ଭୁବନେଶ୍ୱର, ୧।୧(ଅନୁରାଧା ମହାରଣା): ଦେଶରେ ତୈଳ ବ୍ୟବହାରରେ ଦ୍ରୁତ ବୃଦ୍ଧି କାରଣରୁ ଅଶୋଧିତ ତୈଳ ବ୍ୟବହାର କ୍ଷେତ୍ରରେ ଭାରତ ଚାଇନାକୁ ପଛରେ ପକାଇବାକୁ ଯାଉଛି। ଦେଶରେ ୨୦୨୨-୨୩ ବର୍ଷରେ ପେଟ୍ରୋଲ ବ୍ୟବହାର ୧୩.୪ ପ୍ରତିଶତ ଏବଂ ଡିଜେଲ ବ୍ୟବହାର ୧୨.୧ ପ୍ରତିଶତ ବୃଦ୍ଧି ପାଇଛି। ଆମେରିକା, ଚାଇନା ଏବଂ ଭାରତ ହେଉଛି ବିଶ୍ୱର ତିନୋଟି ବୃହତ ଅଶୋଧିତ ତୈଳ ଗ୍ରାହକ। ଅନ୍ତର୍ଜାତୀୟ ଶକ୍ତି ଏଜେନ୍ସି (ଆଇଏ)ର ରିପୋର୍ଟରେ କୁହାଯାଇଛି ଯେ ୨୦୨୭ ମସିହାରେ ଭାରତ ଅଶୋଧିତ ତୈଳ ବ୍ୟବହାରରେ ଚାଇନାକୁ ଅତିକ୍ରମ କରିବ ଏବଂ ଆମେରିକା ପରେ ବିଶ୍ୱର ସର୍ବବୃହତ ଗ୍ରାହକ ହେବ। ‘ତୈଳ ୨୦୨୩’ ନାମକ ରିପୋର୍ଟରେ ଆଉଟଲୁକ କହିଛି ଯେ, ୨୦୨୪ ମସିହାରୁ ଚାଇନାରେ ଘରୋଇ ବ୍ୟବହାର ହ୍ରାସ ହେତୁ ଅଶୋଧିତ ତୈଳର ଚାହିଦା କ୍ରମାଗତ ଭାବେ ହ୍ରାସ ପାଇବ। ବର୍ତ୍ତମାନ ଅଶୋଧିତ ତୈଳ ମୂଲ୍ୟ ବ୍ୟାରେଲ ପିଛା ୭୯ ଡଲାର ରହିଛି। ୨୦୨୩ରେ ଅଶୋଧିତ ତୈଳ ମୂଲ୍ୟ ବ୍ୟାରେଲ ପିଛା ସର୍ବାଧିକ ୯୫ ଡଲାର ପର୍ଯ୍ୟନ୍ତ ରହିବ। ୨୦୨୨ରେ ଏହି ମୂଲ୍ୟ ବ୍ୟାରେଲ ପିଛା ୧୨୪ ଡଲାରରେ ପହଞ୍ଚିଥିଲା । ଅଶୋଧିତ ତୈଳର ମୂଲ୍ୟ ବୃଦ୍ଧି ଏବଂ ଡଲାରର ମଜଭୁତ ହେତୁ ପେଟ୍ରୋଲ ଏବଂ ଡିଜେଲ ମହଙ୍ଗା ହେବାକୁ ଲାଗିଲା। ଗୋଟିଏ ବ୍ୟାରେଲରେ ୧୫୯ ଲିଟର ଅଶୋଧିତ ତେଲ ଥାଏ।
ରିପୋର୍ଟ ଅନୁଯାୟୀ, ଆମେରିକାରେ ଦୈନିକ ୧୯.୮୯ ନିୟୁତ ବ୍ୟାରେଲ ବ୍ୟବହାର ହେଉଥବାବେଳେ ଚାଇନା ପ୍ରତିଦିନ ୧୫.୨୭ ନିୟୁତ ବ୍ୟାରେଲ ଖର୍ଚ୍ଚ ହେଉଛି। ଭାରତରେ ଦୈନିକ ପ୍ରାୟ ୫ ନିୟୁତ ବ୍ୟାରେଲ ତେଲ ବ୍ୟବହାର କରାଯାଏ। ଚୀନରେ ଆଗାମୀ ଦିନରେ ତେଲ ଚାହିଦା ହ୍ରାସ ପାଇପାରେ। ଲୋକମାନେ ପେଟ୍ରୋଲ ଏବଂ ଡିଜେଲ ଗାଡି ବଦଳରେ ବୈଦ୍ୟୁତିକ କାର କିଣିବାକୁ ପସନ୍ଦ କରୁଛନ୍ତି। ଏହା ବ୍ୟତୀତ ସର୍ବସାଧାରଣ ଯାନଗୁଡିକ ମଧ୍ୟ ବୈଦ୍ୟୁତିକ ଯାନରେ ପରିଣତ ହେଉଛି। ଏଭଳି ପରିସ୍ଥିତିରେ ପେଟ୍ରୋଲ ଏବଂ ଡିଜେଲ ବ୍ୟବହାର କମିବା ସ୍ବାଭାବିକ। ତେବେ ଭାରତ ସରକାର ମଧ୍ୟ ବୈଦ୍ୟୁତିକ ଯାନକୁ ପ୍ରୋତ୍ସାହିତ କରିବାକୁ ଚେଷ୍ଟା କରୁଛନ୍ତି।
