ପାରଳାଖେମୁଣ୍ଡି,୨୫ା୯ (ଗିରିଧାରୀ ପରିଛା):ସବୁ ଲୋକଙ୍କୁ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଣ ଲକ୍ଷ୍ୟରେ ସରକାର ବହୁ କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ଅନେକ ସ୍ଥାନରେ ଏହି ପାନୀୟ ଜଳ ପ୍ରକଳ୍ପ କାମରେ ଆସୁନାହିଁ। କେଉଁଠି ପାଇପ ପୁରୁଣା ହୋଇଯାଇଛି ତ ଆଉ କେଉଁଠି ପାଣିଟାଙ୍କି ନିର୍ମାଣ ହୋଇ ସାରିଥିଲେ ସୁଦ୍ଧା ଲୋକଙ୍କୁ ପାଇପ ଯୋଗାଯାଇନାହିଁ। ଅନେକ ସ୍ଥାନରେ ପାଇପ ସଂଯୋଗ ହୋଇଥିଲେ ମଧ୍ୟ ଟାଙ୍କି ନିର୍ମାଣ ହୋଇସାରି ନାହିଁ। ଜିଲାରେ ଏଭଳି ଅନେକ ଗାଁ ଅଛି ଏଭଳି ସମସ୍ୟା ପାଇଁ ପାନୀୟ ଜଳ ପାଇବାରୁ ବଞ୍ଚତ୍ତ ହେଉଛନ୍ତି। ଗଜପତି ଜିଲା ଗୋଷାଣି ବ୍ଲକ ପ୍ରଶାସନିକ କାଗଜପତ୍ରରେ ଅତି ଉନ୍ନତ ତଥା ବିକଶିତ ବ୍ଲକ ଭାବେ ପରିଗଣିତ ହେଉଥିଲେ ମଧ୍ୟ ଅନେକ ଗ୍ରାମରେ ଆଜି ଯାଏଁ ଲୋକେ ବିଶୁଦ୍ଧ ପିଇବା ପାଣି ପାଇପାରୁନାହାନ୍ତି। ଗ୍ରାମାଞ୍ଚଳଗୁଡିକରେ ଲକ୍ଷ ଲକ୍ଷ ଟଙ୍କା ବ୍ୟୟବରାଦ କରାଯାଇଥିଲେ ମଧ୍ୟ ପାନୀୟ ଜଳ ପ୍ରକଳ୍ପଗୁଡିକ ଏଭଳି ଅଦରକାରୀ ହୋଇ ପଡିରହିଛି।
ଯେ, ପାରଳାଖେମୁଣ୍ଡି ସହର ଉପକଣ୍ଠରେ ଥିବା ଢାମୁଣିଗାଁ ସହ ତାଟିପାଟି, ବଡକତ୍ତୁରୁ, ସାନ କତ୍ତୁରୁ, ଛତ୍ରପୁର, ଏସ. ଉରୁଡା, କେ.ଉରୁଡାଠାରେ ପାନୀୟ ଜଳ ସଙ୍କଟ ରହିଛି। ଢାମୁଣୀଗାଁରେ ଓଭର ହେଡ ପାଣି ଟାଙ୍କି ର୍ନିମାଣ ହୋଇସାରିଛି । କେରାଣ୍ଡି ପଞ୍ଚାୟତ ତରଫରୁ ପମ୍ପ ଡ୍ରାଇଭର ନିଯୁକ୍ତି ନ ହୋଇଥିବାରୁ ସେଠାରେ ପ୍ରାୟ ସପ୍ତାହ ହେଲା ପାଣି ଆସୁନାହିଁ । ପୂର୍ବରୁ ବିଭାଗ ପକ୍ଷରୁ କିଛି ଦିନ ନିମନ୍ତେ ଜଣେ ପମ୍ପ ଡ୍ରାଇଭର ନିଯୁକ୍ତ ଥିଲେ ମଧ୍ୟ ପଞ୍ଚାୟତ ପକ୍ଷରୁ ସ୍ଥାୟୀ ପମ୍ପ ଡ୍ରାଇଭର ନିଯୁକ୍ତ କରିବା କଥା । ହେଲେ ପମ୍ପ ଡ୍ରାଇଭର ନିଯୁକ୍ତ ହୋଇ ନଥିବାରୁ ପାନୀୟ ଜଳ ସମସ୍ୟା ସୃଷ୍ଟି ହୋଇଛି। ସେହିଭଳି ବଡ କତ୍ତୁରୁ ଗ୍ରାମ ସମେତ ସାନ କତ୍ତୁରୁ, ଛତ୍ରପୁର ଠାରେ ପାଇପ ଲାଇନ ବିଛା ଯାଇଛି ହେଲେ ଓଭରହେଡ ପାଣି ଟାଙ୍କି ନିର୍ମାଣ ହୋଇନାହିଁ । ସେହିପରି ତାଟିପାଟି ଗ୍ରାମରେ ପ୍ରାୟ ପାଞ୍ଚ ମାସ ହେଲା ଜଳକଷ୍ଟ ଭୋଗୁଛନ୍ତି ଲୋକେ। ପ୍ରାୟ ଦୁଇ ହଜାରରୁ ଊର୍ଦ୍ଧ ଜନସଂଖ୍ୟା ବିଶିଷ୍ଟ ଏହି ଗ୍ରାମରେ ସମସ୍ତ ଘରକୁ ପାଇପ ଲାଇନ ବିଛାଯାଇଛି। ହେଲେ ପୁରୁଣା ହୋଇଯାଇଥିବାରୁ ସେଗୁଡ଼ିକରେ କଳଙ୍କି ଲାଗିଗଲାଣି। ନୂତନ ଓଭରହେଡ ପାଣି ଟାଙ୍କି ନିର୍ମାଣ ପାଇଁ ବିଭାଗ ପକ୍ଷରୁ କାମ ଆରମ୍ଭ କରିଥିଲେ ମଧ୍ୟ ଜାଗାକୁ ନେଇ ବିବାଦ ଦେଖାଦେଇଥିବାରୁ ତାହା ବର୍ତ୍ତମାନ ସ୍ଥଗିତ ରହିଛ। ଏପରି ସ୍ଥଳେ ଲୋକେ ଗ୍ରାମରେ ଥିବା ଏକ ମାତ୍ର କୁଅରୁ ପିଇବା ପାଣି ବ୍ୟବହାର କରୁଛନ୍ତି। ଏହି କୁଅକୁ ବର୍ଷା ଦିନରେ ଦୂଷିତ ଜଳ ପ୍ରବେଶ କରୁଥିବାରୁ ଗୋଳିଆ ହେଉଥିଲେ ମଧ୍ୟ ଲୋକେ ବାଧ୍ୟ ହୋଇ ଏହି ପାଣି ପିଉଥିବା ପ୍ରକାଶ କରିଛନ୍ତି। ସେହିପରି ଏସ.ଉରୁଡା, କେ. ଉରୁଡା ଗ୍ରାମରେ ପାନୀୟ ଜଳ ନିମନ୍ତେ ସମସ୍ତ ଆନୁସଙ୍ଗିକ ବ୍ୟବସ୍ଥା ଦୀର୍ଘ ୬ ବର୍ଷ ପୂର୍ବେ ହୋଇସାରିଛି। ହେଲେ ତିତଲି ବାତ୍ୟାରେ ପାଣି ମୋଟର ନଷ୍ଟ ହୋଇଯାଇଛି। ଏନେଇ ଗ୍ରାମ୍ୟ ପାନୀୟ ଜଳ ଯୋଗାଣ ଓ ପରିମଳ ବିଭାଗର ସହକାରୀ ଯନ୍ତ୍ରୀ ଶିବ ପ୍ରସାଦ ପାଳ କହିଛନ୍ତି, ଢାମୁଣୀଗାଁରେ ପମ୍ପ ଡ୍ରାଇଭର ସମସ୍ୟା ଦେଖାଦେଇଛି। ପଞ୍ଚାୟତ ତରଫରୁ ସେଠାରେ ପମ୍ପ ଡ୍ରାଇଭର ନିଯୁକ୍ତ କରିବା କଥା। ସେହିପରି ବଡକତ୍ତୁରୁ, ସାନକତ୍ତୁରୁ ଓ ଛତ୍ରପୁର ଗ୍ରାମାଞ୍ଚଳରେ ଓଭରହେଡ ପାଣି ଟାଙ୍କି ନିର୍ମାଣ ନିମନ୍ତେ ଜାଗାର ଅଭାବ ଦେଖାଦେଇଥିଲା। ଏବେ ଏହି ସମସ୍ୟାର ସମାଧାନ ହୋଇ ସାରିଛି ଏବଂ ଖୁବଶୀଘ୍ର ସେଠାରେ ପାଣିଟାଙ୍କି ନିର୍ମାଣ ଆରମ୍ଭ କରାଯିବ। ତାଟିପାଟି ଗ୍ରାମରେ ଜାଗା ବିବାଦ ଥିବାରୁ ସେଠାରେ ଓଭର ହେଡ ପାଣି ଟାଙ୍କି ନିର୍ମାଣରେ ସମସ୍ୟା ଦେଖାଦେଇଥିବା କହିଛନ୍ତି ।
