ନୂଆଦିଲ୍ଲୀ,୧୧।୧୧: ପୂର୍ବ ଲଦାଖର ଏଲ୍ଏସିରେ ଭାରତ ଚାଇନା ମଧ୍ୟରେ ସୃଷ୍ଟି ହୋଇଥିବା ବିବାଦର ସମାଧାନ ଖୁବ୍ ଶୀଘ୍ର ହେବ ବୋଲି କୁହାଯାଉଛି। ଦୀପାବଳି ପୂର୍ବରୁ ଦୁଇ ପକ୍ଷ ବିବାଦୀୟ ଅଞ୍ଚଳରୁ ପଛକୁ ହଟିବେ ବୋଲି ସହମତି ପ୍ରକାଶ କରିଛନ୍ତି। ଫିଙ୍ଗର ଏବଂ ପୋଙ୍ଗାଙ୍ଗ୍ ହ୍ରଦ ଅଞ୍ଚଳକୁ ଖାଲି କରି ନିଜ ନିଜର ପୂର୍ବ ସ୍ଥିତିକୁ ଫେରିଯିବାକୁ ଦୁଇପକ୍ଷ ରାଜି ହୋଇଛନ୍ତି। ସରକାରୀ ସୂତ୍ର ଅନୁସାରେ ପୋଙ୍ଗାଙ୍ଗ୍ର ଉତ୍ତର ଏବଂ ଦକ୍ଷିଣ ଅଞ୍ଚଳରୁ ଭାରତ ନିଜ ସେନାଙ୍କୁ ହଟାଇବ। ସେହିପରି ଚାଇନା ମଧ୍ୟ ସେନ୍ୟ ବାହିନୀଙ୍କୁ ପଛକୁ ନେଇଯିବ। ସୀମାରେ ଶାନ୍ତି ପାଇଁ ଭାରତ ଚାଇନା ମଧ୍ୟରେ ତ୍ରିସ୍ତରୀୟ ଯୋଜନା ଉପରେ ସହମତି ପ୍ରକାଶ ପାଇଛି। ପୋଙ୍ଗାଙ୍ଗ୍ ଅଞ୍ଚଳରୁ ସୈନ୍ୟ, ଟ୍ୟାଙ୍କ ସମେତ ଅନ୍ୟ ସରଞ୍ଜାମକୁ ଫେରାଇ ଅଣାଯିବ। ଦୁଇପକ୍ଷ ନିଜର ୩୦ ପ୍ରତିଶତ ସୈନ୍ୟବଳ ବିବାଦୀୟ ଅଞ୍ଚଳରୁ ହଟାଇବେ। ୩ ଦିନ ପର୍ଯ୍ୟନ୍ତ ଏହି ପ୍ରକ୍ରିୟା ଜାରି ରହିବ। ଚାଇନା ଫିଙ୍ଗର-୮ ଅଞ୍ଚଳରୁ ପଛକୁ ଫେରିବ। ସେହିପରି ଭାରତୀୟ ସେନା ଧାନ ସିଂ ଥାପା ପୋଷ୍ଟକୁ ଫେରି ଆସିବେ। ଉତ୍ତେଜନା ସମୟରେ ଚୁଶୁଲ ଏବଂ ରେଜାଙ୍ଗ୍ ଲା ପାହାଡ଼ରେ ଅଧିକୃତ ହୋଇଥିବା ଅଞ୍ଚଳକୁ ଉଭୟ ପକ୍ଷ ଖାଲି କରିବେ ବୋଲି ସରକାରୀ ସୂତ୍ରରୁ ଜଣାପଡ଼ିଛି।
