ପ୍ୟାରିସ, ୧୯।୧୦: ବିଶ୍ୱର ସବୁଠାରୁ ଅଧିକ ପରିଦର୍ଶନ କରୁଥିବା ଲୁଭ୍ର ମ୍ୟୁଜିୟମରେ ରବିବାର ସକାଳେ ଏକ ବଡ଼ ଚୋରି ହୋଇଛି। ଚୋରମାନେ ମାତ୍ର ୭ ମିନିଟରେ ମୂଲ୍ୟବାନ ଗହଣା ଚୋରି କରି ଫେରାର ହୋଇଛନ୍ତି।
ଫ୍ରାନ୍ସର ଗଣମାଧ୍ୟମ ଅନୁଯାୟୀ, ୩ କିମ୍ବା ୪ ଜଣ ଚୋର ଏକ ସ୍କୁଟର ଓ ହାଇଡ୍ରୋଲିକ ଲିଫ୍ଟ (ଉଚ୍ଚ ସ୍ଥାନରେ ପହଞ୍ଚିବା ପାଇଁ ଏକ ଯନ୍ତ୍ର) ବ୍ୟବହାର କରି ମ୍ୟୁଜିୟମର ସେନ ନଦୀ ଆଡ଼କୁ ଥିବା ଦିୱାଲରେ ପହଞ୍ଚିଥିଲେ। ସେମାନେ ଡିସ୍କ କଟର ସାହାଯ୍ୟରେ ଝରକା କାଟି ଗାଲେରୀ ଡି’ଆପୋଲୋ (ଆପୋଲୋ ଗାଲେରୀ)ରୁ ୯ଟି ଅମୂଲ୍ୟ ଗହଣା ଚୋରି କରିଥିଲେ।
ଫ୍ରାନ୍ସର ଗୃହମନ୍ତ୍ରୀ ଲରେଣ୍ଟ ନୁନେଜ କହିଛନ୍ତି, ଚୋରମାନେ ଆଗରୁ ମ୍ୟୁଜିୟମର ସୁରକ୍ଷା ବ୍ୟବସ୍ଥା ଅନୁଧ୍ୟାନ କରିଥିଲେ। ଏହି ଘଟଣା ମାତ୍ର ୭ ମିନିଟରେ ସମ୍ପନ୍ନ ହୋଇଛି। ମ୍ୟୁଜିୟମ ବାହାରେ ମିଳିଥିବା ଏକ ଭଙ୍ଗା ଗହଣା ମହାରାଣୀ ଇଉଜେନୀଙ୍କ ମୁକୁଟ ବୋଲି ଅନୁମାନ କରାଯାଉଛି।
ଚୋରି ପରେ ଲୁଭ୍ର ମ୍ୟୁଜିୟମ ବନ୍ଦ ରହିଛି। ପ୍ୟାରିସ କେନ୍ଦ୍ରୀୟ ମେୟର ଆରିଏଲ ୱେଲ ଏହାକୁ ଆଶ୍ଚର୍ଯ୍ୟଜନକ ଘଟଣା ବୋଲି କହିଛନ୍ତି। ସେ କହିଛନ୍ତି, “ଏତେ ସହଜରେ ଲୁଭ୍ରରେ ଚୋରି ହେବା ଏକ ସିନେମା କାହାଣୀ ପରି ଲାଗୁଛି। ଏହା ଅତ୍ୟନ୍ତ ଆଶ୍ଚର୍ଯ୍ୟଜନକ।”
ଫ୍ରାନ୍ସର ସଂସ୍କୃତି ମନ୍ତ୍ରୀ ଏହି ଘଟଣାର ତଦନ୍ତ ଚାଲିଛି ବୋଲି ସୂଚନା ଦେଇଛନ୍ତି। ପୋଲିସ ଓ ସୁରକ୍ଷା କର୍ମୀମାନେ ଘଟଣାସ୍ଥଳରେ ତଦନ୍ତ ଜାରି ରଖିଛନ୍ତି।
