ଇସ୍ଲାମାବାଦ, ୧୭ା୩: ଗତ ସପ୍ତାହରେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍ଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆସିବା ପରେ ତାଙ୍କ ସମସ୍ୟା ବଢ଼ିଛି। ଶାସକ ପାକିସ୍ତାନ ତେହରିକ୍-ଇ-ଇନ୍ସାଫ୍ (ପିଟିଆଇ) ସହ ମେଣ୍ଟ କରିଥିବା ଦଳଗୁଡ଼ିକ ଶତପ୍ରତିଶତ ବିରୋଧୀଙ୍କ ଆଡ଼କୁ ଢଳିବା ଖବର ଇମ୍ରାନଙ୍କୁ ଚିନ୍ତାରେ ପକାଇଛି। ମେଣ୍ଟର ଦଳଗୁଡ଼ିକ ବିରୋଧୀଙ୍କୁ ସମର୍ଥନ କରୁଥିବା ଏକ ସହଯୋଗୀ ଦଳର ମୁଖ୍ୟ ପରଭେଜ୍ ଇଲାହୀ କହିବା ପରେ ପିଟିଆଇ ଶାସନରୁ ବିଦା ହୋଇପାରେ ବୋଲି ଚର୍ଚ୍ଚା ଜୋର୍ ଧରିଛି। ପାକିସ୍ତାନ ନ୍ୟାଶନାଲ ଆସେମ୍ବ୍ଲିର ଆସନ ସଂଖ୍ୟା ୩୪୨। ସଂଖ୍ୟା ଗରିଷ୍ଠତା ପାଇଁ ୧୭୨ ଆସନ ଆବଶ୍ୟକ। ଇମ୍ରାନଙ୍କ ଦଳ ୧୫୫ ସିଟ୍ ଦଖଲ କରିଛି। ସହଯୋଗୀ ଦଳ ସମର୍ଥନ ପ୍ରତ୍ୟାହାର କଲେ ଇମ୍ରାନ୍ ସରକାର ସଂଖ୍ୟାଲଘୁରେ ପରିଣତ ହେବେ। ଶାସନ, ଅର୍ଥନୀତି, ବୈଦେଶିକ ନୀତି ଆଦି ପରିଚାଳନାରେ ଇମ୍ରାନ ବିଫଳ ହୋଇଥିବା ଅଭିଯୋଗରେ ତାଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆସିଛି। ଆସନ୍ତା ୨୮ରୁ ୩୦ ତାରିଖ ମଧ୍ୟରେ ଇମ୍ରାନ ଆସ୍ଥାଭୋଟର ସମ୍ମୁଖୀନ ହୋଇପାରନ୍ତି। ପ୍ରକାଶ ଯେ, ଇମ୍ରାନ ସବୁକଥାରେ ନିର୍ଭରଶୀଳ ଥିବାରୁ ତାଙ୍କୁ ପାକିସ୍ତାନରେ ଜଣେ ଦୁର୍ବଳ ପ୍ରଧାନମନ୍ତ୍ରୀ ଭାବେ ବିବେଚନା କରାଯାଉଛି। ଦେଶର କୌଣସି ପ୍ରଧାନମନ୍ତ୍ରୀ ୫ ବର୍ଷ ଶାସନ କରିବାରେ ସକ୍ଷମ ହୋଇନାହାନ୍ତି।
