ନୂଆଦିଲ୍ଲୀ,୩।୧: ନ୍ୟୁଜିଲାଣ୍ଡ ବିପକ୍ଷରେ ଦିନିକିଆ ସିରିଜ୍ ପାଇଁ ଟିମ୍ ଇଣ୍ଡିଆ ଘୋଷଣା କରାଯାଇଛି । ଏକ ଆଶ୍ଚର୍ଯ୍ୟଜନକ ନିଷ୍ପତ୍ତି ନେଇ ଚୟନକର୍ତ୍ତାମାନେ ତିଲକ ବର୍ମା ଏବଂ ଋତୁରାଜ ଗାୟକୱାଡଙ୍କୁ ଦଳରୁ ବାଦ ଦେଇଛନ୍ତି । ବଡ଼ ଖବର ହେଉଛି ଶ୍ରେୟସ ଆୟର ଦଳକୁ ଫେରିଛନ୍ତି । ନୀତିଶ ରେଡ୍ଡୀ, ଦ୍ରୁତ ବୋଲର ମହମ୍ମଦ ସିରାଜ ମଧ୍ୟ ଦଳକୁ ଫେରିଛନ୍ତି। ଶୁଭମନ ଗିଲ୍ ଅଧିନାୟକ ହେବେ ।
ଅଷ୍ଟ୍ରେଲିଆ ଗସ୍ତରେ ODI ସିରିଜ୍ ସମୟରେ ଶ୍ରେୟସ ଆୟର ଆହତ ହୋଇଥିଲେ। ସେ ଦୁଇ ମାସ ଧରି ଖେଳରୁ ବାହାରେ ରହିଛନ୍ତି । ତଥାପି ସେ ଗତ ୧୦ ଦିନ ମଧ୍ୟରେ BCCIର ସେଣ୍ଟର ଅଫ୍ ଏକ୍ସଲେନ୍ସରେ ତାଙ୍କର ଫିଟନେସ୍ ଫେରି ପାଇଛନ୍ତି । ଆୟରଙ୍କୁ ନ୍ୟୁଜିଲାଣ୍ଡ ବିପକ୍ଷ ODI ସିରିଜରେ ସାମିଲ କରାଯାଇଛି, କିନ୍ତୁ ଯଦି ସେ ଜାନୁଆରୀ ୬ ତାରିଖରେ ବିଜୟ ହଜାରେ ଟ୍ରଫି ମ୍ୟାଚ୍ ପାଇଁ ସମ୍ପୂର୍ଣ୍ଣ ଫିଟ୍ ନ ହୁଅନ୍ତି, ତେବେ ସେ ଦଳରୁ ବାହାର ହୋଇପାରନ୍ତି ।
ଶ୍ରେୟସ ଆୟରଙ୍କ ପ୍ରତ୍ୟାବର୍ତ୍ତନ ଅର୍ଥ ଗାୟକୱାଡଙ୍କୁ ବାଦ ଦିଆଯାଇଛି । ଦକ୍ଷିଣ ଆଫ୍ରିକା ବିପକ୍ଷ ODI ସିରିଜରେ ଏହି ଖେଳାଳିଙ୍କର ଉଲ୍ଲେଖନୀୟ ବ୍ୟାଟିଂ ପ୍ରଦର୍ଶନ ଥିଲା। ସେ ୪ ନମ୍ବରରେ ବ୍ୟାଟିଂ କରି ଶତକ ହାସଲ କରିଥିଲେ। ଗାୟକୱାଡଙ୍କ ଶତକ ପରେ ଦଳରୁ ବାଦ ପଡ଼ିବା ଟିକେ ଦୁର୍ଭାଗ୍ୟଜନକ ଥିଲା। ଟିମ୍ ଇଣ୍ଡିଆ ଦଳରେ ତିନି ଜଣ ଅଲରାଉଣ୍ଡର, ଚାରି ଜଣ ଦ୍ରୁତ ବୋଲର, ଦୁଇ ଜଣ ୱିକେଟକିପର ଏବଂ ଛଅ ଜଣ ବ୍ୟାଟସମ୍ୟାନଙ୍କୁ ସାମିଲ କରିଛି ।
ଭାରତୀୟ ଟିମରେ ଶୁଭମାନ ଗିଲ (ଅଧିନାୟକ), ରୋହିତ ଶର୍ମା, ବିରାଟ କୋହଲି, କେ.ଏଲ୍ ରାହୁଲ, ଶ୍ରେୟସ୍ ଆୟର, ୱାଶିଂଟନ୍ ସୁନ୍ଦର, ରବୀନ୍ଦ୍ର ଜାଡେଜା, ମହମ୍ମଦ ସିରାଜ, ହର୍ଷିତ ରାଣା, ପ୍ରସାଦ କୃଷ୍ଣ, କୁଲଦୀପ ଯାଦବ, ଋଷଭ ପନ୍ତ, ନୀତୀଶ କୁମାର ରେଡ୍ଡୀ, ଅର୍ଶଦୀପ ସିଂ ଏବଂ ଯଶ୍ବସ୍ବୀ ଜୟସଓ୍ବାଲ ରହିଛନ୍ତି ।
