ନୂଆଦିଲ୍ଲୀ,୪।୫: ଇଣ୍ଡିଆନ ପ୍ରିମିୟର ଲିଗ (ଆଇପିଏଲ)ରେ ଚେନ୍ନାଇ ସୁପର କିଙ୍ଗ୍ସ ଏବଂ (ସିଏସକେ) ଏବଂ ରାଜସ୍ଥାନ ରୟାଲ୍ସ ମଧ୍ୟରେ ବୁଧବାର ଖେଳାଯିବାକୁ ଥିବା ମ୍ୟାଚ ବାତିଲ ହୋଇଛି। ଚେନ୍ନାଇ ବୋଲିଂ କୋଚ ଏଲ ବାଲାଜୀ କୋଭିଡ ପଜିଟିଭ ବୋଲି ଜଣାପଡିବା ପରେ ମ୍ୟାଚକୁ ବାତିଲ କରାଯାଇଛି। ବୋର୍ଡର ଷ୍ଟାଣ୍ଡାର୍ଡ ଅପରେଟିଂ ପ୍ରୋସିସର୍ (ଏସଓପି) ଅନୁଯାୟୀ, ଯଦି କୌଣସି ବ୍ୟକ୍ତି ସଂକ୍ରମିତ ବ୍ୟକ୍ତିଙ୍କ ସଂସ୍ପର୍ଶରେ ଆସନ୍ତି, ତେବେ ତାଙ୍କୁ ୬ ଦିନ ଅଲଗା ହେବାକୁ ପଡ଼ିବ ଏବଂ ଏହି ସମୟ ମଧ୍ୟରେ ତାଙ୍କ ଆରଟିପିସିଆର ତିନିଟି ରିପୋର୍ଟ ନେଗେଟିଭ୍ ହେବା ଉଚିତ୍।
ଦଳର ସମସ୍ତ ଖେଳାଳି ଆଇସୋଲେଟରେ ଅଛନ୍ତି। କ୍ରିକେଟ ବୋର୍ଡ ଅଫ ଇଣ୍ଡିଆ (ବିସିସିଆଇ) ର ଜଣେ ଅଧିକାରୀ କହିଛନ୍ତି ଯେ ବୁଧବାର ଅରୁଣ ଜେଟଲୀ ଷ୍ଟାଡିୟମରେ ସିଏସକେ ଏବଂ ରୟାଲ୍ସ ମଧ୍ୟରେ ମ୍ୟାଚ ବାତିଲ ହୋଇଛି। ଏସଓପି ନିୟମ ଅନୁଯାୟୀ ପରବର୍ତ୍ତୀ ସମୟରେ ଏହି ମ୍ୟାଚ୍ ଅନୁଷ୍ଠିତ ହେବ। ବାଲାଜୀ ସମସ୍ତ ଖେଳାଳିଙ୍କ ସଂସ୍ପର୍ଶରେ ଆସିଥିଲେ ଏବଂ ସେଥିପାଇଁ ସମସ୍ତଙ୍କୁ ଆଇସୋଲେଟରେ ରହିବାକୁ ପଡିବ। ଦ୍ୱିତୀୟ ଥର ପାଇଁ ମ୍ୟାଚ ବାତିଲ କରାଯାଇଥିଲା। ଏହି ଦୁଇଟି ମ୍ୟାଚ୍ର କାର୍ଯ୍ୟସୂଚୀ ପୁନଃନିର୍ଦ୍ଧାରିତ ହେବ। ଏହାପୂର୍ବରୁ ସୋମବାର ଦିନ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଏବଂ କୋଲକାତା ନାଇଟ ରାଇଡର୍ସ ମ୍ୟାଚ୍ ବାତିଲ ହୋଇଥିଲା। କୋଲକାତା ନାଇଟ ରାଇଡର୍ସର ଖେଳାଳି ବରୁଣ ଚକ୍ରବର୍ତ୍ତୀ ଏବଂ ସନ୍ଦୀପ ୱାରିୟର କରୋନା ଆକ୍ରାନ୍ତ ହେବା ପରେ ମ୍ୟାଚ୍ ସ୍ଥଗିତ ରଖାଯାଇଥିଲା।
