୟୋତିର୍ମୟୀ ଭାରତର ପ୍ରଥମ ମହିଳା ଭାବେ ଏହି ପୁରସ୍କାର ପାଇଁ ମନୋନୀତ ହୋଇଥିବା ଜଣାପଡ଼ିଛି। ଅନ୍ତର୍ଜାତୀୟ ମହିଳା ଦିବସ ପାଳନ ଅବସରରେ ଆଇୟୁପିଏସି ଶନିବାର ଜ୍ୟୋତିର୍ମୟୀଙ୍କ ସମେତ ୧୨ଜଣ ମନୋନୀତ ପ୍ରାର୍ଥୀଙ୍କ ନାମ ଘୋଷଣା କରିଥିଲା।
ସୂଚନାଯୋଗ୍ୟ, ଜ୍ୟୋତିର୍ମୟୀ ସାଇନ୍ସ ଆଣ୍ଡ୍ ଇିନିୟରିଂ ରିସର୍ଚ୍ଚ ବୋର୍ଡରେ ଫେଲୋସିପ ପାଇବାରେ ପ୍ରଥମ ମହିଳା ଥିଲେ। ସେହିପରି ଗତବର୍ଷ ସେ ବ୍ରିଟେନରେ ରୟାଲ ସୋସାଇଟି ଅଫ୍ କେମିଷ୍ଟ୍ରି ସମ୍ମାନ ପାଇଥିଲେ। କଟକ ଚାଉଳିଆଗଞ୍ଜର ବିଶିଷ୍ଟ ଶିଶୁରୋଗ ବିଶେଷଜ୍ଞ ଡା. ବୈକୁଣ୍ଠନାଥ ପାତ୍ରଙ୍କ ଝିଅ ଜ୍ୟୋତିର୍ମୟୀ ଜଗତ୍ସିଂହପୁରର ରଶ୍ମିରଞ୍ଜନ ମହାନ୍ତିଙ୍କୁ ବିବାହ କରିଛନ୍ତି। ରଶ୍ମିରଞ୍ଜନ ମଧ୍ୟ ଜଣେ ବୈଜ୍ଞାନିକ।
