ନୂଆଦିଲ୍ଲୀ,୨୧।୧୦: ଭାରତୀୟ ସେନା ଚାଇନାର ସୈନ୍ୟଙ୍କ ମୁକାବିଲା ପାଇଁ ଏନେ ନୂଆ ଯୋଜନା ଉପରେ କାର୍ଯ୍ୟ ଜାରି ରଖିଛି। ଶୀତ ଆସିବା ପୂର୍ବରୁ ଏବେ ଭାରତ ଏବଂ ଚାଇନା ଏଲ୍ଏସିରେ ଅସ୍ତ୍ରଶସ୍ତ୍ର ଠୁଳ କରିବାରେ ଲାଗିଛନ୍ତି। ଏଲ୍ଏସିରେ ବୃଦ୍ଧି ପାଉଥିବା ଉତ୍ତେଜନାକୁ ଦୃଷ୍ଟିରେ ରଖି ଭାରତୀୟ ଯବାନଙ୍କୁ ନୂଆ ଟ୍ରେନିଂ ପ୍ରଦାନ କରାଯାଉଛି। ଏହାକୁୁ ‘ପ୍ଲାନ୍-୧୯୦’ ଭାବେ ନାମିତ କରାଯାଇଛି। ଏହା ଅନ୍ତର୍ଗତ ଭାରତୀୟ ଯବାନଙ୍କୁ ପ୍ରତିଦିନ ସମୁଦ୍ର ପତ୍ତନଠାରୁ ୧୫ ହଜାର ଫୁଟ ଉପରେ ୧୯୦ ମିନିଟର ଟ୍ରେନିଂ ଦିଆଯାଉଛି।
ପ୍ଲାନ୍-୧୯୦ରେ ୧୪୦ ମିନିଟର ଶାରୀରିକ ବ୍ୟାୟମ ସହିତ ମାର୍ଶଲ ଆର୍ଟକୁ ସାମିଲ କରାଯାଇଛି। ଏହା ପରେ ୫୦ ମିନିଟର ଆକ୍ରମଣାତ୍ମକ କାର୍ଯ୍ୟକଳାପ ମଧ୍ୟ ଏଥିରେ ରହିଛି। ଏଥିରେ ଶତ୍ରୁପକ୍ଷକୁ ରାଇଫଲ ସମ୍ମୁଖରେ ଥିବା ଛୁରୀ ଦ୍ୱାରା ଆକ୍ରମଣ କରିବା, ଟାୟାରକୁ ହାତୁଡ଼ିରେ ପିଟିବା, କାଠଗୋଛାକୁ କୁରାଢ଼ିରେ ଶୀଘ୍ର ହାଣିବା ଆଦି କାର୍ଯ୍ୟକୁ ସାମିଲ କରାଯାଇଛି।
ଭାରତୀୟ ସେନାର ତାୱାଙ୍ଗ ବ୍ରିଗେଡ (କୋରିଆ ବ୍ରିଗେଡ)ର ଯବାନମାନେ ଏହି ଯୋଜନା ଅନୁସରଣ କରି ନିଜକୁ ଆକ୍ରମଣାତ୍ମକ କରିଥାନ୍ତି। ଏଥିରେ ଶତ୍ରୁକୁ କୌଣସି ସୁଯୋଗ ଦିଆଯାଇ ନ ଥାଏ। ବରିଷ୍ଠ ସେନା ଅଧିକାରୀଙ୍କ ଅନୁସାରେ ଯଦି ସୀମାରେ ଅନୁପ୍ରବେଶ ଜାରି ରହେ ତେବେ ଭାରତୀୟ ସେନା ଆକ୍ରମଣାତ୍ମକ ମନୋଭାବ ଗ୍ରହଣ କରିବାକୁ ବାଧ୍ୟ ହେବ।
ଭାରତୀୟ ସେନା ଦ୍ୱିତୀୟ ବିଶ୍ୱଯୁଦ୍ଧ ସମୟରେ ଯେପରି ଉଚ୍ଚ ଶିଖରରେ ବଙ୍କର ନିର୍ମାଣ କରିଥିଲେ ସେହି ଶୈଳୀ ଉନ୍ନତ ଉପାୟରେ ଗ୍ରହଣ କରାଯିବ। ବଙ୍କରଗୁଡ଼ିକରେ ଆଧୁନିକ ଯୋଗାଯୋଗ କେନ୍ଦ୍ର, ସର୍ଭିଲାନ୍ସ ରୁମ୍ ସହିତ ଆର୍ଟିଲାରିର ଏକ କମାଣ୍ଡ ସେଣ୍ଟର ମଧ୍ୟ ରହିବ। ଏହା ସହାୟତାରେ ଏଲ୍ଏସିରେ ଶତ୍ରୁପକ୍ଷର ପ୍ରତ୍ୟେକ ଗତିବିଧି ଉପରେ ନଜର ରଖାଯାଇପାରିବ।
ଭାରତୀୟ ସେନାର ‘ପ୍ଲାନ୍-୧୯୦’ର ଲକ୍ଷ୍ୟ ହେଉଛି ‘ କିଲ୍ ଆଣ୍ଡ୍ ବି କିଲ୍ଡ’। ଅର୍ଥାତ୍ ଶତ୍ରୁକୁ ହତ୍ୟା କର ଅବା ଶହୀଦ୍ ହୁଅ। ଏଲ୍ଏସି ଠାରୁ ୨.୫ କିଲୋମିଟର ଦୂରରେ ଭାରତୀୟ ସେନା ପକ୍ଷରୁ ଇତିମଧ୍ୟରେ ଏକ ସ୍ବତନ୍ତ୍ର ଯୁଦ୍ଧ ଅଭ୍ୟାସ ଶେଷ ହୋଇଛି।
