ପୋଙ୍ଗୟାଙ୍ଗ, ୧୫।୫ : ଉତ୍ତର କୋରିଆ ଏପରି ଏକ ଦେଶ ଯେଉଁଠାରେ ଏକଛତ୍ରବାନଦୀ ଶାସକ କିମ ଜୋଙ୍ଗ ଉନଙ୍କ ଅନୁମତି ବିନା ଗଛର ପତ୍ର ମଧ୍ୟ ପ୍ରବେଶ କରି ପାରେନା। ଯେତେବେଳେ ସମଗ୍ର ବିଶ୍ୱ କରୋନା ମହାମାରୀ ଦ୍ୱାରା ସଙ୍କଟରେ ପଡିଥିଲା, ସେତେବେଳେ ଉତ୍ତର କୋରିଆ ଦାବି କରିଥିଲା ଯେ ସେଠାରେ କରୋନାର କୌଣସି ମାମଲା ନାହିଁ । ତେଣୁ ଉତ୍ତର କୋରିଆର କରୋନା ଟିକା ଦରକାର ନାହିଁ । କିନ୍ତୁ ବର୍ତ୍ତମାନ ଉତ୍ତର କୋରିଆରେ ଏକ ରହସ୍ୟମୟ ଜ୍ୱର ସଂକ୍ରମଣ ହେଉଛି।
ଏହା ଶୀଘ୍ର ବ୍ୟାପିବାରେ ଲାଗିଛି। ଯଦିଓ ଏହାକୁ କରୋନା ମହମାରୀ ବୋଲି ଅନୁମାନ କରାଯାଉଛି। ଗତ ୨୪ ଘଣ୍ଟା ମଧ୍ୟରେ ୧୫ ଜଣଙ୍କ ମୃତ୍ୟୁ ପରେ, ଏହି ରହସ୍ୟମୟ ଜ୍ୱର ଯୋଗୁ ମୃତକଙ୍କ ସଂଖ୍ୟା ୪୨କୁ ବୃଦ୍ଧି ପାଇଛି। ଉତ୍ତର କୋରିଆର ପରିସ୍ଥିତି ଉପରେ ନଜର ରଖୁଥିବା ଏକ ଏଜେନ୍ସି ଅନୁଯାୟୀ, ଏହି ରହସ୍ୟମୟ ଜ୍ୱର ଯୋଗୁଁ ଫ୍ଲୁ ଭଳି ଲକ୍ଷଣ ଦେଖାଯାଉଛି। ଏହା ବ୍ୟତୀତ ଏହି ରହସ୍ୟମୟ ଜ୍ୱର ଅତି ଦ୍ରୁତ ଗତିରେ ବ୍ୟାପୁଛି ଏବଂ ଏପର୍ଯ୍ୟନ୍ତ ପ୍ରାୟ ସାଢ଼େ ୮ଲକ୍ଷରୁ ଅଧିକ ଲୋକ ଏଥିରେ ଆକ୍ରାନ୍ତ ହୋଇସାରିଲେଣି।
ଦୁଇ ବର୍ଷରୁ ଅଧିକ ସମୟ ଧରି କରୋନା ଠାରୁ ଦୂରେଇ ରହିଥିବା ଉତ୍ତର କୋରିଆ ଗୁରୁବାର ଦେଶରେ କୋଭିଡ ସଂକ୍ରମିତ ଲୋକଙ୍କୁ ଚିହ୍ନଟ କରାଯାଇଥିବା ସମ୍ପର୍କରେ ଘୋଷଣା କରିଥିଲା। କୋରିଆ ସେଣ୍ଟ୍ରାଲ ନ୍ୟୁଜ ଏଜେନ୍ସି କହିଛି ଯେ ଫ୍ଲୁ ଲକ୍ଷଣ ଥିବା ପ୍ରାୟ ତିନି ଲକ୍ଷ ନୂତନ ରୋଗୀ ଦେଶରେ ଦେଖାଦେଇଛନ୍ତି ଏବଂ ରୋଗୀଙ୍କ ସଂଖ୍ୟା ସାଢ଼େ ୮ ଲକ୍ଷରୁ ଅଧିକକୁ ବୃଦ୍ଧି ପାଇଛି।
ଉତ୍ତର କୋରିଆରେ ଦେଶବ୍ୟାପୀ ଲକ୍ ଡାଉନ୍ ଘୋଷଣା କରାଯାଇଛି। ଏହା ଦେଶର ଦୁର୍ବଳ ଅର୍ଥନୀତି ଉପରେ ଅଧିକ ଚାପ ପକାଇପାରେ ବୋଲି ଅନୁମାନ କରାଯାଉଛି। ଏଥି ସହ ଉତ୍ତର କୋରିଆ ନେତା କିମ ଜୋଙ୍ଗ ଉନ ଶନିବାର ଶାସକ ଦଳର ପଲିଟିବୁରୋ ବୈଠକରେ ସ୍ବାଇନ ଫ୍ଲୁକୁ ଏକ ପ୍ରମୁଖ ଘଟଣା ବୋଲି କହିଛନ୍ତି। ସେ କହିଛନ୍ତି ଯେ ଚାଇନା ଠାରୁ ଶିକ୍ଷା ଗ୍ରହଣ କରି ଉତ୍ତର କୋରିଆ ଏଭଳି ସଂକ୍ରମଣର ମୁକାବିଲା କରିପାରିବ।
ଯଦିଓ ରହସ୍ୟମୟ ଜ୍ୱରରେ ପୀଡିତଙ୍କ ସୁସ୍ଥ ହେବା ସଂଖ୍ୟା ମଧ୍ୟ ଦ୍ରୁତ ଗତିରେ କମିବାରେ ଲାଗିଛି। ଇତିମଧ୍ୟରେ ୫ ଲକ୍ଷ ଲୋକ ସୁସ୍ଥ ହୋଇଥିବାବେଳେ ସାଢ଼େ ତିନି ଲକ୍ଷରୁ ଅଧିକ ଲୋକ ଚିକିତ୍ସିତ ହେଉଛନ୍ତି।
