ମୁମ୍ବାଇ,୫।୧୦ : ଡେଙ୍ଗୁ ମହାରାଷ୍ଟ୍ରର ପୁଣେ ସହରରେ ଆତଙ୍କ ସୃଷ୍ଟି କରିଛି। ତେବେ ସେରୋ ସର୍ଭେରୁ ଜଣାପଡ଼ିଛି ୮୮ ପ୍ରତିଶତ ଲୋକଙ୍କ ମଧ୍ୟରେ ଡେଙ୍ଗୁ ଆଣ୍ଟିବଡି ଚିହ୍ନଟ କରାଯାଇଛି। ଏହି ଫଳାଫଳକୁ ଆଧାର କରି ଇଣ୍ଡିଆନ ସେଣ୍ଟର ଫର ମେଡିକାଲ ରିସର୍ଚ୍ଚ (ଆଇସିଏମଆର) ଦେଶର ଅନ୍ୟ ସହରରେ ମଧ୍ୟ ସମାନ ସର୍ଭେ କରିବାକୁ ନିଷ୍ପତ୍ତି ନେଇଛି।
ସୂଚନା ଅନୁଯାୟୀ, ପୁଣେ ନ୍ୟାଶନାଲ ଇନଷ୍ଟିଚ୍ୟୁଟ ଅଫ ଭାଇରୋଲୋଜି (ଏନଆଇଭି) ର ଟିମ ଭାରତୀୟ ଜନସଂଖ୍ୟାରେ ଡେଙ୍ଗୁ ରୋଗର ସଠିକ ଆକଳନ କରିବା ପାଇଁ ଏକ ସେରୋ ସର୍ଭେ କରିଥିଲେ। ଏହି ସର୍ଭେରେ ଜଡିତ ଲୋକଙ୍କ ନମୁନା ନେଇ ଆଣ୍ଟିବଡି ପରୀକ୍ଷା କରାଯାଇଥିଲା। ଏହାକୁ ୨୦୦୯ର ଫଳାଫଳ ସହିତ ତୁଳନା କରାଯାଇଛି, ଯେଉଁଥିରେ ୬୨.୯ ପ୍ରତିଶତ ଲୋକ ଡେଙ୍ଗୁ ସଂକ୍ରମଣରେ ଆକ୍ରାନ୍ତ ହୋଇଥିଲେ।
ଆଇସିଏମଆର ଅନୁଯାୟୀ, କରୋନା ମହାମାରୀ ସମୟରେ ଜନସଂଖ୍ୟାରେ ସଂକ୍ରମଣର ପ୍ରକୃତ ବିସ୍ତାର ଜାଣିବା ପାଇଁ ଜାତୀୟ ସ୍ତରରେ ଏକ ସେରୋ ସର୍ଭେ କରାଯାଇଥିଲା। ଏହା ହେଉଛି ଏକ ସର୍ବେକ୍ଷଣ ଯେଉଁଥିରେ ଲୋକମାନେ ଅନିୟମିତ ଭାବରେ ମନୋନୀତ ହୁଅନ୍ତି ଏବଂ ସେମାନଙ୍କର ରକ୍ତ ନମୁନା ନିଆଯାଏ ଏବଂ ଆଣ୍ଟିବଡି ପରୀକ୍ଷା କରାଯାଏ ।
ବାସ୍ତବରେ, ବର୍ତ୍ତମାନ ଡେଙ୍ଗୁ ଭୁତାଣୁର ଚାରୋଟି ଷ୍ଟ୍ରେନ ଜନସଂଖ୍ୟାଙ୍କ ମଧ୍ୟରେ ରହିଛି। ଜର୍ନାଲ ଅଫ ଇନଫେକ୍ସନ ଆଣ୍ଡ ପବ୍ଲିକ ହେଲ୍ଥର ଆଗାମୀ ନଭେମ୍ବର ମାସରେ ପ୍ରକାଶିତ ଏହି ସେରୋ ସର୍ଭେ ଅଧ୍ୟୟନରେ, ଆଇସିଏମଆର ସୂଚନା ଦେଇଛି ପୁଣେ ସହରରେ ୧୬୫୪ ଜଣଙ୍କୁ ଚୟନ କରାଯାଇ ସେମାନଙ୍କର ନମୁନା ପରୀକ୍ଷା କରିବା ପରେ, ୮୮.୦୪ ପ୍ରତିଶତ ଜନସଂଖ୍ୟାଙ୍କ ଠାରେ ଆଣ୍ଟିବାଡି ମିଳିଛି।
ଏନଆଇଭିର ବରିଷ୍ଠ ବୈଜ୍ଞାନିକ ବାବାସାହେବ ଭି ତାଣ୍ଡଲେ କହିଛନ୍ତି ଭାରତୀୟ ଜନସଂଖ୍ୟାରେ ଡେଙ୍ଗୁ ରୋଗର ମାତ୍ରା ଅଧିକ। ପୁଣେର ସେରୋ ସର୍ଭେରେ ଏହାର ତଥ୍ୟ ଦେଖିବାକୁ ମିଳିଛି। ଦେଶର ଅନ୍ୟ ସହର ଏବଂ ଅଞ୍ଚଳରେ ମଧ୍ୟ ଏହିପରି ଏକ ସର୍ଭେ କରାଯିବା ଉଚିତ ଯାହା ଦ୍ୱାରା ଜାତୀୟ ସ୍ତରରେ ପ୍ରକୃତ ତଥ୍ୟ ହାସଲ କରାଯାଇପାରିବ।
