ଭୁବନେଶ୍ୱର,୨୮।୪(ବ୍ୟୁରୋ): ପ୍ରଥମ ଓଡ଼ିଆ ସିନେମା ‘ସୀତା ବିବାହ’କୁ ଶୁକ୍ରବାର ୮୭ବର୍ଷ ପୂରିବାକୁ ଯାଉଛି। ଇତିମଧ୍ୟରେ ଓଡ଼ିଆ ସିନେମାର ମୋଡ଼ ବିଭିନ୍ନ କ୍ଷେତ୍ର ଦେଇ ଆଗକୁ ବଢ଼ିଛି। ୧୯୩୬ରେ ଓଡ଼ିଆ ସିନେମା ଜଗତକୁ ସେତେବେଳେ ୨୯ହଜାର ୭୮୧ଟଙ୍କା ୧୦ଅଣା ବଜେଟରେ ସୀତା ବିବାହ ଚଳଚ୍ଚିତ୍ର ଏକ ଆଶାର ମଞ୍ଜି ବୁଣିଥିଲା। ହେଲେ ଅବସୋସର କଥା ୮୮ବର୍ଷରେ ବି ଆଜି ଓଡ଼ିଆ ଚଳଚ୍ଚିତ୍ରକୁ ଅନେକ ପ୍ରଶ୍ନ ଘେରି ରହିଛି। ନିମ୍ନମାନର ଚଳଚ୍ଚିତ୍ର, ବିଷୟବସ୍ତୁ, କପି ଆଦିର ଅପବାଦରୁ ଧୀରେ ଧୀରେ ପୁନଃ ମୁଣ୍ଡ ଟେକୁଛି ଚଳଚ୍ଚିତ୍ର ଜଗତ। ସମ୍ପ୍ରତି ଯୁବ ନିର୍ଦ୍ଦେଶକ, ପ୍ରଯୋଜକ, କଳାକାରଙ୍କୁ ନେଇ ଅଣ୍ଟା ଭିଡ଼ିଛି ଓଡ଼ିଆ ସିନେମା। ଯଦିଓ ସିନେମା ଭଲ ଚାଲୁଛି, କିନ୍ତୁ ପ୍ରଯୋଜକ ପ୍ରେକ୍ଷାଳୟରୁ ଟଙ୍କା ପାଉନାହାନ୍ତି। ପ୍ରାପ୍ୟ ପାଇବାକୁ ବେଳେବେଳେ ବର୍ଷ ବର୍ଷ ବିତି ଯାଉଛି। ଅର୍ଥ ଅଭାବରୁ କଳାକାରଙ୍କୁ ମୂଲ୍ୟ ଦେଇପାରୁ ନାହାନ୍ତି ପ୍ରଯୋଜକ। ଫଳରେ ଟଙ୍କା ମିଳୁ ନ ଥିବା ଏବଂ ନିମ୍ନମାନର ବଜେଟ ପାଇଁ କଳାକାର ଓ ପ୍ରଯୋଜକଙ୍କ ମଧ୍ୟରେ ଅସନ୍ତୋଷ ଲାଗି ରହୁଛି। ଅନ୍ୟ ରାଜ୍ୟ ତୁଳନାରେ ଆମ ରାଜ୍ୟରେ ଚଳଚ୍ଚିତ୍ର ପ୍ରତି ସରକାର, ସଂସ୍କୃତି ବିଭାଗ ଏବଂ ଓଡ଼ିଶା ରାଜ୍ୟ ଚଳଚ୍ଚିତ୍ର ଉନ୍ନୟନ ନିଗମ ସେତେଟା ଧ୍ୟାନ ଦେଉ ନ ଥିବା ଜଣାପଡ଼ିଛି। ପ୍ରେକ୍ଷାଳୟ ସମସ୍ୟା, ସବ୍ସିଡି, ଆର୍ଥିକ ସହାୟତା ଭିତରେ ଏବେ ବି ଓଡ଼ିଆ ଚଳଚ୍ଚିତ୍ର ଜଗତ ଛନ୍ଦି ହୋଇ ରହିଛି।
ଦୂରଦୃଷ୍ଟି ବିଚାରଯୋଗ୍ୟ
