ମାଞ୍ଚେଷ୍ଟର,୨୩/୭(ପି.ଟି.): ଆଜିଠାରୁ ଓଲ୍ଡ ଟ୍ରାଫୋର୍ଡଠାରେ ଭାରତ ଓ ଇଂଲଣ୍ଡ ମଧ୍ୟରେ ଆଣ୍ଡରସନ-ତେନ୍ଦୁଲକର ଟ୍ରଫି(ଏଟିଟି) କ୍ରିକେଟ୍ ଟେଷ୍ଟ ସିରିଜ୍ର ଚତୁର୍ଥ ମ୍ୟାଚ୍ ଖେଳାଯିବ। ଏପର୍ଯ୍ୟନ୍ତ ସିରିଜ୍ରେ ୩ ମ୍ୟାଚ୍ ଖେଳାଯାଇଥିବା ବେଳେ ଇଂଲଣ୍ଡ ଏବେ ୨-୧ରେ ଆଗରେ ରହିଛି। ଏଣୁ ଏହି ମ୍ୟାଚ୍ ଶୁବମନ ଗିଲ୍ଙ୍କ ନେତୃତ୍ୱାଧୀନ ଭାରତୀୟ ଦଳ ପାଇଁ କର-ବା-ମର ସ୍ଥିତିରେ ଛିଡ଼ା ହୋଇଛି। ଦଳକୁ ୫ ଟେଷ୍ଟବିଶିଷ୍ଟ ସିରିଜ୍କୁ ବରାବର କରିବା ପାଇଁ ଏହି ମ୍ୟାଚ୍ରେ ନିଶ୍ଚିତ ବିଜୟ ଦରକାର। କିନ୍ତୁ ଓଲ୍ଡ ଟ୍ରାଫୋର୍ଡରେ ଭାରତ ପୂର୍ବରୁ କଦାପି କୌଣସି ଟେଷ୍ଟ ଜିତିନାହିଁ। ପୂର୍ବରୁ ଏଠାରେ ୯ ମ୍ୟାଚ୍ ଖେଳିଥିବା ଭାରତ ୪ଟିରେ ପରାଜିତ ହୋଇଥିବା ବେଳେ ୫ ମ୍ୟାଚ୍କୁ ଡ୍ର’ ରଖିଛି। ଏହି ରେକର୍ଡ ଅପେକ୍ଷା ଭାରତୀୟ ଦଳ ପାଇଁ ଟିମ୍ କମ୍ବିନେଶନ ଚିନ୍ତାର କାରଣ ପାଲଟିଛି। ଦଳରେ ଆହତ ଖେଳାଳିଙ୍କ ସଂଖ୍ୟା ବୃଦ୍ଧି ପାଇଥିବାରୁ ଚୂଡ଼ାନ୍ତ ଏକାଦଶରେ ଅନେକ ପରିବର୍ତ୍ତନ ଦେଖିବାକୁ ମିଳିବ।
ଲଡର୍ସ ଟେଷ୍ଟରେ ଖେଳିଥିବା ଅଲ୍ରାଉଣ୍ଡର ନୀତୀଶ କୁମାର ରେଡ୍ଡୀ ଓ ପେସର ଆକାଶ ଦୀପଙ୍କ ସହିତ ଅର୍ଶଦୀପ ସିଂ ଆହତ ହୋଇଛନ୍ତି। ଲିଡ୍ସରେ ପ୍ରଥମ ଟେଷ୍ଟରେ ପରାଜିତ ହେବା ପରେ ଭାରତୀୟ ଦଳ ଦ୍ୱିତୀୟ ଓ ତୃତୀୟ ମ୍ୟାଚ୍ରେ ୩ ଅଲ୍ରାଉଣ୍ଡର ରବୀନ୍ଦ୍ର ଜାଡେଜା, ଓ୍ବାଶିଂଟନ ସୁନ୍ଦର ଓ ନୀତୀଶଙ୍କୁ ଏକାଠି ଖେଳାଇଥିଲା। ପ୍ରଥମ ଟେଷ୍ଟରେ ଖେଳିଥିବା ଶାର୍ଦ୍ଦୂଳ ଠାକୁର ସିଧାସଳଖ ନୀତୀଶଙ୍କ ବଦଳରେ ଚୂଡ଼ାନ୍ତ ଏକାଦଶରେ ସ୍ଥାନ ପାଇପାରନ୍ତି। ହରିୟାଣା ପେସର ଅଂଶୁଲ କାମ୍ବୋଜ୍ଙ୍କୁ ପଦାର୍ପଣ ସୁଯୋଗ ମିଳିପାରେ। ଗ୍ରୋଇନ୍ ଇଞ୍ଜୁରି କାରଣରୁ ଆକାଶ ଏହି ମ୍ୟାଚ୍ରୁ ବାଦ୍ ପଡ଼ିଛନ୍ତି। ତେବେ କାମ୍ବୋଜ୍ ଓ ପ୍ରସିଦ୍ଧ କ୍ରିଷ୍ଣାଙ୍କ ମଧ୍ୟରୁ ଜଣଙ୍କୁ ତୃତୀୟ ପେସର ଭାବେ ଖେଳାଯିବ। ଆକାଶଙ୍କ ଭଳି କାମ୍ବୋଜ୍ଙ୍କ ନିକଟରେ ବଲ୍ରୁ ପ୍ରଚୁର ସିମ୍ ମୁଭ୍ମେଣ୍ଟ ହାସଲ କରିବାର ଦକ୍ଷତା ରହିଛି। ସେ ନିକଟରେ ଇଂଲଣ୍ଡ ଲାୟନ୍ସ ବିପକ୍ଷରେ ଭାରତ ଏ’ ପାଇଁ ଭଲ ପ୍ରଦର୍ଶନ କରିଥିଲେ। ମ୍ୟାଚ୍ରେ ପ୍ରିମିୟର ପେସର ଯଶ୍ପ୍ରୀତ ବୁମ୍ରା ଓ ମହମ୍ମଦ ସିରାଜଙ୍କ ଖେଳିବା ପକ୍କା। ଲଡର୍ସ ଟେଷ୍ଟକୁ ଛାଡ଼ିଦେଲେ ସିରିଜ୍ରେ ପ୍ରଥମ ଦୁଇ ଟେଷ୍ଟରେ ଭାରତୀୟ ବ୍ୟାଟରମାନେ ଭଲ ପ୍ରଦର୍ଶନ କରିଥିଲେ। ବ୍ୟାଟରଙ୍କ ମଧ୍ୟରେ ଅଧିନାୟକ ଗିଲ୍, ଭେଟେରାନ ଓପ୍ନର ଲୋକେଶ ରାହୁଲ, ଉଇକେଟ୍କିପର ରିଷଭ ପନ୍ତ, ଯୁବ ଓପ୍ନର ଯଶସ୍ବୀ ଜୟସ୍ବାଲ ଭଲ ଫର୍ମରେ ରହିଛନ୍ତି। କିନ୍ତୁ ବ୍ୟାଟିଂ ଲାଇନ୍ରେ କେବଳ ଗୋଟିଏ ପରିବର୍ତ୍ତନ କରାଯିବ ବୋଲି ଆଶା କରାଯାଉଛି। ପ୍ରଥମ ୩ ଟେଷ୍ଟରେ କରୁନ ନାୟାର ଆଖିଦୃଶିଆ ପ୍ରଦର୍ଶନ କରିବାରେ ବିଫଳ ହୋଇଛନ୍ତି। ଯଦି ତାଙ୍କୁ ବାଦ୍ ଦିଆଯାଏ, ତେବେ ସାଇ ସୁଦର୍ଶନଙ୍କୁ ଦଳରେ ସାମିଲ କରାଯିବ। ଯଦି ନାୟାରଙ୍କୁ ଆଉ ଏକ ସୁଯୋଗ ଦିଆଯାଏ, ତେବେ ତାଙ୍କୁ ବଡ଼ ଇନିଂସ ଖେଳିବାକୁ ପଡ଼ିବ। ନ ହେଲେ ଏହା ତାଙ୍କ କ୍ୟାରିୟରର ଅନ୍ତିମ ଟେଷ୍ଟ ହୋଇପାରେ। ଗତ ମ୍ୟାଚ୍ରେ ଆହତ ସମସ୍ୟା ଯୋଗୁ ଉଇକେଟ୍ କିପିଂ କରି ନ ଥିବା ପନ୍ତ ଏବେ ପୂରା ଫିଟ୍ ଅଛନ୍ତି। ସେ ଟ୍ରେନିଂ ସେସନରେ ନିଜ ଫିଟ୍ନେସ୍ର ପ୍ରମାଣ ଦେଇଛନ୍ତି। ଲଗାତର ୪ ଅର୍ଦ୍ଧଶତକ ହାସଲ କରିଥିବା ଜାଡେଜା ଲୋୟର ମିଡଲ ଅର୍ଡର ସମ୍ଭାଳିବେ। କିନ୍ତୁ ବଲ୍ରେ ତାଙ୍କଠାରୁ ଅଧିକ ଯୋଗଦାନର ଆଶା କରାଯାଉଛି।
ଭାରତୀୟ ଦଳ ଇଂଲଣ୍ଡର ଅନ୍ୟ ଭେନ୍ୟୁ ଅପେକ୍ଷା ଓଲ୍ଡ ଟ୍ରାଫୋର୍ଡରେ ନିୟମିତ ଖେଳେନାହିଁ। ଭାରତ ଅନ୍ତିମଥର ୨୦୧୪ରେ ଏଠାରେ ଟେଷ୍ଟ ମ୍ୟାଚ୍ ଖେଳିଥିଲା। ଏହି ଭେନ୍ୟୁରେ ଅନ୍ତିମ ଭାରତୀୟ ବ୍ୟାଟର ଭାବେ ଶତକ କରିବାର ରେକର୍ଡ ସଚିନ ତେନ୍ଦୁଲକରଙ୍କ ନାମରେ ରହିଛି, ଯାହାକି ସେ ୧୯୯୦ ଟୁର୍ରେ କରିଥିଲେ। ଗତ ସପ୍ତାହରେ ମାଞ୍ଚେଷ୍ଟରରେ ନିୟମିତ ବର୍ଷା ହୋଇଛି। ଏଣୁ ମ୍ୟାଚ୍ରେ ବର୍ଷାର ପ୍ରଭାବ ଦେଖିବାକୁ ମିଳିପାରେ। ଅନ୍ୟପକ୍ଷରେ ସିରିଜ୍ରେ ଡ୍ରାଇଭର ସିଟ୍ରେ ଥିବା ଘରୋଇ ଇଂଲଣ୍ଡ ତା’ର ଚୂଡ଼ାନ୍ତ ଏକାଦଶ ଘୋଷଣା କରିସାରିଛି।
ସମ୍ଭାବ୍ୟ ଭାରତୀୟ ଦଳ: ଯଶସ୍ବୀ ଜୟସ୍ବାଲ, ଲୋକେଶ ରାହୁଲ, କରୁନ ନାୟାର/ସାଇ ସୁଦର୍ଶନ, ଶୁବମନ ଗିଲ୍(ଅଧିନାୟକ), ରିଷଭ ପନ୍ତ(ଉଇକେଟ୍କିପର ଓ ଉପ ଅଧିନାୟକ), ରବୀନ୍ଦ୍ର ଜାଡେଜା, ଓ୍ବାଶିଂଟନ ସୁନ୍ଦର, ଶାର୍ଦ୍ଦୂଳ ଠାକୁର, ମହମ୍ମଦ ସିରାଜ, ଯଶ୍ପ୍ରୀତ ବୁମ୍ରା, ଅଂଶୁଲ କାମ୍ବୋଜ୍/ପ୍ରସିଦ୍ଧ କ୍ରିଷ୍ଣା।
ଇଂଲଣ୍ଡ ଏକାଦଶ: ଜ୍ୟାକ୍ କ୍ରଲି, ବେନ୍ ଡକେଟ, ଓଲି ପୋପ୍, ଜୋ ରୁଟ୍, ହ୍ୟାରୀ ବ୍ରୁକ, ବେନ୍ ଷ୍ଟୋକ୍ସ (ଅଧିନାୟକ), ଜେମି ସ୍ମିଥ୍(ଉଇକେଟ୍କିପର), ଲିଆମ ଡସନ, କ୍ରିସ୍ ଓ୍ବକ୍ସ, ବ୍ରାଇଡନ କାର୍ସ, ଜୋଫ୍ରା ଆର୍ଚ୍ଚର।
