ରାୟପୁର,୩।୧୨: ରାୟପୁରରେ ଖେଳାଯାଇଥିବା ଦକ୍ଷିଣ ଆଫ୍ରିକା ବିପକ୍ଷ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍ର ଦ୍ୱିତୀୟ ମ୍ୟାଚ୍ରେ ଭାରତକୁ ୪ ୱିକେଟରେ ପରାସ୍ତ କରି ଦକ୍ଷିଣ ଆଫ୍ରିକା ସିରିଜ୍କୁ ୧-୧ରେ ବରାବର କରିଛି। ଭାରତ ଦେଇଥିବା ୩୫୯ ରନର ବିଶାଳ ଲକ୍ଷ୍ୟକୁ ଦକ୍ଷିଣ ଆଫ୍ରିକା ୪୯.୨ ଓଭରରେ ୬ ୱିକେଟ୍ ହରାଇ ହାସଲ କରିନେଇଥିଲା।
ପ୍ରଥମେ ବ୍ୟାଟିଂ କରି ଭାରତ ନିର୍ଦ୍ଧାରିତ ୫୦ ଓଭରରେ ୫ ୱିକେଟ୍ ହରାଇ ୩୫୮ ରନ୍ ସଂଗ୍ରହ କରିଥିଲା। ଓପନର ରୋହିତ ଶର୍ମା ଓ ଯଶସ୍ୱୀ ଜୟସ୍ୱାଲ ଶୀଘ୍ର ଆଉଟ୍ ହୋଇଥିଲେ ମଧ୍ୟ, ବିରାଟ କୋହଲି ତାଙ୍କର ୫୩ତମ ଦିନିକିଆ ଶତକ (୧୦୨ ରନ୍) ଏବଂ ଋତୁରାଜ ଗାଏକୱାଡ୍ ତାଙ୍କର ପ୍ରଥମ ଦିନିକିଆ ଶତକ (୧୦୫ ରନ୍) ହାସଲ କରି ଦଳକୁ ମଜଭୁତ ସ୍ଥିତିରେ ପହଞ୍ଚାଇଥିଲେ।
କୋହଲି ଏବଂ ଗାଏକୱାଡ୍ ତୃତୀୟ ୱିକେଟ୍ ପାଇଁ ୧୯୫ ରନର ଏକ ବଡ଼ ଭାଗିଦାରୀ କରିଥିଲେ। ଶେଷ ଆଡ଼କୁ କେ.ଏଲ୍ ରାହୁଲ ମାତ୍ର ୪୩ ବଲ୍ରେ ଅପରାଜିତ ୬୬ ରନର ଦ୍ରୁତ ଇନିଂସ୍ ଖେଳି ଭାରତର ସ୍କୋରକୁ ୩୫୦ ପାର୍ କରାଇଥିଲେ।
୩୫୯ ରନର ପିଛା କରୁଥିବା ଦକ୍ଷିଣ ଆଫ୍ରିକା ପାଇଁ ଏଡେନ୍ ମାର୍କରମ୍ (୧୧୦ ରନ୍), ମାଥ୍ୟୁ ବ୍ରିଜକେ (୬୮ ରନ୍) ଏବଂ ଡେୱାଲ୍ଡ ବ୍ରେଭିସ୍ (୫୪ ରନ୍) ଚମତ୍କାର ପ୍ରଦର୍ଶନ କରିଥିଲେ। ଶେଷରେ କର୍ବିନ୍ ବସ୍ ବିଜୟ ସୂଚକ ରନ୍ ସଂଗ୍ରହ କରିଥିଲେ। ଖେଳ ପଡ଼ିଆରେ କାକରର ପ୍ରଭାବ ଥିଲେ ମଧ୍ୟ ପ୍ରୋଟିଆସ୍ ଦଳ ଲକ୍ଷ୍ୟ ହାସଲ କରିବାରେ ସଫଳ ହୋଇଥିଲା। ଶୃଙ୍ଖଳାର ଫାଇନାଲ୍ ତଥା ତୃତୀୟ ଦିନିକିଆ ମ୍ୟାଚ୍ ଡିସେମ୍ବର ୬ ତାରିଖ ଶନିବାର ବିଶାଖାପାଟଣାରେ ଖେଳାଯିବ।
