ମୁଲାନପୁର,୧୧ା୧୨: ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଗୁରୁବାର ମୁଲାନପୁରରେ ଖେଳାଯାଇଥିବା ଦ୍ୱିତୀୟ T20Iରେ ଦକ୍ଷିଣ ଆଫ୍ରିକାର ବ୍ୟାଟ୍ସମ୍ୟାନ୍ କ୍ୱିଣ୍ଟନ୍ ଡି’ କକ୍ଙ୍କ ବିସ୍ଫୋରକ ବ୍ୟାଟିଂ ବଳରେ ଭ୍ରମଣକାରୀ ଦଳ ଭାରତ ସମ୍ମୁଖରେ ଏକ ବିଶାଳ ସ୍କୋର ଛିଡ଼ା କରିଛି।
ଡି’ କକ୍ ମାତ୍ର ୪୬ ବଲ୍ରୁ ୭ଟି ଛକା ସହ ୯୦ ରନ୍ର ଚମତ୍କାର ଇନିଂସ୍ ଖେଳି ଦକ୍ଷିଣ ଆଫ୍ରିକାକୁ ନିର୍ଦ୍ଧାରିତ ୨୦ ଓଭରରେ ୪ ୱିକେଟ୍ ବିନିମୟରେ ୨୧୩ ରନ୍ର ବିଶାଳ ସ୍କୋରରେ ପହଞ୍ଚାଇଥିଲେ। ଶେଷ ଆଡ଼କୁ ଡୋନୋଭାନ୍ ଫେରେରା (୧୬ ବଲ୍ରୁ ୩୦) ଏବଂ ଡେଭିଡ ମିଲର (୧୨ ବଲ୍ରୁ ୨୦) ମଧ୍ୟ ଦ୍ରୁତ ରନ୍ ଯୋଡ଼ିଥିଲେ।
ଭାରତୀୟ ବୋଲରଙ୍କ ମଧ୍ୟରେ କେବଳ ବରୁଣ ଚକ୍ରବର୍ତ୍ତୀ ୨ଟି ୱିକେଟ୍ ନେଇ ସଫଳ ହୋଇଥିବା ବେଳେ ଦଳର ପ୍ରମୁଖ ବୋଲର ଯଶପ୍ରୀତ ବୁମ୍ରା ଏବଂ ଅର୍ଶଦୀପ ସିଂହଙ୍କ ପାଇଁ ଏହି ଦିନଟି ନିରାଶାଜନକ ରହିଥିଲା। ବୁମ୍ରାଙ୍କ ଗୋଟିଏ ଓଭରରେ ୧୮ ରନ୍ ଯାଇଥିବା ବେଳେ, ଅର୍ଶଦୀପ ସିଂହ ଗୋଟିଏ ଓଭରରେ ୭ଟି ୱାଇଡ୍ ସହ ମୋଟ ୯ଟି ୱାଇଡ୍ ବଲ୍ ପକାଇଥିଲେ।
ଉଲ୍ଲେଖଯୋଗ୍ୟ ଯେ, ୫ ମ୍ୟାଚ୍ ବିଶିଷ୍ଟ ଏହି T20I ସିରିଜରେ ଭାରତ ବର୍ତ୍ତମାନ ୧-୦ରେ ଆଗୁଆ ରହିଛି।
