ଦୁବାଇ, ୨୩।୧ (ପି.ଟି.): ଚଳିତ ଆଇସିସି ଚାମ୍ପିୟନ୍ସ ଟ୍ରଫିର ସବୁଠାରୁ ହେଭିଓ୍ବେଟ ଲଢ଼େଇ ଭାରତ-ପାକିସ୍ତାନ ମୁକାବିଲା ରବିବାର ଅନୁଷ୍ଠିତ ହେବ। ଏଥିପାଇଁ ଦୁବାଇ କ୍ରିକେଟ ଷ୍ଟାଡିୟମ ପ୍ରସ୍ତୁତ। ଉଭୟ ଦେଶର କ୍ରିକେଟ ପ୍ରେମୀଙ୍କ ମନରେ ନାହିଁ ନ ଥିବା ଉତ୍ସାହ। ଏଥିରେ ବିଜୟୀ ହୋଇ ରୋହିତ ଶର୍ମାଙ୍କ ନେତୃତ୍ୱାଧୀନ ଦଳ ସେମିଫାଇନାଲରେ ପ୍ରବେଶ ଲକ୍ଷ୍ୟ ରଖିଛି। ମହମ୍ମଦ ରିଜଓ୍ବାନଙ୍କ ପାକିସ୍ତାନ ଦଳ ପାଇଁ ଏହି ମ୍ୟାଚ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। କାରଣ ଭାରତ ନିକଟରୁ ହାରିଲେ ଦଳର ସେମିଫାଇନାଲ ପ୍ରବେଶ ଆଶା କ୍ଷୀଣ ହୋଇଯିବ। ତେଣୁ ଟୁର୍ନାମେଣ୍ଟରୁ ଶୀଘ୍ର ବିଦାୟକୁ ଏଡ଼ାଇବା ପାଇଁ ଏହି ଦଳ ନିଶ୍ଚିତ ଚେଷ୍ଟା କରିବ। ବାଂଲାଦେଶ ବିପକ୍ଷରେ ୬ ଉଇକେଟରେ ବିଜୟ ଫଳରେ ଭାରତର ମନୋବଳ ବହୁ ଉଚ୍ଚରେ ରହିଛି। ଅନ୍ୟପକ୍ଷରେ ନ୍ୟୁଜିଲାଣ୍ଡଠାରୁ ୬୦ ରନରେ ହାରିବାପରେ ପାକିସ୍ତାନ ଆଶଙ୍କା ମଧ୍ୟରେ ରହିଛି।
ଦୁଇ ଉପମହାଦେଶୀୟ ଦଳ ମଧ୍ୟରେ ୨୦୧୭ ଫାଇନାଲରେ ଶେଷଥରପାଇଁ ମୁକାବିଲା ହୋଇଥିଲା। ଏଥିରେ ବିଜୟୀ ହୋଇ ପାକିସ୍ତାନ ଚାମ୍ପିୟନ ହୋଇଥିଲା। ଏହି ମ୍ୟାଚରୁ ପ୍ରେରଣା ହାସଲ କରି ରିଜଓ୍ବାନଙ୍କ ଦଳ ଆଗାମୀ ମ୍ୟାଚରେ ଅବତୀର୍ଣ୍ଣ ହେବାକୁ ଲକ୍ଷ୍ୟ ରଖିଛି। ତେବେ ଏଥିପାଇଁ ଦଳକୁ ସବୁ ବିଭାଗରେ ଭଲ ପ୍ରଦର୍ଶନ କରିବାକୁ ହେବ। ଭାରତ-ପାକିସ୍ତାନ ମ୍ୟାଚ ସବୁବେଳେ କ୍ରିକେଟଠାରୁ ଊର୍ଦ୍ଧ୍ୱରେ ରହିଥାଏ। ଏଥିରେ ପ୍ରଶଂସକଙ୍କ ଭାବାବେଗ ଜଡ଼ିତ ରହିଥାଏ। ତେଣୁ ଶ୍ରେଷ୍ଠ ପ୍ରଦର୍ଶନ ପାଇଁ ଉଭୟ ଦଳର ଖେଳାଳି ଅତିରିକ୍ତ ଚାପର ବଶବର୍ତ୍ତୀ ହୋଇଥାନ୍ତି। ଟିମ୍ ଇଣ୍ଡିଆ ଅଧିନାୟକ ରୋହିତ ଶର୍ମା ଫର୍ମକୁ ଫେରୁଥିବା ସୂଚନା ମିଳିଛି। ଟପ୍ ଅର୍ଡରରେ ତାଙ୍କର ଦ୍ରୁତ ୪୧ ରନ ଭାରତକୁ ୨୨୯ ରନ ଚେଜ୍ କରିବାରେ ବିଶେଷ ସହାୟକ ହୋଇଥିଲା। ଶୁବମନ ଗିଲ୍ ୮ମ ଦିନିକିଆ ଶତକ ହାସଲ କରି ଭାରତୀୟ ବ୍ୟାଟିଂର ମେରୁଦଣ୍ଡ ସାଜିଥିଲେ। ଅନ୍ୟପକ୍ଷରେ ୩୨୦ ରନ ବିଜୟ ଲକ୍ଷ୍ୟକୁ ପିଛା କରୁଥିବାବେଳେ ବାବର ଆଜମଙ୍କ ୯୦ ବଲ୍ରୁ ୬୪ ରନ ସମାଲୋଚନାର ସରବ୍ୟ ହୋଇଥିଲା। ଆହତ ସମସ୍ୟା ଯୋଗୁ ଓପନର ଫଖର ଜମନ ଆସନ୍ତା ମ୍ୟାଚ ଖେଳିବେ ନାହିଁ। ତାଙ୍କ ସ୍ଥାନରେ ଇମାମ ଉଲ୍ ହକ୍ ଦଳରେ ସାମିଲ ହୋଇଛନ୍ତି। ତେବେ ମିଡିଲ ଅର୍ଡରରେ ଖୁସ୍ଦିଲ ଶାହାଙ୍କ ଆକ୍ରମଣାତ୍ମକ ୬୯ ରନ ଦଳପାଇଁ ଆଶା ସଞ୍ଚାର କରିଛି।
