ନୂଆଦିଲ୍ଲୀ,୨୫।୭: ଦେଶର ଉତ୍ତର ପୂର୍ବ ରାଜ୍ୟ ମଣିପୁରରେ ଅଢେଇ ମାସରୁ ଅଧିକ ସମୟ ଧରି ହିଂସା ଚାଲିଛି। ଅନ୍ୟପକ୍ଷରେ ମଣିପୁର ଉପରେ କେନ୍ଦ୍ର ସରକାର ବିତର୍କ ନ କରିବାକୁ ନେଇ ସଂସଦରେ ହଙ୍ଗାମା ଦେଖାଦେଇଛି। ଏସବୁ ଭିତରେ କଂଗ୍ରେସ ନେତା ଶଶି ଥରୁର ଭାଜପା ସରକାର ଏବଂ ପ୍ରଧାନମନ୍ତ୍ରୀଙ୍କୁ ସମାଲୋଚନା କରିଛନ୍ତି।
ଶଶି ଥରୁର କହିଛନ୍ତି ଯେ, ସଂସଦୀୟ ବ୍ୟବସ୍ଥା ଥିବା ପ୍ରତ୍ୟେକ ଦେଶରେ ପ୍ରଧାନମନ୍ତ୍ରୀ ସଂସଦରେ ଉତ୍ତରଦାୟୀ। ସଂସଦର ସଦସ୍ୟମାନେ ଏହି ହିଂସା ଏବଂ ସେଠାରେ ସରକାରଙ୍କ କାର୍ଯ୍ୟାନୁଷ୍ଠାନ ଉପରେ ଜନସାଧାରଣଙ୍କୁ ଜଣାଇବା ଉଚିତ୍। ଏପର୍ଯ୍ୟନ୍ତ ମଣିପୁର ସରକାରଙ୍କୁ କାହିଁକି ବରଖାସ୍ତ କରାଯାଇନାହିଁ ତାହା ମଧ୍ୟ ସରକାର ସଂସଦକୁ କହିବା ଆବଶ୍ୟକ।
ଥରୁର ଆହୁରି ମଧ୍ୟ କହିଛନ୍ତି ଯେ, ମୁଁ ଜାଣେ ଯେ ପ୍ରଧାନମନ୍ତ୍ରୀ ଜଣେ ବହୁତ ଭଲ ବକ୍ତା। ସେ ପ୍ରତ୍ୟେକ ପ୍ଲାଟଫର୍ମରେ କହିବାର କୌଣସି ସୁଯୋଗ ହାତଛଡ଼ା କରନ୍ତି ନାହିଁ। ତେବେ ସେ ମଣିପୁର ହିଂସା ସଂପର୍କରେ ସଂସଦରେ କହିବା ତାଙ୍କ ଦାୟିତ୍ୱ। ଏହାସତ୍ତ୍ୱେ ସେ କିଛି କହୁନାହାଁନ୍ତି। ଦୀର୍ଘ ଦିନ ଧରି ଆମ ଦେଶ ସାମ୍ନା କରିଥିବା ଏହା ହେଉଛି ଏକ ଗୁରୁତର ସଙ୍କଟ, ଯେଉଁଥିରେ ଜୀବନ ଓ ସମ୍ପତ୍ତି ନଷ୍ଟ ହୋଇଯାଇଛି। ୧୪୦ରୁ ଅଧିକ ଲୋକଙ୍କର ମୃତ୍ୟୁ ଘଟିଛି। ଏହି ଭୟଙ୍କର ହିଂସାରେ ୫୦,୦୦୦ରୁ ଅଧିକ ଲୋକ ଘର ହରାଇଛନ୍ତି। ମିଜୋରାମରେ ମଧ୍ୟ ଏହିପରି ଘଟଣା ଘଟୁଛି । ଲୋକମାନେ ଉତ୍ତର ପୂର୍ବ ଛାଡି ପଳାୟନ କରୁଛନ୍ତି ବୋଲି ଥରୁର କହିଛନ୍ତି।
