କୋଲକାତା,୬।୩: ପଶ୍ଚିମବଙ୍ଗ ସରକାର କୋଲକାତା ହାଇକୋର୍ଟଙ୍କ ନିର୍ଦ୍ଦେଶ ସତ୍ତ୍ୱେ ନିଲମ୍ବିତ ଟିଏମ୍ସି ନେତା ଶେଖ ଶାହଜାହାଁଙ୍କୁ ସିବିଆଇକୁ ହସ୍ତାନ୍ତର କରିବାକୁ ମନା କରି ଦେଇଛନ୍ତି। ଶାହଜାହାଁଙ୍କୁ ଗିରଫ କରିବା ଲାଗି ସିବିଆଇ ଅଧିକାରୀଙ୍କ ଏକ ଟିମ୍ ଭବାନୀ ଭବନରେ ପହଞ୍ଚିଥିଲା, ଯାହାକି ରାଜ୍ୟ ପୋଲିସ ମୁଖ୍ୟାଳୟ ଅଟେ। ହେଲେ କିନ୍ତୁ ସରକାର ତାଙ୍କୁ ହସ୍ତାନ୍ତର କରିବାକୁ ମନା କରିବାରୁ ଟିମ୍ ଖାଲି ହାତରେ ଫେରିଛି। ଏଥିସହ ସରକାରଙ୍କ ପକ୍ଷରୁ ହାଇକୋର୍ଟଙ୍କ ଆଦେଶ ବିରୋଧରେ ସୁପ୍ରିମକୋର୍ଟରେ ଆବେଦନ କରାଯାଇଛି। ତେଣୁ ସର୍ବୋଚ୍ଚ ଅଦାଲତଙ୍କ ନିର୍ଦ୍ଦେଶ ପୂର୍ବରୁ ରାଜ୍ୟ ସରକାର ଶାହଜାହାଁଙ୍କୁ ସିବିଆଇକୁ ହସ୍ତାନ୍ତର କରିପାରିବେ ନାହିଁ ବୋଲି କହିଛନ୍ତି।
କହିରଖୁଛୁ, ଜାନୁଆରୀ ୫ରେ ସନ୍ଦେଶଖାଲିରେ ଇଡି ଅଧିକାରୀଙ୍କୁ ଆକ୍ରମଣ କରିବା ଘଟଣାରେ ପୋଲିସ ଶାହଜାହାଁଙ୍କୁ ଗିରଫ କରିଥିଲା। ତାଙ୍କ ବିରୋଧରେ ଶତାଧିକ ମହିଳା ଯୌନ ନିର୍ଯାତନା ଦେବା ଓ ସେମାନଙ୍କ ଜମି ହଡ଼ପ ଅଭିଯୋଗ ଆଣିଥିଲେ। ସେ ୫୫ ଦିନ ଧରି ଫେରାର ରହିବା ପରେ ଗତ ବୁଧବାର ମଧ୍ୟରାତ୍ରରେ ତାଙ୍କୁ ଗିରଫ କରାଯାଇଥିଲା। ଏବେ ସେ ବେଙ୍ଗଲ ପୋଲିସର ସିଆଇଡି ହେପାଜତରେ ଅଛନ୍ତି। ଉକ୍ତ ମାମଲାର ତଦନ୍ତ ଦାୟିତ୍ୱ ହାଇକୋର୍ଟ ସିବିଆଇକୁ ଦେବା ସହ ଶାହଜାହାଁଙ୍କୁ ଦିନ ୪.୩୦ ସୁଦ୍ଧା କେନ୍ଦ୍ରୀୟ ତଦନ୍ତକାରୀ ସଂସ୍ଥାକୁ ହସ୍ତାନ୍ତର କରିବାକୁ କହିଥିଲେ। ତଥାପି ବେଙ୍ଗଲ ସରକାର କୋର୍ଟଙ୍କ ନିର୍ଦ୍ଦେଶକୁ ଖାତିର କରି ନାହାନ୍ତି।
