ଡେରାବିଶ,୫।୪(ସ୍ବ.ପ୍ର.): ପୋଲିସକୁ ୩୫ ହଜାର ଟଙ୍କା ଦେଲେ ଧାର ଦେଇଥିବା ଲକ୍ଷାଧିକ ଟଙ୍କା ଫେରିପାଇବ ବୋଲି ସାନ୍ତ୍ୱନା ଦେଇ ସରପଞ୍ଚ ଉକ୍ତ ଟଙ୍କାକୁ ହଡ଼ପ କରିଥିବା ଅଭିଯୋଗ ଏବେ ସାମ୍ନାକୁ ଆସିଛି। ଏହି ଚର୍ଚ୍ଚିତ ଘଟଣା ବାବଦରେ କେନ୍ଦ୍ରାପଡ଼ା ସଦର ଥାନା ଅଧୀନ ବାଲିଆ, ଭାଗବତପୁର ଅଞ୍ଚଳର ପ୍ରସନ୍ନ କୁମାର ମହାନ୍ତି ଡେରାବିଶ ଥାନାରେ ଲିଖିତ ଅଭିଯୋଗ କରିଛନ୍ତି। ପୋଲିସ ନଁା କହି ଟଙ୍କା ହଡ଼ପ କରିଥିବା ବ୍ୟକ୍ତି ହେଉଛନ୍ତି ଉକ୍ତ ଥାନା ଅନ୍ତର୍ଗତ କାଉପଡ଼ା ସରପଞ୍ଚ ପ୍ରତାପ ବେହେରା। ତେବେ ଏହି ଅଭିଯୋଗକ୍ରମେ ସମ୍ପୃକ୍ତ ସରପଞ୍ଚଙ୍କ ସହ ଅନ୍ୟ ଜଣଙ୍କ ନାମରେ ଥାନାରେ ମାମଲା ରୁଜୁ କରାଯାଇଛି।
ଅଭିଯୋଗ ଅନୁଯାୟୀ, କାଉପଡ଼ା ପଞ୍ଚାୟତ ଅଧୀନ ବାଘିଲୋ ବାବନପୁର ଅଞ୍ଚଳର ରାକେଶ ନାଥଶର୍ମା ପ୍ରସନ୍ନଙ୍କଠାରୁ ୩ ବର୍ଷ ପୂର୍ବେ କୌଣସି କାମ ପାଇଁ ୨ ଲକ୍ଷ ଟଙ୍କା ଧାରସୂତ୍ରରେ ଆଣିଥିଲେ। ହେଲେ ଧାର ଟଙ୍କା ନ ଫେରାଇବାରୁ ପ୍ରସନ୍ନ ରାକେଶଙ୍କୁୁ ଏ ବାବଦରେ ତାଗିଦା କରିଥିଲେ। ହେଲେ ରାକେଶ ଟଙ୍କା ବାବଦରେ କୌଣସି କର୍ଣ୍ଣପାତ କରି ନ ଥିଲେ। ଶେଷରେ ପ୍ରସନ୍ନ ଏ ନେଇ ରାକେଶଙ୍କ ପରିବାର ଲୋକଙ୍କୁ ଜଣାଇଥିଲେ। ସେମାନେ ମଧ୍ୟ ଏ ବାବଦରେ କୌଣସି ପଦକ୍ଷେପ ନ ଥିଲେ। ଶେଷରେ ପ୍ରସନ୍ନ ସରପଞ୍ଚ ପ୍ରତାପଙ୍କ ନିକଟରେ ଗୁହାରି କରିଥିଲେ। ପ୍ରତାପ ଉଧାର ଟଙ୍କା ଫେରି ପାଇବାକୁ ହେଲେ ସେ ଯାହା ଉପାୟ ବତାଇବେ ସେହି ଅନୁଯାୟୀ କାମ କରିବାକୁ ପ୍ରସନ୍ନଙ୍କୁ ପରାମର୍ଶ ଦେଇଥିଲେ। ହେଲେ କିଛିଦିନ ପରେ ପ୍ରତାପ ପ୍ରସନ୍ନଙ୍କୁ ୩୫ ହଜାର ଦେଲେ ସେ ପୋଲିସକୁ ଏହା ଦେଇ ଉଧାର ବାବଦ ଟଙ୍କା ରାକେଶଙ୍କଠାରୁ ଆଦାୟ କରିଦେବେ ବୋଲି କହିଥିଲେ। ପରେ ପ୍ରସନ୍ନ ସରପଞ୍ଚ ପ୍ରତାପଙ୍କୁ ଟଙ୍କା ଦେଇଥିଲେ। ମାସାଧିକ ବିତିଗଲା ପରେ ମଧ୍ୟ ଉଧାର ଟଙ୍କା ଫେରି ନ ପାଇବାରୁ ପ୍ରସନ୍ନ ପ୍ରତାପଙ୍କୁ ଦେଖା କରି ପଚାରିବାରୁ ସେ ବିଭିନ୍ନ ଆଳ ଦେଖାଇ ମାମଲାକୁ ଗଡ଼ାଇ ଚାଲିଥିଲେ। ହେଲେ ପୋଲିସକୁ ଟଙ୍କା ନ ଦେଇ ନିଜେ ହଡ଼ପ କରି ଦେଇଥିବା ଜଣାପଡିଥିଲା। ଏ ସମ୍ପର୍କରେ କୌଣସି ସୂତ୍ରରୁ ସୂଚନା ପାଇ ପ୍ରସନ୍ନ ଘଟଣା ବାବଦରେ ଏବଂ ଟଙ୍କା ଉଧାରକାରୀ ରାକେଶ ଓ ସରପଞ୍ଚ ପ୍ରତାପଙ୍କ ବିରୋଧରେ ଡେରାବିଶ ଥାନାରେ ଲିଖିତ ଅଭିଯୋଗ କରିଥିଲେ। ଏ ନେଇ ନଂ.୨୮/୨୩ରେ ସରପଞ୍ଚ ପ୍ରତାପ ଓ ଟଙ୍କା ଉଧାରକାରୀ ରାକେଶଙ୍କ ବିରୋଧରେ ମାମଲା ରୁଜୁ କରିଥିବା ପୋଲିସ ସୂତ୍ରରୁ ଜଣାଯାଇଛି। ଏ ସମ୍ପର୍କରେ ସରପଞ୍ଚ ପ୍ରତାପଙ୍କୁ ପଚାରିବାରେ ପ୍ରସନ୍ନଙ୍କଠାରୁ ସେ ଧାର ଆକାରରେ ୩୫ ହଜାର ଟଙ୍କା ନେଇଥିଲେ। ଏହାକୁ ସେ ପରିଶୋଧ କରି ଦେଇଥିବା କହିଛନ୍ତି। ରାକେଶଙ୍କ ଧାର ଟଙ୍କା ଦେବା ଘଟଣା ବାବଦରେ ସେ ଜାଣିନାହାନ୍ତି। ପ୍ରସନ୍ନ ଏ ନେଇ ତାଙ୍କ ପାଖରେ କୌଣସି ଅଭିଯୋଗ କରି ନ ଥିବା ସେ କହିଛନ୍ତି। ଅପରପକ୍ଷରେ ପ୍ରସନ୍ନ ତାଙ୍କୁ ଏହି ମାମଲାରେ ମିଥ୍ୟା କେସ୍ରେ ଫସାଇଥିବା ଓ ସେ ଏହି ମାମଲାରେ ହାଇକୋର୍ଟରୁ ବେଲ ପାଇ ସାରିଥିବା ନେଇ ପ୍ରତିକ୍ରିୟାରେ କହିଛନ୍ତି।
