ଢାକା,୨୨।୧୨: ଭାରତ ଉପରେ ଆଉ ଏକ ବଡ଼ ଅଭିଯୋଗ ଲଗାଇଛି ବାଂଲାଦେଶ। ଏହାର ମଧ୍ୟବର୍ତ୍ତୀକାଳୀନ ସରକାରଙ୍କ ଦ୍ୱାରା ଗଠିତ ଏକ ଅନୁସନ୍ଧାନ କମିଶନ କହିଛନ୍ତି ଯେ ବହିଷ୍କୃତ ପ୍ରଧାନମନ୍ତ୍ରୀ ଶେଖ ହସିନାଙ୍କ ଶାସନ କାଳରେ ‘ବାଧ୍ୟତାମୂଳକ ନିଖୋଜ’ ଘଟଣାରେ ଭାରତର ସମ୍ପୃକ୍ତି ରହିଛି। ସରକାରୀ ନ୍ୟୁଜ୍ ଏଜେନ୍ସି ବିଏସ୍ଏସ୍ ଶନିବାର ଏହି ଖବର ଦେଇଛି।
ଖବରରେ କୁହାଯାଇଛି ଯେ, ସର୍ବୋଚ୍ଚ ନ୍ୟାୟାଳୟର ଜଣେ ଅବସରପ୍ରାପ୍ତ ବିଚାରପତିଙ୍କ ନେତୃତ୍ୱରେ ଗଠିତ ୫ ଜଣିଆ କମିଶନଙ୍କ କହିବାନୁସାରେ, ଏବେ ମଧ୍ୟ କିଛି ବାଂଲାଦେଶୀ କଏଦୀଙ୍କୁ ଜେଲରେ ରଖାଯାଇଥାଇପାରେ’।
କମିଶନ କହିଛନ୍ତି, ଭାରତରେ ବନ୍ଦୀ ଥିବା ବାଂଲାଦେଶୀ ନାଗରିକଙ୍କୁ ଚିହ୍ନଟ କରିବା ଲାଗି ଆମେ ବୈଦେଶିକ ବ୍ୟାପାର ଏବଂ ଗୃହ ମନ୍ତ୍ରଣାଳୟକୁ ଯଥାସମ୍ଭବ ଉଦ୍ୟମ କରିବାକୁ ପରାମର୍ଶ ଦେଉଛୁ। ବାଂଲାଦେଶ ବାହାରେ ଏହି ରାସ୍ତା ଅନୁସରଣ କରିବା କମିଶନଙ୍କ ଅଧିକାର ବାହାରେ। କିଛି ଦିନ ପୂର୍ବରୁ କମିଶନ ଅନୁମାନ କରିଥିଲେ ଯେ ଜବରଦସ୍ତ ନିଖୋଜ ଥିବା ଲୋକଙ୍କ ସଂଖ୍ୟା ୩୫୦୦ରୁ ଅଧିକ ହେବ। ତେବେ କଏଦୀମାନେ ଭାରତରେ ରହିବା ଏବଂ ବାଧ୍ୟତାମୂଳକ ନିଖୋଜ ଘଟଣାରେ ଭାରତୀୟ ଏଜେନ୍ସିର ସମ୍ପୃକ୍ତି ସମ୍ପର୍କରେ ଗୁପ୍ତ ସୂଚନା ମିଳିଥିବା କମିଶନ କହିଛନ୍ତି।
