ନୂଆଦିଲ୍ଲୀ,୧୧ା୧୦: ପୃଥିବୀ ଏବଂ ପରିବେଶ ପାଇଁ ଭାରତୀୟ ଖାଦ୍ୟ ବ୍ୟବସ୍ଥା ବିଶ୍ୱରେ ସର୍ବୋତ୍ତମ। ଗୁରୁବାର ଓ୍ବାଲର୍ଡ ଓ୍ବାଇଡ୍ ଫଣ୍ଡ୍ ଫର୍ ନେଚର(ଡବ୍ଲ୍ୟୁଡବ୍ଲ୍ୟୁଏଫ୍) ଦ୍ୱାରା ପ୍ରକାଶିତ ଲିଭିଂ ପ୍ଲାନେଟ୍ ରିପୋର୍ଟ-୨୦୨୪ କହିଛି ଯେ, ଭାରତୀୟଙ୍କ ଖାଇବା ଅଭ୍ୟାସ ଗ୍ରୀନ୍ ହାଉସ ଗ୍ୟାସ ନିର୍ଗମନକୁ ହ୍ରାସ କରିଥାଏ।
ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, ଯଦି ସମସ୍ତ ଦେଶ ଭାରତର ଢାଞ୍ଚା ଗ୍ରହଣ କରନ୍ତି, ତେବେ ୨୦୫୦ସୁଦ୍ଧା ପୃଥିବୀରେ ହୋଇଥିବା କ୍ଷତି ଯଥେଷ୍ଟ ହ୍ରାସ ପାଇବ। ଭାରତ ପରେ ଇଣ୍ଡୋନେସିଆ, ଚାଇନା, ଜାପାନ ଏବଂ ସାଉଦି ଆରବ ସର୍ବୋତ୍ତମ ଖାଦ୍ୟ ବ୍ୟବସ୍ଥା ମଧ୍ୟରେ ସ୍ଥାନ ପାଇଛନ୍ତି। ରିପୋର୍ଟରେ ଆର୍ଜେଣ୍ଟିନା, ଅଷ୍ଟ୍ରେଲିଆ ଏବଂ ଆମେରିକାର ଖାଇବା ଶୈଳୀକୁ ସବୁଠାରୁ ଖରାପ ବୋଲି ବର୍ଣ୍ଣନା କରାଯାଇଛି। ଏହି ରିପୋର୍ଟରେ ଭାରତର ମିଲେଟ ମିଶନ (ନ୍ୟାଶନାଲ ମିଲେଟ ମିଶନ)କୁ ବିଶେଷ ଭାବେ ଉଲ୍ଲେଖ କରାଯାଇଛି। ଡବ୍ଲ୍ୟୁଡବ୍ଲ୍ୟୁଏଫ୍ ଜଙ୍ଗଲ ସମ୍ବଳ ସଂରକ୍ଷଣ ଏବଂ ପରିବେଶ ଉପରେ ମାନବ ପ୍ରଭାବକୁ ହ୍ରାସ କରିବା ପାଇଁ କାର୍ଯ୍ୟ କରେ। ୧୯୬୧ରେ ସ୍ବିଜରଲାଣ୍ଡରେ ଏହି ଅନୁଷ୍ଠାନ ପ୍ରତିଷ୍ଠା କରାଯାଇଥିଲା।
ଯଦି ସମସ୍ତ ଦେଶ ଭାରତର ଖାଦ୍ୟ ପଦ୍ଧତି ଗ୍ରହଣ କରନ୍ତି, ତେବେ ୨୦୫୦ ସୁଦ୍ଧା ପୃଥିବୀରେ ୮୪ ପ୍ରତିଶତ ଉତ୍ସ ଆମର ଆବଶ୍ୟକତା ପୂରଣ ପାଇଁ ଯଥେଷ୍ଟ ହେବ। ଏହାର ଅର୍ଥ ହେଉଛି ୧୬ ପ୍ରତିଶତ ସମ୍ବଳ ବ୍ୟବହାର ହେବ ନାହିଁ। ଏହା ବିଶ୍ୱର ତାପମାତ୍ରାକୁ ମଧ୍ୟ ହ୍ରାସ କରିବ ଏବଂ ପରିବେଶର ସନ୍ତୁଳନକୁ ସୁଦୃଢ଼ କରିବ। ଆମେ ଆମର ୧.୫ଡିଗ୍ରୀ ସେଲ୍ସିୟସ ଲକ୍ଷ୍ୟଠାରୁ ବହୁତ କମ ଉତ୍ତାପ ନିର୍ଗତ କରିବୁ। ଏହା ପରିବେଶରେ ଉନ୍ନତି ଆଣିବ। ଯଦି ବିଶ୍ୱ ଆର୍ଜେଣ୍ଟିନାର ବ୍ୟବହାର ପଦ୍ଧତିକୁ ଗ୍ରହଣ କରେ ତେବେ ଏହା ସର୍ବାଧିକ ୭.୪ ପୃଥିବୀ ଆବଶ୍ୟକ କରେ।
ରିପୋର୍ଟରେ କୁହାଯାଇଛି, ଯଦି ସମଗ୍ର ବିଶ୍ୱ ଜି-୨୦ ଦେଶ ଭଳି ବଡ଼ ଦେଶର ଖାଦ୍ୟ ନମୁନା ଗ୍ରହଣ କରେ, ତେବେ ୨୦୫୦ ସୁଦ୍ଧା ଆମର ଆବଶ୍ୟକତା ପୂରଣ କରିବା ପାଇଁ ୭ଟି ପୃଥିବୀ ଆବଶ୍ୟକ ହେବ। ଏହା ୨୬୩ ପ୍ରତିଶତ ଅଧିକ ବିଶ୍ୱ ତାପମାତ୍ରା ସୃଷ୍ଟି କରିବ।
ଜଳବାୟୁ ଅନୁକୂଳ ମିଲେଟକୁ ପ୍ରୋତ୍ସାହିତ କରିବା ପାଇଁ ଭାରତର ଉଦ୍ୟମକୁ ଏହି ରିପୋର୍ଟରେ ପ୍ରଶଂସା କରାଯାଇଛି। ମିଲେଟ ସ୍ବାସ୍ଥ୍ୟ ପାଇଁ ଉତ୍ତମ ଏବଂ ଜଳବାୟୁ ପରିବର୍ତ୍ତନ ପାଇଁ ଅତ୍ୟନ୍ତ ସନ୍ତୁଳିତ। ଅଧିକ ସ୍ଥାୟୀ ଖାଦ୍ୟ ଖାଇବା ଦ୍ୱାରା ଚାଷର ଖାଦ୍ୟ ଉତ୍ପାଦନ ଆବଶ୍ୟକତା ହ୍ରାସ ପାଇବ ବୋଲି ରିପୋର୍ଟରେ କୁହାଯାଇଛି। ଏହା ଚାରଣଭୂମି ସଂଖ୍ୟା ଏବଂ କ୍ଷେତ୍ର ବୃଦ୍ଧି କରିବ। ଅଙ୍ଗାରକାମ୍ଳ ନିର୍ଗମନ ସହିତ ଏହା ମୁକାବିଲା କରିବାରେ ସହାୟକ ହେବ।
