ଭୁବନେଶ୍ୱର,୨୩ା୧୨(ସତ୍ୟଜିତ୍ ରାଉତ): ରାଜଧାନୀ ଭୁବନେଶ୍ୱରରେ ଟ୍ରାଫିକ୍ ଯନ୍ତ୍ରଣା ଅସହ୍ୟ ହେଉଛି। ବିଭିନ୍ନ ସମୟରେ ଅସମ୍ଭାଳ ଭିଡ଼ ଯୋଗୁ ଲୋକେ ରାସ୍ତାରେ ଘଣ୍ଟାଘଣ୍ଟା ଧରି ଅପେକ୍ଷା କରି ଏକପ୍ରକାର ଅଣନିଃଶ୍ୱାସୀ ହେଉଛନ୍ତି। ବଡ଼ କଥା ହେଲା, ଟ୍ରାଫିକ୍ ଛକ ନିକଟରେ ଲେଫ୍ଟ ଫ୍ରି’ ନିୟମ ବାଟବଣା ହେଉଥିବା ଦେଖିବାକୁ ମିଳୁଛି। ଏଥିପାଇଁ କମିଶନରେଟ ପୋଲିସ ପକ୍ଷରୁ ଏନ୍ଫୋର୍ସମେଣ୍ଟ ତ ଦୂରର କଥା, ଲୋକଙ୍କ ମଧ୍ୟରେ ସଚେତନତା ମଧ୍ୟ ସୃଷ୍ଟି କରାଯାଉନାହିଁ। ଟ୍ରାଫିକ୍ ଛକ ନିକଟରେ ବାମପାର୍ଶ୍ୱକୁ ଯିବାକୁ ସବୁଜ ସିଗନାଲ୍ ରହିଥିବାବେଳେ ଲୋକେ ଭିଡ଼ରେ ଫସି ହଇରାଣ ହେଉଛନ୍ତି। କେତେଜଣ ଅମାନିଆଙ୍କ ପାଇଁ ଲୋକେ ଅଯଥାରେ ଏଭଳି ସମସ୍ୟାରେ ପଡ଼ୁଛନ୍ତି। ହେଲେ ଏହି ସମସ୍ୟାକୁ ଦୂର କରିବାକୁ ପୋଲିସ ପକ୍ଷରୁ ସେଭଳି ଆଖିଦୃଶିଆ ପଦକ୍ଷେପ ନିଆଯାଉ ନ ଥିବାରୁ ସବୁଦିନ ସହରରେ ଟ୍ରାଫିକ ଜାମ୍ ହେଉଥିବା କୁହାଯାଉଛି।
ଟ୍ରାଫିକ୍ ପୋଷ୍ଟଗୁଡ଼ିକରେ ରେଡ୍ ସିଗ୍ନାଲ ବେଳେ ରାସ୍ତାରେ ବିଭିନ୍ନ ଯାନବାହନ ଅଟକି ରହୁଛି। ମାତ୍ର ବାମପାର୍ଶ୍ୱକୁ ଯିବାକୁ ସବୁଜ ସିଗନାଲ୍ ଥିଲେ ମଧ୍ୟ ବାଟ ଫାଙ୍କା ନ ଥିବାରୁ ଲୋକେ ଆଗକୁ ଯାଇପାରୁନାହାନ୍ତି। ଏହି ଲେଫ୍ଟ ଫ୍ରି ଜୋନ୍ରେ ଜଣେ କେହି ଗାଡି ରଖିଦେଲେ, ପଛକୁ ପଛ ଅନ୍ୟ ଗାଡିଗୁଡ଼ିକ ରହିଯାଉଛି। ଫଳରେ ଉକ୍ତ ରାସ୍ତା ସମ୍ପୂର୍ଣ୍ଣ ବ୍ଲକ୍ ହୋଇଯାଉଛି। ଟ୍ରାଫିକ୍ ବ୍ୟବସ୍ଥାରେ ଏହା ଏକ ବଡ ସମସ୍ୟା ପାଲଟିଛି। ଏପରିକି ସରକାରୀ ମୋ ବସ୍ ଚାଳକମାନେ ମଧ୍ୟ ଏହି ନିୟମକୁ ବେଖାତିର କରୁଛନ୍ତି। ଭୁବନେଶ୍ୱରର ରୂପାଲି ଛକ, ନାଲ୍କୋ ଛକ, ଏଜି ଛକ, ରାମ ମନ୍ଦିର ଛକ ଆଦିରେ ଲେଫ୍ଟ ଫ୍ରି ପାଇଁ ଅସ୍ଥାୟୀ କୋନ୍ ବ୍ୟବସ୍ଥା ମଧ୍ୟ କରାଯାଇଛି। ହେଲେ ଅତ୍ୟଧିକ ଭିଡ଼ ବେଳେ ଏହି କୋନ୍ଗୁଡିକୁ କାଢ଼ି ନିଆଯାଉଥିବା ଦେଖିବାକୁ ମିଳୁଛି। ସେହିପରି ସହରରରେ ଥିବା ଛୋଟବଡ଼ ଛକରେ ଲେଫ୍ଟ ଫ୍ରି’ ଜୋନ୍ ଲାଗି କୌଣସି ଚିହ୍ନ ବା ପ୍ଲାଷ୍ଟିକ୍ କୋନ୍ ଲଗାଯାଇ ନ ଥିବାରୁ ଲୋକେ ଜାଣି ନ ପାରି ବାଟ ଓଗାଳି ରହୁଛନ୍ତି। ଭିଡ ହେବା କାରଣରୁ ଆଉକିଛି ଛକରେ ଏହି କୋନ୍ ଲଗାଯାଉ ନ ଥିବା କୁହାଯାଉଛି। ଭୁବନେଶ୍ୱରରେ ନିୟମିତ ବାଇକ ଚଳାଉଥିବା ରବୀନ୍ଦ୍ର କୁମାର ସାହୁ କହିଛନ୍ତି, ବାମପାର୍ଶ୍ୱ ରାସ୍ତା ବ୍ଲକ୍ ହୋଇଯିବାରୁ ବହୁ ସମୟରେ ସମସ୍ୟାରେ ପଡୁଛି। ଏଥିପ୍ରତି ପୋଲିସ ସ୍ବତନ୍ତ୍ର ନଜର ଦେବାକୁ ସାହୁ ଦାବି କରିଛନ୍ତି। ଲେଫ୍ଟ ଫ୍ରି’ ନିୟମ ଉଲ୍ଲଂଘନକାରୀଙ୍କ ବିରୋଧରେ ଓଡ଼ିଶା ସହରାଞ୍ଚଳ ପୋଲିସ ଆଇନ-୨୦୦୩ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବାର ପ୍ରାବଧାନ ରହିଛି। ହେଲେ ଏହି ସମସ୍ୟା ଉପରେ ପୋଲିସ ପକ୍ଷରୁ ସେଭଳି ସ୍ବତନ୍ତ୍ର ଦୃଷ୍ଟି ଦିଆଯାଉ ନ ଥିବାରୁ ସହରରେ ଟ୍ରାଫିକ୍ ଜାମ୍ ନିତିଦିନିଆ ହୋଇଯାଇଛି। ପୂର୍ବରୁ ଅର୍ଥାତ୍ ୨୦୨୨ ଜାନୁଆରୀ ୭ରେ ତତ୍କାଳୀନ ଟ୍ରାଫିକ୍ ଡିସିପି ଏସ୍. ସୁଶ୍ରୀ ଭୁବନେଶ୍ୱରରେ ବିଭିନ୍ନ ଟ୍ରାଫିକ୍ ଛକର ସ୍ଥିତି ପରଖି ଏକାଧିକ ପଦକ୍ଷେପ ନେଇଥିଲେ। ଲେଫ୍ଟ ଫ୍ରି’ ନିୟମ କଡ଼ାକଡି କରିବାକୁ ସେ ନିର୍ଦ୍ଦେଶ ଦେଇଥିଲେ। ଏହି ନିୟମ ଉଲ୍ଲଂଘନ କଲେ ପ୍ରଥମ ପର୍ଯ୍ୟାୟରେ ୫୦୦ଟଙ୍କା ଜରିମାନା ଆଦାୟ କରାଯିବ ବୋଲି ମଧ୍ୟ ସେ କହିଥିଲେ। ତେବେ ଦିନ ପରେ ଦିନ ଗଡି ଚାଲିଥିବା ବେଳେ ଲେଫ୍ଟ ଫ୍ରି’ ନିୟମ ଠିକ୍ ଭାବେ ପାଳନ ହେଉନି କି ଉଲ୍ଲଂଘନକାରୀଙ୍କ ଉପରେ ପଦକ୍ଷେପ ନିଆଯିବାର ନଜିର ନାହିଁ। ଏନେଇ ଟ୍ରାଫିକ୍ ଡିସିପି ତପନ ମହାନ୍ତି କହିଛନ୍ତି, ବ୍ୟକ୍ତଗତ ଭାବେ ମୁଁ ନିଜେ ଛକଗୁଡିକୁ ଯାଇ ଦେଖୁଛି। ବିଭିନ୍ନ ସମୟରେ ପ୍ଲାଷ୍ଟିକ୍ କୋନ୍ଗୁଡିକ ଭାଙ୍ଗିଯାଉଛି। ଏହି ଅସ୍ଥାୟୀ କୋନ୍ ବଦଳରେ ଆଗକୁ ବିକଳ୍ପ ବ୍ୟବସ୍ଥା କରିବାକୁ ଯୋଜନା ହେଉଛି। ଆଗକୁ ଲେଫ୍ଟ ଫ୍ରି’ ୱେରେ ଲାଇଟ୍ ବ୍ୟବସ୍ଥା ସହ ପୋଲିସ ନିୟୋଜିତ କରାଯିବ। ବାମପାର୍ଶ୍ୱକୁ ଖାଲି ରଖିବାକୁ ଲୋକମାନଙ୍କୁ ସଚେତନ କରାଯାଉଛି। ଆଉ ୫ରୁ ୭ ଦିନ ମଧ୍ୟରେ ସ୍ବତନ୍ତ୍ର ପଦକ୍ଷେପ ନିଆଯାଇ ସମସ୍ୟାର ସମାଧାନ କରାଯିବ ବୋଲି ଡିସିପି ମହାନ୍ତି କହିଛନ୍ତି।
