ନୂଆଦିଲ୍ଲୀ,୩୦।୧ : ଗତ ୨୦୨୨ ବର୍ଷରେ ସମଗ୍ର ଦେଶରେ ଟ୍ରାଏଲ କୋର୍ଟ ୧୬୫ ଜଣ ଅପରାଧୀଙ୍କୁ ଫାଶୀ ଦଣ୍ଡାଦେଶ ଦେଇଛନ୍ତି। ୨୦୨୨ ବର୍ଷ ପାଇଁ ଏହି ସଂଖ୍ୟା ଗତ ଦୁଇ ଦଶନ୍ଧି ମଧ୍ୟରେ ସର୍ବାଧିକ। ଏହାପୂର୍ବରୁ ୨୦୨୧ ମସିହାରେ ୧୪୬ ଜଣଙ୍କୁ ମୃତ୍ୟୁଦଣ୍ଡାଦେଶ ଦିଆଯାଇଥିଲା। ଏହା ଆଶ୍ଚର୍ଯ୍ୟଜନକ ଯେ ମୃତ୍ୟୁଦଣ୍ଡାଦେଶ ପାଇଥିବା ପ୍ରତ୍ୟେକ ତୃତୀୟ ବ୍ୟକ୍ତି ବଳାତ୍କାର ଅପରାଧ ସହ ଜଡିତ।
୨୦୧୫ରୁ ୨୦୨୨ ପର୍ଯ୍ୟନ୍ତ ମୃତ୍ୟୁଦଣ୍ଡାଦେଶ ପାଇଥିବା ଅପରାଧୀଙ୍କ ସଂଖ୍ୟା ୪୦ ପ୍ରତିଶତ ବୃଦ୍ଧି ପାଇଛି। ରିପୋର୍ଟ ଅନୁଯାୟୀ ଭାରତରେ ଫାଶୀ ଦଣ୍ଡ: ବାର୍ଷିକ ପରିସଂଖ୍ୟାନ ୨୦୨୨ ଅନୁଯାୟୀ, ନିମ୍ନ ଅଦାଲତ ଦ୍ୱାରା ପ୍ରଦାନ କରାଯାଇଥିବା ମୃତ୍ୟୁଦଣ୍ଡାଦେଶର ସଂଖ୍ୟା ବୃଦ୍ଧି ଏବଂ ଉଚ୍ଚ ଅପିଲ କୋର୍ଟରେ ଏହି ମାମଲା ଶୁଣାଣିରେ ବିଳମ୍ବ ଏହି ବୃଦ୍ଧି ହେବାର କାରଣ ବୋଲି ଦର୍ଶାଯାଇଛି।
ରିପୋର୍ଟ ଅନୁଯାୟୀ, ଗତ ବର୍ଷ ଫେବୃଆରୀରେ ଅହମ୍ମଦାବାଦ କୋର୍ଟ ୨୦୦୮ ସିରିଜ ବୋମା ବିସ୍ଫୋରଣ ମାମଲାରେ ୩୮ ଜଣ କଏଦୀଙ୍କୁ ମୃତ୍ୟୁଦଣ୍ଡ ଦେଇଥିଲେ। ୨୦୨୨ମସିହାରେ ମୃତ୍ୟୁଦଣ୍ଡ ସଂଖ୍ୟା ବୃଦ୍ଧିରେ ଏହି ମାମଲାର ସର୍ବାଧିକ ଯୋଗଦାନ ରହିଛି। ୨୦୧୬ ରେ, ବଳାତ୍କାର ଅପରାଧ ପାଇଁ ମୃତ୍ୟୁଦଣ୍ଡ ପାଇଥିବା କଏଦୀଙ୍କ ସଂଖ୍ୟା ୨୭ ଥିଲା। ମୋଟ ୧୫୩ ମାମଲା ମଧ୍ୟରେ ଏହାର ୧୭.୬ ପ୍ରତିଶତ ଥିଲା। ୨୦୨୨ ମସିହାରେ, ବଳାତ୍କାର ମାମଲାରେ ୫୨ ଜଣ କଏଦୀଙ୍କୁ ମୃତ୍ୟୁଦଣ୍ଡ ଦିଆଯାଇଥିଲା। ଯାହା ସମୁଦାୟ ମାମଲାର ୩୧.୫ ପ୍ରତିଶତ ଅଟେ ।
ଗଣମାଧ୍ୟମ ଖବର ଅନୁଯାୟୀ ଆଇନ ପ୍ରଫେସର ତଥା ଏହି ରିପୋର୍ଟ ପ୍ରଦାନ କରିଥିବା ଅନୁପ ସୁନ୍ଦରନାଥ କହିଛନ୍ତି ଯେ ବର୍ଦ୍ଧିତ ଆକଳନ ଟ୍ରାଏଲ କୋର୍ଟରେ ଫାଶୀ ହେବାର ଧାରାକୁ ଦର୍ଶାଉଛି। ସେ କହିଛନ୍ତି ଯେ ୨୦୨୦ରେ କରୋନା ମହାମାରୀ ସମୟରେ ୭୭ ଜଣ କଏଦୀଙ୍କୁ ଫାଶୀଦଣ୍ଡାଦେଶ ଦିଆଯାଇଥିଲା। ଏହା ପରେ ଟ୍ରାଏଲ କୋର୍ଟରେ ମୃତ୍ୟୁଦଣ୍ଡାଦେଶ ଦେବାର ଅଭ୍ୟାସ ବୃଦ୍ଧି ପାଇଛି।
ଗତ ବର୍ଷ ସୁପ୍ରିମକୋର୍ଟ ଟ୍ରାଏଲ କୋର୍ଟ ଏବଂ ହାଇକୋର୍ଟଙ୍କ ଦ୍ୱାରା ମୃତ୍ୟୁଦଣ୍ଡାଦେଶ ସମ୍ପର୍କରେ ଏକ ନିର୍ଦ୍ଦେଶନାମା ଜାରି କରିଥିଲେ। ସୁପ୍ରିମକୋର୍ଟ କହିଥିଲେ ଯେ ମୃତ୍ୟୁଦଣ୍ଡାଦେଶ ଦେବା ପୂର୍ବରୁ ଟ୍ରାଏଲ କୋର୍ଟ କେଉଁ ପରିସ୍ଥିତିରେ ଅପରାଧ ଘଟିଲା ଏବଂ ଅପରାଧୀଙ୍କ ପୃଷ୍ଠଭୂମି କ’ଣ ତାହା ଦେଖିବା ଉଚିତ।
