ବେଙ୍ଗାଲୁରୁ,୬।୧୦: ଭବିଷ୍ୟତର ବୈଷୟିକ ଜ୍ଞାନକୌଶଳରେ ଭାରତକୁ ଆଗକୁ ନେବା ଏବଂ କେବଳ ଜଣେ ଉପଯୋଗକର୍ତ୍ତା ନୁହେଁ ବରଂ ନେତୃତ୍ୱକର୍ତ୍ତା ହେବା ପାଇଁ ବେଙ୍ଗାଲୁରୁରେ ଦେଶର ପ୍ରଥମ ଲାଇଭ ୬ଜି ଲ୍ୟାବ ଆରମ୍ଭ କରାଯାଇଛି। କେନ୍ଦ୍ର ଟେଲିକମ ମନ୍ତ୍ରୀ ଅଶ୍ୱିନୀ ବୈଷ୍ଣବ ଏହି ନୋକିଆ ୬ଜି ପ୍ରୟୋଗଶାଳାକୁ ଉଦଘାଟନ କରିଛନ୍ତି। ଏହା ମାଧ୍ୟମରେ ଏକାଡେମିକ ଠାରୁ ଆରମ୍ଭ କରି ଷ୍ଟାର୍ଟଅପ ପର୍ଯ୍ୟନ୍ତ ସମସ୍ତେ ଟେକ୍ନୋଲୋଜିର ବିକାଶ ସହିତ ଜଡିତ କାର୍ଯ୍ୟ ଏବଂ ଅନୁସନ୍ଧାନ କାର୍ଯ୍ୟକଳାପ କରିବାକୁ ସକ୍ଷମ ହେବେ। ଏହା ବ୍ୟତୀତ ବୈଷୟିକ ମାନକ ଏବଂ ଉପଯୋଗୀତା କ୍ଷେତ୍ରରେ ମଧ୍ୟ କାର୍ଯ୍ୟ କରାଯିବ।
ଏହି ଅବସରରେ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ଡିଜିଟାଲ ଇଣ୍ଡିଆ ଆମ ସମସ୍ତ ଭାରତୀୟଙ୍କ ଜୀବନରେ ଗୁରୁତର ପ୍ରଭାବ ପକାଇଛି। ଭାରତକୁ ନବସୃଜନର କେନ୍ଦ୍ରରେ ପରିଣତ କରିବା ଆମର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦର୍ଶନ। ଏହା ଅଧୀନରେ ଭାରତ ଏବଂ ବିଶ୍ୱ ପାଇଁ ଡିଜିଟାଲ ଟେକ୍ନୋଲୋଜି ନିଜେ ବିକଶିତ ହେବ। ଏହି ଦିଗରେ ଆଉ ଏକ ପଦକ୍ଷେପ ନେଇ ବେଙ୍ଗାଲୁରୁରେ ଏହି ନୋକିଆ ୬ଜି ଲ୍ୟାବ ଆରମ୍ଭ ହେଉଛି। ଏଠାରୁ ପରିବହନ ସୁରକ୍ଷା, ଶିକ୍ଷା, ସ୍ବାସ୍ଥ୍ୟ ଇତ୍ୟାଦି ପାଇଁ ୬ଜି ଟେକ୍ନୋଲୋଜିର ଆକର୍ଷଣୀୟ ବ୍ୟବହାର ବିଷୟରେ ଅଧ୍ୟୟନ କରାଯିବ। ସମଗ୍ର ଡିଜିଟାଲ ଇଣ୍ଡିଆ ପାଇଁ ଏହା ଏକ ବଡ଼ ଅବଦାନ ହେବ।
