ନୂଆଦିଲ୍ଲୀ/ଆମଷ୍ଟରଡମ,୨୧।୫: ନେଦରଲ୍ୟାଣ୍ଡ ପ୍ରଧାନମନ୍ତ୍ରୀ ଡିକ ସ୍କୁଫ ମଙ୍ଗଳବାର ବାଣିଜ୍ୟ, ପ୍ରଯୁକ୍ତିବିଦ୍ୟା ଏବଂ ସୁରକ୍ଷା କ୍ଷେତ୍ରରେ ଦ୍ୱିପାକ୍ଷିକ ସମ୍ପର୍କ ବୃଦ୍ଧି କରିବା ପାଇଁ ବୈଦେଶିକ ମନ୍ତ୍ରୀ ଏସ ଜୟଶଙ୍କରଙ୍କ ସହ ଆଲୋଚନା କରିଛନ୍ତି ଏବଂ ସୀମାପାର ଆତଙ୍କବାଦ ବିରୁଦ୍ଧରେ ଭାରତର ଲଢ଼େଇକୁ ସମର୍ଥନ କରିଛନ୍ତି।
ଜୟଶଙ୍କରଙ୍କ ସହ ସାକ୍ଷାତ ପରେ ଡିକ ସ୍କୁଫ କହିଛନ୍ତି ଯେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଖୁବ ଶୀଘ୍ର ନେଦରଲ୍ୟାଣ୍ଡସ୍ରେ ସ୍ବାଗତ କରିବାକୁ ଅପେକ୍ଷା କରିଛନ୍ତି। ୧୩ ରୁ ୧୭ ମେ’ ପର୍ଯ୍ୟନ୍ତ ମୋଦି କ୍ରୋଏସିଆ, ନରୱେ ଏବଂ ନେଦରଲ୍ୟାଣ୍ଡସ୍ ଗସ୍ତ କରିବାର କାର୍ଯ୍ୟକ୍ରମ ଥିଲା, କିନ୍ତୁ ପହଲଗାମ ଆତଙ୍କବାଦୀ ଆକ୍ରମଣ ପରେ ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ବୃଦ୍ଧି ପାଇବାରୁ ଏହି ଗସ୍ତ ବାତିଲ କରାଯାଇଥିଲା।
ଆଲୋଚନା ସମୟରେ, ଜୟଶଙ୍କର ଆତଙ୍କବାଦ ବିରୋଧରେ ନେଦରଲ୍ୟାଣ୍ଡସ୍ର ଦୃଢ଼ ପଦକ୍ଷେପ ପାଇଁ ପ୍ରଧାନମନ୍ତ୍ରୀ ଡିକ ସ୍କଫଙ୍କୁ ଧନ୍ୟବାଦ ଜଣାଇଥିଲେ। ବୈଦେଶିକ ମନ୍ତ୍ରୀଙ୍କ ସହ ତାଙ୍କର ସାକ୍ଷାତ ବିଷୟରେ, ସ୍କୁଫ କହିଛନ୍ତି ଯେ ସେ ପହଲଗାମରେ ଆତଙ୍କବାଦୀ ଆକ୍ରମଣ ବିରୁଦ୍ଧରେ ଭାରତର ଲଢ଼େଇକୁ ସମର୍ଥନ ଜଣାଇଥିଲେ। ସେ ଇଣ୍ଟରନେଟ ମିଡିଆରେ ଏକ ପୋଷ୍ଟରେ କହିଛନ୍ତି ଯେ ଭାରତ ଏବଂ ପାକିସ୍ତାନ ମଧ୍ୟରେ ହିଂସା ଆଉ ବୃଦ୍ଧି ପାଇନାହିଁ ଏହା ସମସ୍ତ ପକ୍ଷ ପାଇଁ ଭଲ କଥା।
ନେଦରଲ୍ୟାଣ୍ଡସ୍ର ପ୍ରଧାନମନ୍ତ୍ରୀ କହିଛନ୍ତି ଯେ ଏକ ପରିବର୍ତ୍ତିତ ବିଶ୍ୱରେ ନେଦରଲ୍ୟାଣ୍ଡସ୍ ଏବଂ ଭାରତ ଉଭୟଙ୍କ ପାଇଁ ପରସ୍ପର ଉପରେ ବିଶ୍ୱାସ କରିବା ଗୁରୁତ୍ୱପୂର୍ଣ୍ଣ। ସେ କହିଥିଲେ, ‘ଆମେ ଆମର ରଣନୈତିକ ସହଭାଗୀତା ବିଷୟରେ ମଧ୍ୟ ଆଲୋଚନା କରିଥିଲୁ।’ ଏହା ନେଦରଲ୍ୟାଣ୍ଡସ୍ ଏବଂ ଭାରତ ମଧ୍ୟରେ ବାଣିଜ୍ୟ, ନୂତନ ପ୍ରଯୁକ୍ତିବିଦ୍ୟା, କୃଷି ଏବଂ ସୁରକ୍ଷା ସମେତ କ୍ଷେତ୍ରରେ ଦୀର୍ଘକାଳୀନ ସହଯୋଗ ସହିତ ଜଡିତ।
