ମୀରପୁର, ୧୩ା୭: ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍ର ଅନ୍ତିମ ମ୍ୟାଚ୍ରେ ବାଂଲାଦେଶ ବିଜୟୀ ହୋଇଛି। ହେଲେ ପୂର୍ବରୁ ଦୁଇ ମ୍ୟାଚ୍ ଜିତିଥିବା ଭାରତ ୨-୧ରେ ସିରିଜକୁ ଜିତି ନେଇଛି। ଗୁରୁବାର ପ୍ରଥମେ ବ୍ୟାଟିଂ କରିଥିବା ଭାରତ ୯ ଉଇକେଟରେ ୧୦୨ ରନ୍ କରିଥିବା ବେଳେ ବାଂଲାଦେଶ ୧୮.୩ ଓଭରରେ ୬ ଉଇକେଟ ହରାଇ ୧୦୩ ରନ୍ କରି ବିଜୟ ହାସଲ କରିଥିଲା।
ଟସ୍ ଜିତି ଭାରତ ପ୍ରଥମେ ବ୍ୟାଟିଂ ନେଇଥିଲା। ଦୁଇ ଓପନର ସ୍ମୃତି ମନ୍ଧାନା(୧) ଓ ଶେଫାଳି ବର୍ମା(୧୧) ରନ୍ କରି ପ୍ୟାଭିଲିୟନ ଫେରିଥିଲେ। ତେବେ ଜେମିମା ରୋଡ୍ରିଗୁଏଜ୍(୨୮) ଓ ହରମନ୍ପ୍ରୀତ୍ କୌର୍(୪୦)ଙ୍କ ମଧ୍ୟରେ ତୃତୀୟ ଉଇକେଟରେ ୪୫ ରନ୍ର ଭାଗୀଦାରି ହୋଇଥିଲା। ୨୬ ବଲ୍ରୁ ୪ଚୌକା ସହିତ ୨୮ ରନ୍ କରି ଜେମିମା ଆଉଟ ହୋଇଥିଲେ। ୟସ୍ତିକା ଭାଟିଆ କ୍ରିଜକୁ ଆସିବା ସହିତ ହରମନ୍ପ୍ରୀତ କୌରଙ୍କ ସହ ୨୬ ରନ୍ ଯୋଡିଥିଲେ। ୧୭ ତମ ଓଭରରେ ଦଳୀୟ ସ୍କୋର ୯୧ରେ ହରମନ୍ପ୍ରୀତ୍ ଆଉଟ ହେବା ପରେ ଭାରତର ରନ୍ ଗତି ଧୀମେଇ ଯାଇଥିଲା। ପରବର୍ତ୍ତୀ ୩ ଓଭରରେ ଭାରତ ୧୧ ରନ୍ କରିବାରେ ସମର୍ଥ ହୋଇଥିଲା। ବାଂଲାଦେଶ ପକ୍ଷରୁ ରାବେୟା ଖାନ୍ ସର୍ବାଧିକ ୩ ଉଇକେଟ ନେଇଥିବା ବେଳେ ସୁଲତାନା ଖାତୁନ ୨, ନାହିଦା ଅଖତର, ଫହିମା ଖାତୁନ ଓ ଶୋରନା ଅଖତର ପ୍ରମୁଖ ଗୋଟିଏ ଲେଖାଏ ଉଇକେଟ ନେବାରେ ସକ୍ଷମ ହୋଇଥିଲେ।
୧୦୩ ରନ୍ ଜବାବରେ ବାଂଲାଦେଶର ୧୬ ରନ୍ ମଧ୍ୟରେ ଦୁଇ ଉଇକେଟ ହରାଇଥିଲା। ସାଥୀ ରାଣୀ(୧୦) ଓ ଦିଲାରା ଅଖତର(୧) ରନ୍ କରି ଆଉଟ ହୋଇଥିଲେ। ତେବେ ଅନ୍ୟତମ ଓପନର ଶମିମା ସୁଲତାନା ଚମତ୍କାର ବ୍ୟାଟିଂ କରି ୪୨ ରନ୍ ସ୍କୋର କରିଥିଲେ। ୪୬ ବଲ୍ର ଏହି ଇନିଂସରେ ୩ ଚୌକା ସାମିଲ ଥିଲା। ଅଧିନାୟିକା ନିଗାର ସୁଲତାନା ଜ୍ୟୋତି ୧୪ ରନ୍ କରିଥିବା ବେଳେ ସୁଲତାନା ଖାତୁନ ୧୨ ରନ୍ କରିଥିଲେ। ଭାରତ ପକ୍ଷରୁ ଦେବିକା ବୈଦ୍ୟ ଓ ମିନ୍ନୁ ମଣି ଦୁଇଟି ଲେଖାଏ ଉଇକେଟ ନେଇଥିଲେ। ଶମିମା ସୁଲତାନାଙ୍କୁ ପ୍ଲେୟର ଅଫ୍ ଦ ମ୍ୟାଚ୍ ଏବଂ ଭାରତୀୟ ଅଧିନାୟିକା ହରମନ୍ପ୍ରୀତ୍ କୌରଙ୍କୁ ପ୍ଲେୟର୍ ଅଫ୍ ଦ ସିରିଜ ଘୋଷଣା କରାଯାଇଥିଲା।
