ଚେନ୍ନାଇ,୩୦।୧: ଆସନ୍ତା ୭ ତାରିଖରୁ ଅହମ୍ମଦାବାଦଠାରୁ ଆରମ୍ଭ ହେବାକୁ ଥିବା ଓ୍ବେଷ୍ଟଇଣ୍ଡିଜ ବିପକ୍ଷ ସୀମିତ ଓଭର ସିରିଜ୍ ଲାଗି ଭାରତୀୟ ଦଳରେ ଦୁଇ ଖେଳାଳିଙ୍କୁ ସାମିଲ କରାଯାଇଛି। ତାମିଲନାଡୁର ମିଡଲ୍ ଅର୍ଡର ବ୍ୟାଟର ଏମ୍. ଶାହରୁଖ ଖାନ ଓ ବାମହତୀ ସ୍ପିନର ଆର. ସାଇ କିଶୋର ଦଳରେ ଷ୍ଟାଣ୍ଡ ବାଇ ଖେଳାଳି ଭାବେ ସାମିଲ ହୋଇଛନ୍ତି। ଏ ନେଇ ବିସିସିଆଇ ସୂତ୍ରରୁ ବିଳମ୍ବିତ ରାତିରେ ସୂଚନା ମିଳିଛି।
“ବିସିସିଆଇ ସବୁ ଶୂନ୍ୟ ସ୍ଥାନ ପୂରଣ କରିବାକୁ ଚାହୁଁଛି। ଦେଶରେ କୋଭିଡ୍-୧୯ର ତୃତୀୟ ଲହର ଜାରି ରହିଥିବାରୁ ବିସିସିଆଇ କୌଣସି ରିସ୍କ ନେଇ ପାରିବ ନାହିଁ। ଶାହରୁଖ ଓ ସାଇ କିଶୋରଙ୍କୁ ଭାରତୀୟ ଦଳରେ ଅତିରିକ୍ତ ଖେଳାଳି ଭାବେ ସାମିଲ କରାଯାଇଛି। ସାଇ କିଶୋର ନେଟ୍ସ ପାଇଁ ମଧ୍ୟ ଉପଯୋଗୀ ବୋଲର” ବୋଲି ବିସିସିଆଇ ସୂତ୍ରରୁ କୁହାଯାଇଛି।
