କେରଳର ଗିରିଜା କୁମାରୀ ମଧୁ ସ୍ନାୟବିକ ସମସ୍ୟା ଓ ମାନସିକ ଅନଗ୍ରସର ପିଲାଙ୍କ ଉନ୍ନତି ପାଇଁ କାର୍ଯ୍ୟ କରୁଛନ୍ତି। ସେ ରହୁଛନ୍ତି ଆଲପୁଝା ଜିଲା ଥାମାରାକୁଲାମ୍ରେ। ଗିରିଜା ମାନସିକ ଅନଗ୍ରସର ପିଲାଙ୍କୁ ଫୁଟ୍ବଲ ଖେଳ ଶିଖାଉଛନ୍ତି। ଏବେ ସୁଦ୍ଧା ତାଙ୍କ ପାଖରୁ ୨୫୦ ପିଲା ଫୁଟ୍ବଲ ଖେଳ ଶିଖି ସାରିଲେଣି। ଗିରିଜାଙ୍କ ଜନ୍ମ ଏକ କୃଷକ ପରିବାରରେ। ସେ ଦ୍ୱାଦଶ ଶ୍ରେଣୀ ଯାଏ ପଢ଼ିଛନ୍ତି। ୨୦୨୧ରେ ସେ ସେରିବ୍ରାଲ ପ୍ଲାଜି ସ୍ପୋଟର୍ସ ଆସୋସିଏଶନ ଗଠନ କରିଥିଲେ ଏବଂ ଗାଁର ଏକ ଛୋଟ ପଡ଼ିଆରେ ମାନସିକ ଅନଗ୍ରସର ପିଲାଙ୍କୁ ଖେଳ ଶିଖାଇବା ଆରମ୍ଭ କରିଥିଲେ। ଏଥିପାଇଁ ପ୍ରାରମ୍ଭରୁ ଆବଶ୍ୟକ ଅର୍ଥ ଯୋଗାଡ଼ କରିବା କଷ୍ଟକର ହୋଇଥିଲା, ଯେଉଁଥିପାଇଁ ସେ ତାଙ୍କ ସୁନା ଅଳଙ୍କାର ବନ୍ଧକ ରଖି ୨ ଲକ୍ଷ ଟଙ୍କା ସଂଗ୍ରହ କରିଥିଲେ। ଖେଳିବା ଯୋଗୁ ଏଭଳି ପିଲାଙ୍କ ମନରେ ସାହସ ଓ ବନ୍ଧୁତ୍ୱ ଭାବନା ବଢ଼ିଛି। ଗିରିଜା ଏହି ପିଲାଙ୍କୁ ନେଇ ଗଠନ କରିଥିବା ଟିମ୍ ଜାତୀୟସ୍ତରୀୟ ୫ ପ୍ରତିଯୋଗିତାରେ ଏପରିକି ଖେଲୋ ଇଣ୍ଡିଆ ପାରା ଗେମ୍ସ ୨୦୨୩ରେ ବିଜୟୀ ହୋଇଥିଲେ। ଖେଳିବା ଦ୍ୱାରା ପିଲାଙ୍କ ମାନସିକ ସ୍ଥିତି ଭଲ ରହୁଛି ବୋଲି କହନ୍ତି ଗିରିଜା। ଗିରିଜା ଏହି କାମ କରିବା ସହ ନିଜ ପରିବାର ଚଳାଇବାକୁ ଟେଲରିଂ ବିଜ୍ନେସ କରୁଛନ୍ତି।