ନୂଆଦିଲ୍ଲୀ,୧୪।୧: ୟୁକ୍ରେନ୍ ବିରୋଧରେ ରୁଷିଆ ପାଖାପାଖି ୩ ବର୍ଷ ହେଲା ଯୁଦ୍ଧ ଚଳାଇଛି। ରୁଷିଆ ସେନାରେ ନିୟୋଜିତ ହୋଇ ଯୁଦ୍ଧ କରୁଥିବା କେତେଜଣ ଭାରତୀୟ ଯୁବକ ଇତିମଧ୍ୟରେ ପ୍ରାଣ ହରାଇଲେଣି। ଭାରତୀୟମାନଙ୍କୁ ଫେରାଇ ଆଣିବା ପାଇଁ ସମ୍ପର୍କୀୟମାନଙ୍କ ଆକୁଳ ନିବେଦନ ସତ୍ତ୍ୱେ ବିଶେଷ ସୁଫଳ ମିଳିନାହିଁ। ଅଧିକ ବେତନ ଓ ଅନ୍ୟାନ୍ୟ ସୁବିଧା ପାଇବା ପ୍ରଲୋଭନରେ ଯାଇଥିବା ଭାରତୀୟମାନଙ୍କୁ ସେଠାରେ ଜବରଦସ୍ତ ସୈନ୍ୟବାହିନୀରେ ଭର୍ତ୍ତି କରାଯାଇ ଯୁଦ୍ଧ କରିବା ପାଇଁ ବାଧ୍ୟ କରାଯାଉଛି। ସେମାନଙ୍କୁ ଫେରାଇଦେବା ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ଦୃଷ୍ଟି ଆକର୍ଷଣ କରିଥିଲେ ମଧ୍ୟ ସେଠାରେ ଏବେ ବି ବହୁ ଭାରତୀୟ ଯୁବକ ୟୁକ୍ରେନ୍ ବିରୋଧରେ ଯୁଦ୍ଧ ଲଢ଼ୁଥିବା ଜଣାପଡ଼ିଛି।
ସେନାରେ ନିଯୁକ୍ତ ହୋଇ ୟୁକ୍ରେନ୍ ବିରୋଧରେ ଯୁଦ୍ଧ ଲଢ଼ୁଥିବା କେରଳର ଜଣେ ଯୁବକଙ୍କ ମୃତ୍ୟୁ ଘଟିଛି। ତାଙ୍କ ସମ୍ପର୍କୀୟ ଗୁରୁତର ଆହତ ହୋଇଛନ୍ତି। ମୃତକ ବିନିଲ ଟି.ବି.(୨)ଙ୍କ ଘର କେରଳ ଥ୍ରୀଶୂର ଜିଲାର ଓ୍ବାଡାକ୍କାଞ୍ଚେରୀରେ ହୋଇଥିବାବେଳେ ତାଙ୍କ ସମ୍ପର୍କୀୟ ଜୈନ ଟି.କେ(୨୭) ମଧ୍ୟ ସେହି ଅଞ୍ଚଳର ବାସିନ୍ଦା। ସେମାନଙ୍କୁ ସ୍ବଦେଶ ଫେରାଇ ଆଣିବା ପାଇଁ ଭାରତ ସରକାରଙ୍କୁ ବହୁବାର ନିବେଦନ କରାଯାଇଥିଲା ବୋଲି ବିନିଲଙ୍କ ସମ୍ପର୍କୀୟ କହିଛନ୍ତି। ଡ୍ରୋନ୍ ଆକ୍ରମଣ ଯୋଗୁ ଉଭୟ ଆହତ ହୋଇଥିବା କିଛିଦିନ ପୂର୍ବରୁ ପରିବାରକୁ ଖବର ମିଳିଥିଲେ ମଧ୍ୟ ସେମାନଙ୍କ ସହ ଯୋଗାଯୋଗ ହୋଇପାରି ନ ଥିଲା। ବିନିଲଙ୍କ ସ୍ତ୍ରୀ ଜୋଇସି ମସ୍କୋସ୍ଥିତ ଭାରତୀୟ ଦୂତାବାସ ସହ ଯୋଗାଯୋଗ କରିବାରୁ ବିନିଲଙ୍କ ମୃତ୍ୟୁ ଘଟିଥିବା ଜଣାପଡ଼ିଥିଲା। ଆପ୍ରବାସୀ କେରଳୀମାନଙ୍କ ପାଇଁ କାମ କରୁଥିବା ରାଜ୍ୟ ସରକାରଙ୍କ ସଂସ୍ଥା ନୁର୍କା ରୁଟ୍ସର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅଜିଥ କୋଲାସେରି କହିଛନ୍ତି, ଉକ୍ତ ୨ ଯୁବକଙ୍କୁ ଫେରାଇ ଆଣିବା ପାଇଁ ଆମେ ଗତ ୪ ମାସ ହେଲା ଉଦ୍ୟମ କରୁଥିଲୁ। ରୁଷିଆ ସେନାରେ ପ୍ରକୃତରେ କେତେଜଣ କେରଳୀ ରହିଛନ୍ତି, ତାହାର ଠିକ୍ ତଥ୍ୟ ଜଣାନାହିଁ। ସେମାନେ ବିପଦରେ ଥିବା ନେଇ ଫୋନ୍ କରିବା ପରେ ଘଟଣା ଜଣାପଡ଼ିଥିଲା ବୋଲି କୋଲାସେରି କହିଛନ୍ତି। ବିନିଲ ଏବଂ ଜୈନ ଘରକୁ ଫେରିବା ପାଇଁ ଗତ ସେପ୍ଟେମ୍ବରରୁ ମସ୍କୋସ୍ଥିତ ଭାରତୀୟ ଦୂତାବାସକୁ ଅନେକଥର ନିବେଦନ କରି ନିରାଶ ହୋଇଥିଲେ। ସେମାନଙ୍କୁ ଫ୍ରଣ୍ଟଲାଇନରେ ଯୁଦ୍ଧ କରିବାକୁ ବାଧ୍ୟ କରାଯାଉଥିବାରୁ ଜୀବନ ପ୍ରତି ବିପଦ ଆହୁରି ବଢ଼ିପାରେ ବୋଲି ବିନିଲ ଶେଷ ବାର୍ତ୍ତାରେ କହିଥିଲେ।
