ନୂଆଦିଲ୍ଲୀ, ୧୨।୭: ଚାଇନାକୁ ଭାରତ, ଆମେରିକା ଏବଂ ଜାପାନ ମିଳିତ ଭାବେ ଘେରିବା ଆରମ୍ଭ କରିଛନ୍ତି। ଭାରତ ଆଫ୍ରିକାର ବିଭିନ୍ନ ଦେଶରେ ନିଜର ସ୍ଥିତି ସୁଦୃଢ଼ କରିବାକୁ ଯୋଜନା କରିଛି। ଏପରିସ୍ଥଳେ ଚାଇନା ମଧ୍ୟ ଭାରତ ସହିତ ପ୍ରତିଯୋଗିତାପୂର୍ଣ୍ଣ ମନୋଭାବ ରଖିଛି। ତେବେ ଭାରତ, ଆମେରିକା ଏବଂ ଜାପାନ ପ୍ରଶାନ୍ତ ସାଗରୀୟ ରଣନୀତି ଅନୁସାରେ ମିଳିତ ଭାବେ ଡ୍ରାଗନ ବାଟରେ କଣ୍ଟା ସାଜିଛନ୍ତି। ଫଳରେ ଚାଇନା ପାଇଁ ଆଫ୍ରିକାର ବିଭିନ୍ନ ଦେଶରେ କାରବାର କରିବାରେ ବାଧା ସୃଷ୍ଟି ହେବାରେ ଲାଗିଛି। କରୋନା ଲଢ଼େଇ ବାହାନାରେ ଚାଇନା ଆଫ୍ରିକାର ୫୦ଟି ଦେଶକୁ ବିଭିନ୍ନ ସାମଗ୍ରୀ ତଥା ଚିକିତ୍ସା ଉପକରଣର ସହାୟତା ପଠାଇଥିଲା। ଭାରତ ମଧ୍ୟ ଏଠାକାର ୩୨ଟି ଦେଶକୁ ଚିକିତ୍ସା ସାମଗ୍ରୀ ପଠାଇଛି। ବିଶେଷଜ୍ଞଙ୍କ ଅନୁସାରେ ଭାରତ ଯେଉଁ ରଣନୀତି ନେଇ ଯୋଜାନାବଦ୍ଧ ଭାବେ କାର୍ଯ୍ୟ କରୁଛି ତାହାଦ୍ୱାରା ଆଗାମୀ ଦିନରେ ଆଫ୍ରିକାରେ ପ୍ରଭାବ ବୃଦ୍ଧି ପାଇବାର ଯଥେଷ୍ଟ ଆଶା ରହିଛି। ଆଫ୍ରିକା ଦେଶର ରୁଚି ଏବଂ ପସନ୍ଦ ସମ୍ପର୍କରେ ଭାରତକୁ ଜଣାଅଛି। ଏସିଆ-ଆଫ୍ରିକା ଗ୍ରୋଥ୍ କରିଡୋର(ଏଏଜିସି) ସଦସ୍ୟ ରାଷ୍ଟ୍ର ମଧ୍ୟରେ ଭାରତ ଜାପାନ ସହିତ କିଛି ଆଫ୍ରିକାର ଦେଶ ମଧ୍ୟ ସାମିଲ ଅଛନ୍ତି। ଆଫ୍ରିକାର ବିଭିନ୍ନ ଦେଶରେ ସ୍ବାସ୍ଥ୍ୟ, ଫାର୍ମା, କୃଷି ଏବଂ ପ୍ରାକୃତିକ ବିପର୍ଯ୍ୟୟ ପରିଚାଳନା କାର୍ଯ୍ୟକୁ ବିକଶିତ କରିବା ଏଏଜିସିର ମୁଖ୍ୟ ଲକ୍ଷ୍ୟ। ଭାରତ ଏସବୁ କ୍ଷେତ୍ରରେ ବ୍ୟାପକ ଭାବେ ଅଭିଯାନ ଜାରି ରଖିଛି। ଏପରିସ୍ଥଳେ ଚାଇନା ପଛରେ ପଡ଼ିଯାଇଛି। ଭାରତକୁ ଜାପାନ ଏବଂ ଆମେରିକା ସହଯୋଗର ହାତ ବଢ଼ାଇଥିବାବେଳେ ଚାଇନା ଏକଘରିଆ ହୋଇଯାଇଥିବା କୁହାଯାଉଛି।
