ରାଜକନିକା, ୧୫ା୭(ସଞ୍ଜୟ କୁମାର ଦାଶ): ଗ୍ରାମାଞ୍ଚଳରେ ସହରାଞ୍ଚଳର ପରିବେଶ ସୃଷ୍ଟି କରିବା ଲକ୍ଷ୍ୟ ନେଇ ସରକାର ଗମନାଗମନକୁ ସୁଗମ୍ୟ କରିବା ଦିଗରେ ୱାର୍ଡରୁ ପଞ୍ଚାୟତସ୍ତର ପର୍ଯ୍ୟନ୍ତ ସମସ୍ତ ପଥପାର୍ଶ୍ୱ ଆଲୋକୀକରଣ (ଷ୍ଟ୍ରିଟ ଲାଇଟ) ବ୍ୟବସ୍ଥା କରାଉଛନ୍ତି। ଏହି ଷ୍ଟ୍ରିଟ୍ ଲାଇଟ୍ଗୁଡିକ ଦିନରେ ଶୋଭା ମଣ୍ଡନ କରିବା ବ୍ୟତୀତ ପତାକା, ଟେଲିଫୋନ କେବୁଲ ଓ ବିଭିନ୍ନ ହୋର୍ଡିଂ ବନ୍ଧା ହେବାର ସାହାଯ୍ୟରେ ଆସୁଛି। ଏଭଳି ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ରାଜକନିକା ବ୍ଲକର ମୁଖ୍ୟ କଣ୍ଟପଡ଼ା ବଜାର ପଥପାର୍ଶ୍ୱ ଷ୍ଟ୍ରିଟ୍ ଲାଇଟ କ୍ଷେତ୍ରରେ।
୨୦୧୯-୨୦ ଆର୍ଥିକ ବର୍ଷରେ ରାଜ୍ୟସଭା ଉନ୍ନୟନ ପାଣ୍ଠି ଅନୁଦାନରେ କଣ୍ଟପଡ଼ା ବଜାର ଉଜ୍ଜ୍ୱଳ ଷ୍ଟ୍ରିଟ୍ ଲାଇଟ ଲଗାଯାଇଥିଲା। ଯାହା ଠିକ୍ ପଞ୍ଚାୟତ ନିର୍ବାଚନ ପୂର୍ବରୁ ବିଧାୟକଙ୍କ ଦ୍ୱାରା ୨୦୨୨ ଜାନୁୟାରୀ ୧ରେ ଉଦ୍ଘାଟନ ହୋଇଥିଲା। ଚନ୍ଦନ ପୋଖରୀ ଛକଠାରୁ କଣ୍ଟପଡ଼ା ବଜାର ଦେଇ ଆରସା ଛକ ପର୍ଯ୍ୟନ୍ତ ୫୭ଟି ଷ୍ଟ୍ରିଟ୍ ଲାଇଟ ଲଗାଯାଇଛି। ଏସବୁ କିଛିଦିନ ଭଲରେ ଜଳିଥିଲା। ପରେ ଲାଇଟ୍ଗୁଡିକ ଲିଭି ଯାଇଥିଲା। କଣ୍ଟପଡ଼ା ପଞ୍ଚାୟତର ସରପଞ୍ଚଙ୍କ ଅଭିଯୋଗକ୍ରମେ ବିଦ୍ୟୁତ୍ ବିଲ ବକେୟା ଥିବା ନେଇ ସଂଯୋଗ ବିଚ୍ଛିନ୍ନ ହୋଇଥିବା ଜଣାପଡ଼ିଥିଲା। ତେବେ ଏ ନେଇ ତତ୍କାଳୀନ ବିଡିଓଙ୍କୁ କଣ୍ଟପଡ଼ା ପଞ୍ଚାୟତର ସରପଞ୍ଚ ଅଭିଯୋଗ କରିଥିଲେ କି, ଲାଇଟ୍ କେବଳ କଣ୍ଟପଡ଼ା ପଞ୍ଚାୟତରେ ଜଳୁନାହିଁ। ଏହା ୩ଟି ପଞ୍ଚାୟତ କଣ୍ଟପଡ଼ା, ବାଘବୁଦା ଏବଂ ଜାଗୁଳାଇପଡ଼ାକୁ କଭର କରୁଛି। କାହିଁକି କେବଳ କଣ୍ଟପଡ଼ା ପଞ୍ଚାୟତ ବିଦ୍ୟୁତ୍ ବିଲ ବହନ କରିବ ବୋଲି ଅଭିଯୋଗ କରିଥିଲେ। ତେବେ ସମସ୍ୟାର ସମାଧାନ ନ ହେବା ପୂର୍ବରୁ ମେଘା ଇଂଜିନିୟରିଂ କମ୍ପାନୀ ଦ୍ୱାରା ଭଦ୍ରକ ଓ ବାଲେଶ୍ୱର ଜିଲାକୁ ଯାଉଥିବା ମେଗା ପାନୀୟ ଜଳ ପ୍ରକଳ୍ପର ପାଇପ୍ ମାଟି ତଳେ ପୋତା ଯିବା ଫଳରେ ବହୁ ପ୍ରତୀକ୍ଷିତ କଟକ-ଚାନ୍ଦବାଲି ରାଜ୍ୟ ରାଜପଥ (ଏସଏଚ-୯ ଏ)ର ନୂତନ ଭାବେ ପ୍ରଶସ୍ତୀକରଣ କରାଯାଇଛି। ରାସ୍ତାର କଡ ଭାଙ୍ଗିବା ସହ କିଛି ଷ୍ଟ୍ରିଟ୍ ଲାଇଟ ଓପାଡ଼ି ଦିଆଯାଇଥିଲା। କେତେଗୋଟି ଷ୍ଟ୍ରିଟ୍ ଲାଇଟ ଭାଙ୍ଗିଯିବା ସହ ବିଛା ଯାଇଥିବା ବିଦ୍ୟୁତ୍ କେବୁଲ୍ ମଧ୍ୟ ଛିଡି ନଷ୍ଟ ହୋଇଯାଇଥିଲା। ଅବଶ୍ୟ ପରେ ମେଘା ଇଂଜିନିୟରିଂ କମ୍ପାନୀ ଦ୍ୱାରା ମରାମତି କରାଯାଇ ଷ୍ଟ୍ରିଟ୍ ଲାଇଟ ବିଦ୍ୟୁତ୍ ସଂଯୋଗ ଦିଆଯାଇଥିଲା। ସେବେଠାରୁ କିଛିଦିନ ଜଳିଥିଲା। ହେଲେ ସାଧାରଣ ନିର୍ବାଚନର ଦୁଇମାସ ପୂର୍ବରୁ ଏହା ଜଳିବା ବନ୍ଦ ହୋଇଯାଇଥିଲା। କଣ୍ଟପଡ଼ା ବଜାର ସତ୍ୟନାରାୟଣ ବଣିକ ସଂଘ ଲାଇଟ୍ ଜଳାଇବାକୁ ପ୍ରୟାସ କରି କମିଟି ପକ୍ଷରୁ କିଛି ଅର୍ଥ ବ୍ୟୟରେ ସଚଳ କରିଥିଲେ ମଧ୍ୟ ପରେ ଏହା ଜଳିବା ବନ୍ଦ ହୋଇଯାଇଥିଲା। ଏପରି ଦୀର୍ଘଦିନ ଧରି ଅନ୍ଧାର ରହିବା ଏବଂ ରାସ୍ତା ଉପରେ ଗୋରୁ ଶୋଉଥିବା ଯୋଗୁ ପଥଚାରୀ ତଥା ଯାତାୟାତ କରୁଥିବା ଶତାଧିକ ସଂଖ୍ୟାର ଦୁଇ ଚକିଆ, ତିନି ଚକିଆ, ଚାରି ଚକିଆ ଓ ବସ୍, ଟ୍ରକ୍ ଆଦି ଅସୁବିଧାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ବିଡିଓ ପୃଥ୍ବୀରାଜ ପରିଡାଙ୍କୁ ଯୋଗାଯୋଗ କରିଥିଲେ ମଧ୍ୟ ସମ୍ଭବ ହୋଇପାରିନାହିଁ। ତେବେ ଦୀର୍ଘଦିନର ଏହି ସମସ୍ୟାକୁ ଖୁବ୍ଶୀଘ୍ର ସମାଧାନ କରିବାକୁ ଉଚ୍ଚ କର୍ତ୍ତୃପକ୍ଷ ଦୃଷ୍ଟିଦେବାକୁ କଣ୍ଟାପଡ଼ା ବଜାର ସତ୍ୟନାରାୟଣ ବଣିକ ସଂଘ ତଥା ଅଞ୍ଚଳବାସୀ ଦାବି କରିଛନ୍ତି। ଏ ସମ୍ପର୍କରେ ବିଡିଓ ପୃଥ୍ବୀରାଜ ପରିଡାଙ୍କୁ ପଚାରିବାରେ ସମସ୍ୟା ବିଷୟରେ ଅବଗତ ନ ଥିଲି। ଆପଣଙ୍କଠାରୁ ଜାଣିବା ପରେ ଖୁବ୍ଶୀଘ୍ର ତଦନ୍ତ କରି ସମସ୍ୟାର ସମାଧାନ କରାଯିବ ବୋଲି ସେ କହିଛନ୍ତି।