ପୂର୍ବ ମ୍ୟାଚରେ ବିରାଟ କୋହଲି ଭଲ ଆରମ୍ଭ କରିଥିଲେ ହେଁ ତାହାକୁ ବଡ଼ ସ୍କୋରରେ ପରିଣତ କରିପାରି ନ ଥିଲେ। ପାକିସ୍ତାନ ବିପକ୍ଷ ମ୍ୟାଚରେ ତାଙ୍କ ଉପରେ ସ୍ବତଃ ନଜର ରହିବ। ଗୁରୁତ୍ୱପୂର୍ଣ୍ଣ ମ୍ୟାଚରେ ତାଙ୍କଠାରୁ ପ୍ରଶଂସକ ଏକ ବଡ଼ ଇନିଂସ ଆଶା କରିବେ ନିଶ୍ଚିତ। ନ୍ୟୁଜିଲାଣ୍ଡ ବିପକ୍ଷରେ ଶାହିନ ଶାହା ଆଫ୍ରିଦୀଙ୍କ ନେତୃତ୍ୱାଧୀନ ଦଳର ବୋଲିଂ ଆକ୍ରମଣ ପ୍ରଭାବୀ ହୋଇ ନ ଥିଲା। ଅନ୍ୟପକ୍ଷରେ ଫିଟ୍ ହୋଇ ଦଳକୁ ଫେରିଥିବା ମହମ୍ମଦ ଶାମିଙ୍କ ନେତୃତ୍ୱରେ ଭାରତୀୟ ବୋଲିଂ ବାହିନୀ ଗତ ମ୍ୟାଚରେ ଚମତ୍କାର ପ୍ରଦର୍ଶନ କରିଥିଲା। ନିଜେ ଶାମି ୫ ଉଇକେଟ ନେଇ ବିପକ୍ଷ ଦଳ ଗୁଡ଼ିକୁ ସଚେତନ କରାଇ ଦେଇଥିଲେ। ଆଇସିସିର ବଡ଼ ଟୁର୍ନାମେଣ୍ଟ ଗୁଡ଼ିକରେ ଅଲ୍ରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ନିଜର ଶ୍ରେଷ୍ଠ ପ୍ରଦର୍ଶନ ଦେଇଥାନ୍ତି। ୨୦୧୭ ଚାମ୍ପିୟନ୍ସ ଟ୍ରଫି ଫାଇନାଲରେ ସେ ଏକାକୀ ଲଢ଼େଇ କରିଥିଲେ। ଆଗାମୀ ମ୍ୟାଚରେ ଭାରତ ଏହାର ବିଜୟୀ କମ୍ବିନେଶନକୁ ଅପରିବର୍ତ୍ତିତ ରଖିବା ଆଶା କରାଯାଉଛି। ଏହା ହେଲେ ୩ ସ୍ପିନର କୁଲଦୀପ ଯାଦବ, ରବୀନ୍ଦ୍ର ଜାଡେଜା ଓ ଅକ୍ଷର ପଟେଲଙ୍କୁ ପୁଣି ପାକିସ୍ତାନ ବିପକ୍ଷରେ ଦେଖିବାକୁ ମିଳିବ।
ଭାରତୀୟ ଦଳ: ରୋହିତ ଶର୍ମା (ଅଧିନାୟକ), ଶୁବମନ ଗିଲ୍, ବିରାଟ କୋହଲି, ଶ୍ରେୟସ ଆୟର, ଲୋକେଶ ରାହୁଲ, ହାର୍ଦ୍ଦିକ ପାଣ୍ଡ୍ୟା, ଅକ୍ଷର ପଟେଲ, ଓ୍ବାଶିଂଟନ ସୁନ୍ଦର, କୁଲଦୀପ ଯାଦବ, ମହମ୍ମଦ ଶାମି, ଅର୍ଶଦୀପ ସିଂ, ହର୍ଷିତ ରାଣା, ରିଷଭ ପନ୍ତ, ରବୀନ୍ଦ୍ର ଜାଡେଜା, ବରୁଣ ଚକ୍ରବର୍ତ୍ତୀ।
ପାକିସ୍ତାନ ଦଳ: ମହମ୍ମଦ ରିଜଓ୍ବାନ (ଅଧିନାୟକ), ସଲମାନ ଅଲୀ ଆଘା, ବାବର ଆଜମ, ଫଖର ଜମନ, କମରାନ ଘୁଲାମ, ସୌଦ ଶକିଲ, ତାୟାବ ତାହିର, ଫହିମ ଅଶ୍ରଫ, ଖୁସଦିଲ ଶାହା, ଉସମାନ ଖାଁ ଅବ୍ରାର ଅହମଦ, ହାରିସ ରୌଫ, ମହମ୍ମଦ ହାସନ, ନସିମ ଶାହା, ଶାହିନ ଶାହା ଆଫ୍ରିଦୀ।