ଅନ୍ୟ ରାଜ୍ୟରେ ସିନେମା ଭଲ ଚାଲିଛି। କାରଣ ସେଠି ପ୍ରଯୋଜକଙ୍କୁ ସବ୍ସିଡି ଯୋଗାଇ ଦିଆଯାଉଛି। ଆମର ଏଠାରେ ବର୍ଷବର୍ଷ ଧରି ପ୍ରଯୋଜକମାନେ ଆର୍ଥିକ ସହାୟତାରୁ ବଞ୍ଚତ୍ତ ଅଛନ୍ତି। ସେହିପରି ଯେତେବେଳେ ତେଲୁଗୁର ବଡ଼ ବଜେଟର ଚଳଚ୍ଚିତ୍ର ପୁଷ୍ପା-୨ ଓଡ଼ିଶାର ପ୍ରାକୃତିକ ପରିବେଶ ଘେରରେ ନିର୍ମାଣ ଚାଲିଛି, ସେଠି ଆମ ସରକାର ଷ୍ଟୁଡିଓ ନିର୍ମାଣ ପାଇଁ ମାତ୍ର ୨୦୦କୋଟି ବିନିଯୋଗ କରିଛନ୍ତି। ତାହା ପୁଣି ଆଜିଯାଏ ହୋଇପାରୁନି। ତେଣୁ ବର୍ତ୍ତମାନ ବିଭାଗ, ନିଗମ ଓ ସରକାରଙ୍କ ଦୂରଦୃଷ୍ଟି ବିଚାରଯୋଗ୍ୟ। ପ୍ରଯୋଜକ ଯେତିକି ଟଙ୍କାରେ ଚଳଚ୍ଚିତ୍ର କରୁଛି ସେତିକି ମଧ୍ୟ ପାଉନି। ଏଭଳିସ୍ଥିତିରେ ପ୍ରଯୋଜକ କୋଟି କୋଟି ଟଙ୍କା ଖର୍ଚ୍ଚ କରି ଚଳଚ୍ଚିତ୍ର ନିର୍ମାଣ କରିବାକୁ ଭୟ କରୁଛି।
– ଦିଲ୍ଲୀପ ହାଲି, ସିନେ ସମୀକ୍ଷକ
ସରକାରୀ ସ୍ତରରେ ଆର୍ଥିକ ସହାୟତା ଲୋଡ଼ା
ବର୍ତ୍ତମାନ ଓଡ଼ିଆ ଚଳଚ୍ଚିତ୍ର ପୁଣି ନିଜ ଅସ୍ତିତ୍ୱ ବଜାୟ ରଖିବାକୁ ଚେଷ୍ଟା ଚଳାଇଛି। ସବୁଠୁ ଗୁରୁତ୍ୱପୂର୍ଣ୍ଣ ବିଷୟ ହେଲା ସରକାରୀସ୍ତରରେ ଆର୍ଥିକ ସହାୟତା ଯୋଗାଇବା ସହ ଚଳଚ୍ଚିତ୍ରକୁ ଘେରି ରହିଥିବା ବିଭିନ୍ନ ସମସ୍ୟାକୁ ସମାଧାନ କରିବା। ନିକଟରେ ପ୍ରଯୋଜକ ସଂଘ ପକ୍ଷରୁ ନିଗମର ଅଧ୍ୟକ୍ଷ ସତ୍ୟବ୍ରତ ତ୍ରିପାଠୀଙ୍କ ସହ ଆଲୋଚନା କରାଯାଇଥିଲା। ପୂର୍ବରୁ ନିଷ୍ପତ୍ତି ହୋଇଥିଲା ନିଗମ ଚଳଚ୍ଚିତ୍ର ବିତରଣରେ ସାହାଯ୍ୟ କରିବ। କିନ୍ତୁ ବର୍ତ୍ତମାନ ପର୍ଯ୍ୟନ୍ତ ଏହା କାର୍ଯ୍ୟକାରୀ ହୋଇନାହିଁ। ନିଗମ ଏହା ବୁଝିବା ସହ ପ୍ରଯୋଜକ, ବିତରକ ଓ ପ୍ରେକ୍ଷାଳୟ ମାଲିକଙ୍କ ସହ ସହଯୋଗ ରଖିବା ଆବଶ୍ୟକ। ଏପରି କି ଚଳଚ୍ଚିତ୍ରର ଉନ୍ନତି ପାଇଁ ବୈଠକ, ପ୍ରେକ୍ଷାଳୟକୁ କମ୍ପ୍ୟୁଟରୀକରଣ, କଟକଠାରେ ଥିବା ସିଣ୍ଡିକେଟରେ ୱେବ୍ସାଇଟ ଖୋଲିବା, ନିୟମିତ ଚଳଚ୍ଚିତ୍ର କରୁଥିବା ବ୍ୟକ୍ତିବିଶେଷଙ୍କୁ ନିଗମର ପଦପଦବୀରେ ମନୋନୀତ କରିବା ଆଦି ପ୍ରସ୍ତାବ ପ୍ରଯୋଜକ ସଂଘ ପକ୍ଷରୁ ଦିଆଯାଇଛି।
-ସ୍ଥିତ ପଟ୍ଟନାୟକ,
ପ୍ରଯୋଜକ ତଥା ନିର୍ଦ୍ଦେଶକ
