ନଭି ମୁମ୍ବାଇ, ୧୬।୧୨: ଦୀପ୍ତି ଶର୍ମାଙ୍କ ଅଲ୍ରାଉଣ୍ଡ ପ୍ରଦର୍ଶନ (ଅର୍ଦ୍ଧଶତକ ଏବଂ ୫ ଉଇକେଟ) ବଳରେ ଭାରତ ଘରୋଇ ମାଟିରେ ଇଂଲଣ୍ଡ ବିପକ୍ଷରେ ପ୍ରଥମ ମହିଳା ଟେଷ୍ଟ ଜିତିବା ସମ୍ଭାବନା ସୃଷ୍ଟି କରିଛି। ଏଠାରେ ଚାଲିଥିବା ଇଂଲଣ୍ଡ ବିପକ୍ଷ ଏକମାତ୍ର ଟେଷ୍ଟରେ ଭାରତ ଦ୍ୱିତୀୟ ଦିବସ ଖେଳ ଶେଷସୁଦ୍ଧା ୪୭୮ ରନରେ ଅଗ୍ରଣୀଲାଭ କରିିଛି, ଯାହାକି ମହିଳା କ୍ରିକେଟରେ ଏକ ରେକର୍ଡ।
ଭାରତର ପ୍ରଥମ ଇନିଂସରେ ୧୧୩ ବଲ୍ରୁ ଧୈର୍ଯ୍ୟପୂର୍ଣ୍ଣ ୬୭ ରନ ସ୍କୋର କରିଥିବା ଦୀପ୍ତି ପରେ ଇଂଲଣ୍ଡର ବ୍ୟାଟିଂ ବିପର୍ଯ୍ୟୟ ଘଟାଇବାରେ ପ୍ରମୁଖ ଭୂମିକା ଗ୍ରହଣ କରିଥିଲେ। ତାଙ୍କ ୫.୩-୪-୭-୫ ସ୍ପେଲ୍ ଯୋଗୁ ଇଂଲଣ୍ଡ ମାତ୍ର ୧୩୬ ରନରେ ଅଲ୍ଆଉଟ ହୋଇ ଯାଇଥିଲା। ଦ୍ୱିତୀୟ ଦିବସର ଷ୍ଟମ୍ପ୍ସ ଅପସାରଣ ବେଳକୁ ଭାରତ ଦ୍ୱିତୀୟ ଇନିଂସରେ ୬ ଉଇକେଟ ହରାଇ ୧୮୬ ରନ କରିଛି। ଫଳରେ ୪ ଉଇକେଟ ସୁରକ୍ଷିତ ଥାଇ ଭାରତ ବୃହତ୍ ଅଗ୍ରଣୀ ନେଇଛି। ଦ୍ୱିତୀୟ ଦିବସରେ ମୋଟ ୧୯ ଉଇକେଟର ପତନ ଘଟିଛି। ଏହା ମଧ୍ୟରୁ କେବଳ ସ୍ପିନରମାନେ ୧୫ଟି ଉଇକେଟ ନେଇଛନ୍ତି। ମହିଳା ଟେଷ୍ଟ କ୍ରିକେଟରେ ପୂର୍ବରୁ କେବେ ୪୭୮ ରନ ଚେଜ୍ ହେବାର ରେକର୍ଡ ନାହିଁ। ତେଣୁ ଭାରତ ବିଜୟୀ ହେବା ସହ ସିରିଜ ଜିତିବା ସମ୍ଭାବନା ଉଜ୍ଜ୍ୱଳ ହୋଇଛି।
ପ୍ରଥମ ଦିବସର ଅସମାପ୍ତ ସ୍କୋର ୪୧୦/୭ରୁ ଖେଳ ଆରମ୍ଭ କରିଥିବା ଭାରତ ଆଉ ୧୮ ରନକରି ୪୨୮ରେ ଅଲ୍ଆଉଟ ହୋଇଥିଲା। ଇଂଲଣ୍ଡ ପକ୍ଷରୁ ଲୌରେନ ବେଲ୍ ଓ ସୋଫି ଏକ୍ଲେଷ୍ଟୋନ ୩ଟି ଲେଖାଏ ଉଇକେଟ ନେଇଥିଲେ। ଇଂଲଣ୍ଡ ମହିଳା ବ୍ୟାଟରମାନେ କିନ୍ତୁ ଭାରତୀୟ ବୋଲରଙ୍କୁ ଠିକ୍ଭାବେ ସାମ୍ନା କରିପାରି ନ ଥିଲେ। କେବଳ ନାଟ୍-ସ୍କିଭର ବ୍ରଣ୍ଟ (୫୯ ରନ)ଙ୍କୁ ବାଦ୍ଦେଲେ ଅନ୍ୟ କେହି ୨୦ ରନ ମଧ୍ୟ ସ୍ପର୍ଶ କରିପାରି ନ ଥିଲେ। ଡାନି ଓ୍ବାଟ୍ଟ ଦ୍ୱିତୀୟ ସର୍ବାଧିକ ୧୯ ରନ କରିଥିଲେ। ଇଂଲଣ୍ଡ ଇନିଂସରେ ସବୁଠାରୁ ବଡ଼ କ୍ଷତି ଘଟାଇଥିଲେ ଦୀପ୍ତି। ସେ ୫.୩ ଓଭର ବୋଲିଂ କରି ୪ଟି ମେଡେନ ନେବା ସହ ମାତ୍ର ୭ ରନ ଦେଇ ୫ ଉଇକେଟ ସଫଳତା ପାଇଥିଲେ। ସ୍ନେହ ରାଣାଙ୍କୁ ୨ଟି ଏବଂ ରେଣୁକା ସିଂ ଓ ପୂଜା ବସ୍ତ୍ରକାରଙ୍କୁ ଗୋଟିଏ ଲେଖାଏ ଉଇକେଟ ମିଳିଥିଲା। ଭାରତ ଫଲୋଅନ ନ ଡାକି ଦ୍ୱିତୀୟ ଇନିଂସ ବ୍ୟାଟିଂ କରିଥିଲା। ଦୁଇ ଓପନର ସ୍ମୃତି ମନ୍ଧାନା (୨୬) ଓ ଶେଫାଳି ବର୍ମା (୩୩) ଭଲ ଆରମ୍ଭ କରିଥିଲେ ମଧ୍ୟ ତାହାକୁ ବଡ଼ ସ୍କୋରରେ ପରିଣତ କରିପାରି ନ ଥିଲେ। ୟାସ୍ତିକା ଭାଟିଆ (୯) ଫେଲ୍ ମାରିଥିଲେ ହେଁ ଜେମିମା ରୋଡ୍ରିଗ୍ବେଜଙ୍କ ୨୭ ଓ ଅଧିନାୟିକା ହରମନପ୍ରୀତ କୌରଙ୍କ ଅପରାଜିତ ୪୪ ରନ ବଳରେ ଭାରତ ସ୍ଥିତିକୁ ମଜଭୁତ କରିଛି। ଦ୍ୱିତୀୟ ଇନିଂସରେ ଦୀପ୍ତି ୨୦ ରନ କରିଥିଲେ। ଇଂଲଣ୍ଡ ପକ୍ଷରୁ ଚାର୍ଲି ଡିନ୍ ୪ଟି ଓ ସୋଫି ଏକଲେଷ୍ଟୋନ ୨ଟି ଉଇକେଟ ନେଇଥିଲେ।
