ନୂଆଦିଲ୍ଲୀ, ୧୬।୨ : ପ୍ରଥମ ମ୍ୟାଚ୍ରେ ଲଜ୍ଜାଜନକ ପରାଜୟ ପରେ ଦ୍ୱିତୀୟ ଟେଷ୍ଟରେ ବଡ଼ ବିଜୟ ହାସଲ କରିଛି ଭାରତୀୟ ଦଳ। ଏଥିସହ ୪ ମ୍ୟାଚ୍ ବିଶିଷ୍ଟ ସିରିଜ୍ ଏବେ ୧-୧ର ବରାବର ସ୍ଥିତିରେ ପହଞ୍ଚିଛି। ପଦାର୍ପଣ କରିଥିବା ବାମହାତୀ ସ୍ପିନର ଅକ୍ଷର ପଟେଲ ୫ ଉଇକେଟ ସଫଳତା ହାସଲ କରିଛନ୍ତି। ଆଉ ବରିଷ୍ଠ ସ୍ପିନର ରବିଚନ୍ଦ୍ରନ ଅଶ୍ୱିନ ମ୍ୟାଚ୍ରେ ୮ ଉଇକେଟ ନେବା ସହ ଖେଳିଥିଲେ ୧୦୬ ରନ୍ର ଏକ ଜବରଦସ୍ତ ଶତକୀୟ ପାଳି । ଏଭଳି ପ୍ରଦର୍ଶନକୁ ପ୍ରଶଂସା କରିବା ସହ ଟିମ୍ ଇଣ୍ଡିଆର ସିରିଜ୍ ଜିତିବ ବୋଲି ଦାବି କରିଛନ୍ତି ବହୁ ପ୍ରାକ୍ତନ ଖେଳାଳି।
” ବଡ଼ ବିଜୟ ପାଇଁ ଟିମ୍ ଇଣ୍ଡିଆକୁ ଶୁଭେଚ୍ଛା। ଦଳର ପ୍ରତ୍ୟେକ ଖେଳାଳି ନିଜ ଦକ୍ଷତାନୁଯାୟୀ ଖେଳିଲେ। ବରିଷ୍ଠ ଖେଳାଳିମାନେ ଭଲ ପ୍ରଦର୍ଶନ କରିଥିବାବେଳେ ମୁଁ ପଦାର୍ପଣକାରୀ ଅକ୍ଷର ପଟେଲଙ୍କ ଦ୍ୱାରା ପ୍ରଭାବିତ “ ବୋଲି ପୂର୍ବତନ ଭାରତୀୟ ବ୍ୟାଟ୍ସମ୍ୟାନ ଭିଭିଏସ୍ ଲକ୍ଷ୍ମଣ ଟୁଇଟରରେ ଲେଖିଛନ୍ତି। ସେହିଭଳି ଇର୍ଫାନ ପଠାନ ଟୁଇଟ୍ କରିଛନ୍ତି, ଭାରତୀୟ ଦଳ ଭଲ ଖେଳିଲା। ଆମେ ସିରିଜ୍ ଜିତିବୁ। ସେହିଭଳି ମହମ୍ମଦ କୈଫ, ହରଭଜନ ସିଂ, ଆକାଶ ଚୋପ୍ରା ଟୁଇଟ୍ କରି ଟିମ୍ ଇଣ୍ଡିଆ ସିରିଜ୍ ଜିତିବ ବୋଲି ଦାବି କରିଛନ୍ତି।
