କଟକ,୯।୧୨: ପ୍ରଥମ ଟି-୨୦ରେ ପ୍ରଥମେ ବ୍ୟାଟିଂ କରି ଭାରତ ୧୭୫ ରନ କରିଛି। ହାର୍ଦ୍ଦିକ ପାଣ୍ଡ୍ୟା ଦଳକୁ ୫୯ ରନର ଚମତ୍କାର ସ୍କୋରରେ ପହଞ୍ଚାଇଛନ୍ତି। ସଙ୍କଟରେ ପଡିଥିବା ବେଳେ ଶେଷରେ ଧମାକାଦାର ବ୍ୟାଟିଂ କରିଥିଲେ ପାଣ୍ଡ୍ୟା । ନିୟମିତ ବ୍ୟବଧାନରେ ଓ୍ବିକେଟ ପଡିବାରୁ ଦଳ ସଙ୍କଟରେ ପଡିଥିବା ବେଳେ ଏକାକି ଛକା-ଚୌକା ବର୍ଷା କରିଥିଲେ ପାଣ୍ଡ୍ୟା । ଟସ୍ ଜିତି ପ୍ରଥମେ ବୋଲିଂ ନିଷ୍ପତ୍ତି ନେଇଥିଲା ଦକ୍ଷିଣ ଆଫ୍ରିକା । ପ୍ରଥମେ ବ୍ୟାଟିଂ ପାଇଁ ଆମନ୍ତ୍ରିତ ହୋଇଥିବା ଭାରତ ନିର୍ଦ୍ଧାରିତ ଓଭରରେ ୬ ଓ୍ବିକେଟ ହରାଇ ସଂଗ୍ରହ କରିଛି ୧୭୫ ରନ୍ । ହାର୍ଦ୍ଦିକ ପାଣ୍ଡ୍ୟା ଶେଷରେ ଧମାକାଦାର ବ୍ୟାଟିଂ କରିବା ସହିତ ଦଳର ସ୍କୋରକୁ ମଜବୁତ ସ୍ଥିତିରେ ପହଞ୍ଚାଇଥିଲେ ।
ଶୁଭମନ ଗିଲ, ଅଧିନାୟକ ସୂର୍ଯ୍ୟକୁମାର ଯାଦବ ଏବଂ ଅଭିଷେକ ଶର୍ମା ମଧ୍ୟ ବଡ଼ ସ୍କୋର କରିପାରି ନାହାନ୍ତି। ଏହି ସମୟରେ, ଦକ୍ଷିଣ ଆଫ୍ରିକା ପାଇଁ ଲୁଙ୍ଗି ଏନଗିଡି ତିନି ଜଣ ଭାରତୀୟ ବ୍ୟାଟସମ୍ୟାନଙ୍କୁ ଆଉଟ କରି ବିପର୍ଯ୍ୟୟ ଘଟାଇଛନ୍ତି। ଦକ୍ଷିଣ ଆଫ୍ରିକା ପକ୍ଷରୁ ଲୁଙ୍ଗି ଏନଗିଡି ୪ ଓଭରରେ ୩୧ ରନ୍ ଦେଇ ସର୍ବାଧିକ ୩ଟି ଓ୍ବିକେଟ ନେଇଥିବା ବେଳେ ମାର୍କୋ ଜନସେନ ୪ ଓଭରରେ ୨୩ ରନ, ଲୁଥୋ ସିପାମ୍ଲା ୪ ଓଭରରେ ୩୮ ରନ ୨ଟି ଓ୍ବିକେଟ, ଏନରିଚ୍ ନୋର୍କିୟା ୪ ଓଭରାରେ ୪୧ ରନ, କେଶବ ମହାରାଜ ୨ ଓଭରରେ ୨୫ ରନ୍ ଏବଂ ଡୋନୋଭାନ୍ ଫେରେରିଆ ୨ ଓଭରରେ ୧୩ ରନ୍ ଦେଇ ଗୋଟିଏ ସଫଳା ପାଇଥିଲେ ।
ସାଧାରଣତଃ ଟିମ ଇଣ୍ଡିଆ ପାଇଁ ଦ୍ରୁତ ଆରମ୍ଭ ଯୋଗାଉଥିବା ଅଭିଷେକ ଶର୍ମା ୧୭ ରନ କରି ଆଉଟ ହୋଇଥିଲେ। ଦିନିକିଆ ସିରିଜ ହରାଇବା ପରେ ଫେରିଥିବା ଶୁଭମନ ଗିଲ ମାତ୍ର ଚାରି ରନ କରି ଖରାପ ପ୍ରଦର୍ଶନ କରିଥିଲେ। ଅଧିନାୟକ ସୂର୍ଯ୍ୟକୁମାର ଯାଦବଙ୍କ ଫ୍ଲପ ଶୋ ଜାରି ରହିଥିଲା। ସେ ଆସିବା ମାତ୍ରେ ଚୌକା ଏବଂ ଛକା ମାରି ଦର୍ଶକଙ୍କ ହୃଦୟ ଜିତିଥିଲେ, କିନ୍ତୁ ସେ ମଧ୍ୟ ମାତ୍ର ୧୨ ରନ କରିପାରିଥିଲେ।
